6 фактаў, якія пацвярджаюць фенаменальнасць Холанда

2022 год, 30 ліпеня, Суперкубак Англіі, «Ліверпуль» супраць «Манчэстэр Сіці» – Дарвін Нуньес у пераможным матчы забівае свой дэбютны мяч за мерсісайдцаў, а новы форвард «гараджан» Эрлінг Холанд на апошніх хвілінах з некалькіх метраў трапляе ў перакладзіну. Рэакцыя публікі тады была вельмі рознай – ад кпінаў да прагнозаў, што Холанд не будзе мець больш за 10 галоў у сезоне АПЛ.

2023 год, 3 траўня – Холанд забівае ў вароты «Вэст Хэма» свой 35-ы мяч у чэмпіянаце і б'е вечны рэкорд Эндру Коўла і Алана Шырэра за 6 тураў да фінішу. Здавалася, гэтага ўжо дастаткова, каб прызнаць – Эрлінг знаходзіцца ў неверагоднай форме.

Аднак здзіўляе не столькі рэзультатыўнасць 22-гадовага футбаліста, сколькi тое, якім чынам ён набівае гэтую статыстыку. У апошнія 10-15 гадоў даводзілася бачыць шматлікіх супербамбардзіраў, але ніхто не рабіў гэта ў стылі Холанда. Прыводзім некалькі фактаў, якія пацвярджаюць унікальнасць і фенаменальнасць перформансаў дзявяткі «Ман Сіці».

У Холанда неверагодная эфектыўнасць – мінімум дотыкаў і ўражальная дакладнасць удараў

Пры спалучэнні слоў «Манчэстэр Сіці» і «Холанд» шмат хто прагледжваў паспяховую кааперацыю, аднак уяўлялася гэта так – калектыў Гвардыёлы дамінуе, стварае неверагодную колькасць момантаў, частку з якіх якасны профільны форвард усё ж рэалізуе.

На самой жа справе Эрлінг выкарыстоўвае значна больш шанцаў, чым сярэднестатыстычны гулец атакі.

Калі паказчык у 74 хвіліны на гол яшчэ можна спісаць на ўзровень каманды, то статыстыку дотыкаў – ужо ніяк не. У сярэднім нарвежцу трэба ўсяго каля 20 дотыкаў, каб вызначыцца. Пры гэтым у штрафной плошчы Эрлінгу дастаткова 5,2 разы сустрэцца з мячом, каб адправіць яго ў сетку. Для лепшага разумення – Карыму Бензема ў Ла Лізе трэба 8,25 дотыку ў штрафной на гол.

Калі 28% усіх рэалізаваных удараў уражваюць не так моцна (хаця павінны), то 60% эфектыўнасцi удараў у створ – больш высокі ўзровень. Зноў жа, для параўнання – у Хары Кейна і Кіліяна Мбапэ, найбліжэйшых пераследавацеляў Холанда ў пагоні за «Залатой буцай», 50% і 40% адпаведна.

Эрлінг значна апярэджвае свой графік xG

У працяг тэмы рэалізацыі момантаў – можна лічыць, што такая эфектыўнасць удараў у плошчу выкліканая ўдалым выбарам пазіцый. Маўляў, ён заўсёды знаходзіцца ў патрэбным месцы і шмат забівае ў пустыя вароты. У гэтым ёсць частка праўды, бо, напрыклад, за апошні каляндарны год 59 з 60 галоў былі з межаў штрафной (11 з iх – з пенальцi).

Але ёсць і контраргументы – паказчык чаканых галоў (xG) гэтых эпізодаў усё роўна значна ніжэйшы. +13 ад агульнай колькасці ўдараў і +11 ад удараў у штрафной – гэта вышэй, чым маюць Ліянель Месі (+4.4), Віктор Асімхен (+2.9) і Роберт Левандоўскі (-3.1).

А, ну і не можам не прадэманстраваць карту галоў (блакітныя ромбы) Холанда – нейкі перфекцыянізм.

Холанд наблізіўся да топ-10 бамбардзірскіх перформансаў з пачатку эры Раналду і Месі

Увага да Холанда прыкавана не дарма – даўно ніхто так не цешыў публіку. Самы свежы выпадак – Левандоўскі 3-гадовай даўніны ў Бундэслізе. У Эрлінга засталося яшчэ мінімум 7 матчаў да канца сезона (8 у выпадку выхаду ў фінал ЛЧ), а ён ужо максімальна блізкі да ўваходжання ў топ-10 найлепшых бамбардзірскіх кампаній з пачатку эры Крышціяну Раналду і Ліянеля Месі ў 2010 годзе.

