Белфутбол інэртны, але «ватнікаў» у ім няшмат – галасоў за анэксію расійскай лігай амаль няма, а вось якія аргументы супраць
Грошы і не толькі.
21 кастрычніка расiйскі міністр спорту Алег Матыцын заявіў пра намер «уключыць беларускія каманды ў расiйскія лігі амаль па ўсіх камандных відах спорту» – і яшчэ больш нечакана дадаў, што «беларускі бок прапрацоўвае спіс каманд, якія могуць быць уключаныя ў чэмпіянат Расіі па футболе». Хутка высветлілася, што ў АБФФ і ў Расійскім футбольным саюзе пра такі паварот увогуле не думалі, а ў супольнасці нагадалі, што за такое Беларусь хутка выключаць з УЕФА і ФІФА. Зрэшты, не сумняваемся, што аўтарам «задумкі» з ліку паслугачоў рэжымаў Лукашэнкі і Пуціна пляваць.
А вось у белфутболе, як аказалася, проста згаджацца не спяшаюцца. Так, прадказальна знайшлося месца «хатазкрайнікам» – іх пазіцыю агучыў гулец «Мінска» Данііл Душэўскі: «Калі вырашаць паяднаць ЧБ з РПЛ – няхай робяць. Наша справа – гуляць у футбол». Але каб без ваганняў выказацца «за» – такога мы дачакаліся толькі ад ураджэнца Расіі Анатоля Байдачнага.
У астатнім – можа, і з агаворкамі, але здавацца Расіі ў белфутболе не хочуць. Вось якія прыводзяцца аргументы.
Галоўны трэнер БАТЭ Кірыл Альшэўскі дапускае, што ў Беларусі могуць прыняць рашэнне выйсці з УЕФА і ФІФА, і тады сітуацыя зменіцца. А ў цяперашняй спасылаецца на рэгламенты арганізацый – і не бачыць магчымасцяў для «інтэграцыі».
Абаронца менскага «Дынама» Раман Бягуноў даражыць еўракубкамі – у Расiі магчымасці там згуляць сапраўды не будзе, ды і пра чэмпіёнства гаворкі відавочна не зойдзе.
Сяргей Гурэнка, які шмат гадоў гуляў у Расіі, лічыць, што клубы адтуль прыцягнуць беларускіх заўзятараў (спрэчная думка), але нагадвае пра фінансавы фактар – ну і пра міжнародны бан заадно.
Пра грошы думаюць і цяперашнія беларускія гульцы чэмпіянату Расіі. Капітан «Арэнбурга» Міхаіл Сівакоў прапануе нават «не забіваць сабе галаву», пакуль ніхто не кажа пра канкрэтныя ўмовы – ды і, на думку футбаліста, загавораць пра іх няхутка.
Аднаклубнік Сівакова Юрый Кавалёў нагадаў, што ў еўракубках беларускія клубы зарабляюць вялікія для сябе грошы (звычайна некалькі сотняў тысяч еўра), а ў Расіі і гарантаваныя тры з лішнім мільёны долараў выплат ад РПЛ не дапамогуць адбіць бюджэт – ды і замест высокіх месцаў давядзецца думаць пра выжыванне.
Капітан мінскага «Дынама» Сяргей Паліцевіч проста сказаў, што пытанне «інтэграцыі» – гэта не да яго. Абаронца хоча гуляць у родным чэмпіянаце – праўда, адстойваць яго відавочна не гатовы.
Бліжэй за ўсё да «інтэграцыі» беларускія суддзі – пра іх удзел у расійскіх лігах ужо дамовіліся. Але і сярод арбітраў не ўсе хочуць працаваць на суседзяў – адзін з рэферы ЧБ, які ананімна пагаварыў з «Трыбунай», мае на гэта асабістыя прычыны. Нядзіўна з улікам шырокай прапаганды і ўхвалення ў расійскім грамадстве вайны ва Украіне.
Канкрэтней за астатніх выказаўся экс-гулец зборнай Беларусі Віталь Трубіла, хоць ён сам зараз жыве і працуе ў Расіі. Былы футбаліст раіць укладвацца ў падрыхтоўку моладзі, не забіваць цікавасць да ЧБ заяўкай у замежную лігу, а магутнай рабіць не нейкую каманду пад РПЛ, а зборную Беларусі.
Трэба дадаць, што яшчэ адзін экс-футбаліст зборнай Віталь Кутузаў лічыць, што яго былому клубу БАТЭ зараз «няма чаго губляць», таму над яго заяўкай у РПЛ ён бы задумаўся. Але ўсё роўна Кутузаў не хацеў бы прамяняць на «інтэграцыю» ўдзел беларускага прадстаўніка нават у адборы Лігі чэмпіёнаў, якую называе «сапраўды прэстыжным турнірам, пра які марыць кожны».
Іншыя пасты карыстальніка
