Месі ў «Сэлтыку», Зізу ў «Мілане». Рэальныя фота гульцоў у футболках каманд, за якія яны не выступалі
Марадона больш за іншых любіў апранаць «чужыя» формы.
Ідэяй для стварэння такога тэксту стала відэа ў тэлеграм-канале «Джанлука Лападула», на якім Дыега Марадона даваў інтэрв'ю пасля матчу ў футболцы «Мілана». Адразу ўспомнілася, што легендарны аргентынец раней свяціўся з лога «Баварыі» і зборнай Англіі на грудзях. Потым на думку чамусьці прыйшоў Скоўлз у футболцы «Барсы». А чаму б не згадаць яшчэ больш такіх выпадкаў?
Аказалася, што такіх рэальных (не фоташоп!) фотаздымкаў вельмі шмат. І мы дакладна далёка не ўсе сабралі ў гэтым матэрыяле, таму калі вы памятаеце кагосьці яшчэ – пішыце ў каментарах. Магчыма, зробім другую частку (ці хтосьці з блогераў праявіць ініцыятыву).
Адзначым, што мы не бралі дзіцячыя фатаграфіі футбалістаў. Таму Грызман з «Лацыа», Рауль у «Атлетыка», Джэрард у «Эвертане» і многія іншыя падобныя выпадкі не патрапілі ў гэтую падборку.
Дыега Марадона
«Баварыя», «Тотэнхэм», «Мілан», «Алімпіякас», зборная Англіі, зборная Шатландыі, зборная Бразіліі
Адзін з найлепшых гульцоў у гісторыі таксама вельмі часта прымаў запрашэнні на розныя неафіцыйныя матчы ці гульні. Напрыклад, за месяц да свайго гола рукой у браму Англіі Дыега пабываў на «Уайт Харт Лейн», дзе згуляў у таварняку супраць «Інтэра» (запрасіў сябар Освальда Ардылес, які гуляў за «шпор»). Ужо пасля завяршэння кар'еры прыехаў у госці на развітальны матч Матэуса, а таксама цешыў заўзятараў «Алімпіякоса».
Абмен футболкамі з Барэзі запомніўся класнай цытатай у адрас апанента: «Гэта футболка вялікага гульца. Думаю, што Франка Барэзі – ідэал абаронцы. Згадку пра гульню супраць яго я захаваю на ўсё жыццё».
Ну і не саромеўся апранацца і ў колеры чужых зборных – Англіі, Шатландыі і нават Бразіліі (і не раз!).
Эрлінг Холанд
«Бока Хуніёрс», «Фламенга», «Джэнаа», «Ковентры»
Нарвежскі талент зразумеў, у чым сакрэт поспеху, таму да сваіх 22 паспеў засвяціцца ў футболках чатырох каманд. Што самае цікавае – не самых папулярных. Праўда, у адрозненне ад Марадоны, Эрлінг апранаў «чужыя» футболкі выключна па-за полем.
Цікава, адкуль такая любоў да клубаў з Паўднёвай Амерыкі? У інтэрнэце таксама ёсць кадр, дзе зусім малы Холанд стаіць у футболцы «Сантаса».
Ліянель Месі
«Фіярэнціна», «Атлетыка», «Сэлтык»
Кадры, у якія цяжка паверыць. У ліпені 2009-га Леа абмяняўся футболкамі пасля таварняка з «Фіярэнцінай», у тым жа годзе прыняў удзел у дабрачынным матчы, надзеўшы футболку «Атлетыка».
А легендарны кадр для заўзятараў «Сэлтыка» падарыў люты 2008-га, праўда, тады каманда аргенцінца двойчы адолела шатландцаў у плэй-оф ЛЧ.
Алесандра Дэль П'ера
«Мілан», «Шэмрак Роверс»
Сціплы ірландскі «Шэмрак Роверс» у сезоне 2010/11 сышоўся з «Ювентусам» у кваліфікацыі Лігі Еўропы. Двойчы прайграў з агульным лікам 0:3, але наўзамен атрымаў класны кадр легенды футбола.
А футболка «Мілана» пасуе Алесандра, згодныя?
Зінедзін Зідан
«Мілан», «Партызан»
Як і Зідану. Гэта адбылося ў 1998-м, калі «Ювентус» абгуляў «Расанеры» ў матчы турніру «трафей Луіджы Берлусконі» (у гонар бацькі Сільвіё). А футболку «Партызана» француз накінуў на сябе, калі быў ужо гульцом «Рэала».