Нарвежцу трэба яшчэ 4 галы, каб апынуцца на чыстым 9-м месцы. Так, на рэкорд Леа замахнуцца не атрымаецца (ёсць матывацыя на будучыню), як, мабыць, і на найлепшыя сезоны Раналду. Аднак варта адзначыць, што Эрлінг – адзіны прадстаўнік АПЛ у гэтым спісе. Партугалец з аргенцінцам забівалі па 45+ у Ла Лізе, дзе ўзровень супраціву ў свой час быў слабейшым, чым зараз у Англіі. Аднак гэта ўсё ўмоўнасці, бо прыхільнікі шматразовых уладальнікаў «Залатога мяча» ў адказ могуць прывесці статыстыку асістаў, якіх у форварда «Ман Сіці» ў гэтым сезоне набралася ўсяго 7.

Як бы там ні было, Холанд зараз хаця б крыху вяртае вайб пачатку 2010-х, калі падобная анамалія была чымсьці звыклым.

Эрлінг у сезоне АПЛ спаборнічае не з іншымі форвардамі, а з камандамі

Гонкі ў АПЛ Холанда сёння не надта хвалююць – яго найбліжэйшы пераследнік (Хары Кейн) адстае на 9 мячоў. Куды цікавей змагацца з цэлымі клубамі – Эрлінг апярэджвае адразу 5 каманд, у тым лiку «Чэлсі», а з «Крыстал Пэлас» ідзе на роўных.

Холанд ужо забіў у АПЛ больш, чым некаторыя легендарныя футбалісты

«Чэлсі» – не адзіная ахвяра. Пасля пабіцця рэкорду брытанскія СМІ адкапалі пералік цікавых прозвішчаў, якія маюць менш галоў у АПЛ, чым Холанд у бягучым розыгрышы.

Тут бачым Златана Ібрагімавіча, генія Месута Азіла і нават забытага героя «МЮ» Нані. Асобна звяртаем увагу на Кая Хаверца – летам 2020-га Чэлсі набыў яго за 80 мільёнаў. Добрая тэма для дыскусій пра кошт/якасць, хаця нападаючым немец стаў не адразу.

Ёсць і іншая цікавая падборка – гульцоў, якія афармлялі хет-трыкі ў АПЛ. У Холанда іх зараз 4, а гэта больш, чым у Крышціяну Раналду, Дзідзье Драгба, Нікаля Анэлька, Эмануэля Адэбаёра, Уле-Гунара Сульшэра, Джэймі Вардзі, Эдэна Азара, Гарэта Бэйла, Рамелу Лукаку і Сон Хін Міна.

З наступным хет-трыкам Эрлінг апярэдзіць Кевіна Кэмбэла, Леса Фердынанда, Джэрмейна Дэфо, Джымі Флойда Хаселбайнка, Мэта ле Цісье, Махамеда Салаха, Тэдзі Шэрынгема, Дуайта Ёрка, Карласа Тэвеса і Фернанда Торэса.

Пабіта бог ведае колькі рэкордаў

Дарэчы, пра хет-трыкі. Найбольш за ўсё хет-трыкаў за сезон у АПЛ зрабіў Алан Шырэр у кампаніі-1995/96 – 5. І гэта адна з вяршыняў, якая яшчэ не скарылася Холанду з моманту пераходу ў «Ман Сіці». Іх за год назбіралася нямала:

➡️ Найбольш за ўсё галоў за сезон у АПЛ;

➡️ Найбольш за ўсё галоў у складзе англійскай каманды за сезон з моманту заснавання АПЛ;

➡️ Найбольш за ўсё галоў гульца «Ман Сіці» за сезон у АПЛ;

➡️ Найбольш за ўсё галоў гульца «Ман Сіці» за сезон ва ўсіх турнірах;

➡️ Самы малады гулец з 30 галамі ў ЛЧ;

➡️ Гулец, якому спатрэбілася найменш матчаў для 30 галоў у ЛЧ;

➡️ Гулец, які хутчэй за ўсё зрабіў тры хет-трыкі ў АПЛ.

І гэта без уліку драбнейшых рэчаў.

Фота: B/R Football, інфаграфіка Tribuna.com