Джон Тэры
«Сэлтык», «Вэст Хэм»
Бегаў у футболцы шатландскага гранда і Тэры. Таксама абаронцу можна было неяк убачыць у форме «Вест Хэма». Джон тады прыняў удзел у выставачным матчы, на які паклікалі выхаванцаў клуба. За першую каманду «малатабойцаў» Тэры ніколі не гуляў.
Цьеры Анры
«Портсмут», зборная Бразіліі
Кадр Анры з Кубкам свету выглядае як фоташоп. У 1998-м Раналда марыў, каб журналісты зрабілі такое фота, але з яго галавой.
Раналдыньё
Зборная Англіі
Раналда
Зборная Англіі
Калі б заўзятарам зборнай Англіі далі магчымасць змяніць мінулае, то 21 чэрвеня 2002 года склад «трох львоў» на чвэрцьфінал супраць Бразіліі выглядаў бы менавіта так.
Томас Мюлер
«Ювентус»
У чвэрцьфінале ЛЧ 2012/13 «Баварыя» зняла скальп з «Ювентуса» (4:0 па суме двух матчаў), а Мюлер – футболку з Буфона.
Антуан Грызман
«Бока Хуніёрс»
А ўяўляеце звязку Холанд-Грызман у складзе аргенцінскага гранда? Мы таксама не. Але хоць бы такія фота ёсць.
Кака
«Фенербахчэ»
У 2005-м «Мілан» знішчыў «Фенербахчэ» ў групе ЛЧ – 4:0 і 3:1. Кака адзначыўся дублем і засвяціўся ў футболцы суперніка.
Пеле
«Фламенга»
У Бразіліі на афіцыйным узроўні кароль гуляў толькі за «Сантас», але 6 красавіка 1979-га выйшаў на поле ў футболцы «Фламенга» на «Маракане» падчас дабрачыннага матчу. Мог нават забіць, але адмовіўся ад права выканаць пенальці.
Стывен Джэрард
«Рэал»
Некалькі гадоў таму на «Энфілдзе» прайшоў матч легенд «Ліверпуля» і «Рэала». Пасля гульні мясцовыя заўзятары ўбачылі шматгадовага капітана ў незвычайных колерах.
Эдэн Азар
«ПСЖ»
У другой палове 2010-х фаны парыжанаў марылі бачыць бельгійца ў іх форме, а цяпер хіба што Эдэн можа марыць пра цікавасць з боку «ПСЖ».
Франчэска Тоці
«Інтэр»
Тоці выйшаў на поле ў футболцы «Інтэра» ў 1995 годзе. Праўда, тады гэта зрабіла ўся яго каманда, а гульцы «нерадзуры» апрануліся ў колеры «Ромы». Так яны аддалі даніну павагі заўзятару Вінчэнца Спаньёла, якога забілі перад матчам «Джэнаа» і «Мілана».
Златан Ібрагімавіч
«Арсенал»
У 2000-м швед прыехаў на прагляд у «Арсенал», Венгер нават уручыў яму футболку з прозвішчам, але потым нешта пайшло не так. «Арсен сказаў, што хоча, каб я патрэніраваўся з камандай і паказаў, наколькі я круты. Тады згуляла маё эга: ён запрасіў мяне на перамовы, але не ведае, наколькі я круты?».
Рамелу Лукаку
«Барнслі»
Калі Лукаку і далей будзе працягваць забіваць усяго па 6 галоў на сезон, то футболкі клубаў узроўню «Барнслі» стануць для яго звыклай справай.
Пол Скоулз
«Барселона»
Шмат хто памятае, што англічанін быў у сіне-гранатавым пасля фіналу ЛЧ-2011, але не ўсе ведаюць, што праз некалькі гадоў ён зноў засвяціўся ў гэтых жа колерах.
Бастыян Швайнштайгер
«Абердын»
Больш нязвыкла было бачыць Бастыяна толькі ў футболцы «МЮ».
Фото: «Баварія», Sky Sports, Кент, «Рух», The Mirror, Give Me Sport, 433, Barça OTD, Marca, Reprodução, Goal, Daily Mail, Spire Vintage Apparel, retrofootball.ukraine, VBET UK, «Шемрок Роверс», «Фіорентина», erling.haaland