Колькі клубы ЧБ зарабілі на продажы гульцоў у апошнія 5 гадоў: «Мінск» абганяе абодва «Дынама», БАТЭ значна адстае ад лідара
Эканоміка беларускага футбола.
У асноўным, беларускія футбольныя клубы жывуць на бюджэтныя грошы, але сёе-тое ім удаецца зарабляць на продажы гульцоў. Даходы часткі клубаў проста смешныя, а некаторыя атрымалі мільёны: «Іслач» прадае на ўзроўні сталічнага «Дынама», «Мінск» апярэджвае Брэст, а БАТЭ сурʼёзна адстае ад лідара.
«Слуцк» – 20 тысяч еўра
У «цукровых» прынята заключаць кантракты на адзін год, таму зарабіць на трансферах практычна нерэальна, хіба што кагосьці захочуць купіць летам, калі пагадненне яшчэ дзейнічае. Так і адбылося з Уладзімірам Мядзведзем. У першай палове чэмпіянату-2019 сын аўтарытэтнага ў пэўных колах чалавека Сяргея Мядзведзя правёў за «Слуцк» усяго чатыры матчы, але неяк зацікавіў «Растоў». Беларускі клуб атрымаў за 19-гадовага футбаліста 20 тысяч еўра. І гэта ўсё, што нагандляваў «Слуцк» за пяць гадоў.
«Дняпро» – 25 тысяч еўра
Апошнія гады ў Магілёве робяць стаўку на ўласных выхаванцаў. Цяпер у складзе шмат моладзі, якая цікавая не толькі беларускім, але і замежным клубам. У студзені 2024-га, як толькі леваму паўабаронцу Марку Мокіну споўнілася 18, «Дняпро» аформіў ягоны трансфер у «Балтыку». Пераход футбаліста, які забіваў у вышэйшай лізе ўжо ў 16, каштаваў расійскаму клубу 25 тысяч еўра. Прабіцца ў РПЛ Мокіну не ўдалося, таму ўсю вясну ён правёў у расійскім Д4 у фарме «Балтыкі-БФУ».
«Гомель» – 50 тысяч еўра
Пасля сезона-2021 гулец ратацыі Мікіта Някрасаў нечакана аказаўся патрэбны БАТЭ, каб закрываць моладзевы ліміт. Ды так моцна, што за 21-летняга вінгера Барысаў у не самыя грашовыя гады пагадзіўся заплаціць прыкладна 30 тысяч еўра.
Пасля нядрэннага першага кола-2022, у якім Рэйманд Адэола набраў 2+4 у 15 матчах, афрыканца захацелі бачыць у «Радзіме». Агент футбаліста Дзмітрый Сялюк абяцаў, што «Гомель» атрымае «пэўную кампенсацыю» ад клуба з расейскага Д2. За лідара атак беларускаму клубу даслалі 20 тысяч еўра.
«Тарпеда-БелАЗ» – 125 тысяч еўра
Пасля сезона-2020 жодзінцы страцілі лідараў нападу бразільцаў Габрыэла Рамаса і Ліпе, якія дапамаглі заваяваць бронзу. Юры Пунтус не хацеў расставацца з важнымі гульцамі, аднак нічога не мог зрабіць. Абодва перайшлі ў «Рыгу». За датэрміновае скасаванне кантракту з 24-гадовым Рамасам латвійцы заплацілі «аўтазаводцам» каля 50 тысяч еўра, а «Львоў» за 150 тысяч еўра прадаў правы за 23-гадовага Велозу. Каля 60 тысяч еўра з другой сумы адышлі «Тарпеда-БелАЗ».
Праз два гады Жодзіна выручыла 15 тысяч еўра на продажы абаронцы Дзяніса Гружэўскага ў «Шахцёр», дзе Іван Біёнчык бачыў у 21-гадовым футбалісце неабходнага для складу лімітчыка.
«Славія» – 152 тысячы еўра
Пераход Арцёма Пятрэнкі са «Славіі» ў «Рух» у пачатку 2020-га выклікаў спрэчкі паміж клубамі. У 19-гадовага нападніка скончыўся кантракт з Мазыром, і той падпісаўся з новым клубам. Аднак «Славія» мела права на кампенсацыю за выхаванне футбаліста. Спрэчку вырашыла федэрацыі, пастанавіўшы, што брастаўчане павінны выплаціць каля 52 тысяч еўра.
Праз год «Славія» страціла яшчэ аднаго таленавітага гульца. За 100 тысяч еўра ў «Шахцёр» зʼехаў 21-гадовы абаронца Глеб Шаўчэнка.
«Нёман» – 180 тысяч еўра
Як правіла футбалісты пакідаюць Гродна свабоднымі агентамі, не прыносячы ніякага даходу. Асноўная прычына таму – усё тыя ж аднагадовыя кантракты. Выключэннем стаў трансфер у пачатку 2020-га. У Гулжыгіта Алыкулава было доўгатэрміновае пагадненне з «Нёманам», і проста так яго адпускаць ніхто не збіраўся. 19-гадовы кыргыз выбіраў паміж «Зенітам», «Мехеленам» і «Кайратам» і спыніўся на апошнім варыянце, беларускі клуб атрымаў 180 тысяч еўра. Ну а праз тры з паловай гады найлепшы футбаліст Кыргызстана-2019 бясплатна вярнуўся ў Гродна.
«Віцебск» – 248 тысяч еўра
Падчас перадсезонкі-2020 паміж брэсцкім «Дынама» і БАТЭ разгарэлася бітва за абаронцу Кірыла Пячэніна, якога кіраўніцтва «паўночнікаў» не вельмі і хацела адпускаць. Тагачасны агент футбаліста Валерый Ісаеў казаў, што і Барысаў, і Брэст гатовыя былі выкласці больш за 100 тысяч долараў. У выніку Пячэнін абраў праект Аляксандра Зайцава. Але пасля ўсплыў толькі адзін варыянт сумы, якую дынамаўцы патрацілі на 22-гадовага футбаліста – 28 тысяч еўра. Верагодна, лічбы блізкая да праўды, бо абаронца і «Віцебск» рассталіся не найлепшым чынам.
Улетку 2021-га віцебскі клуб здолеў зарабіць 120 тысяч еўра на продажы Дыега Сантаса – украінскі «Колас» прыцягнулі 3+7 у 16 матчах ад 23-гадовага бразільца ў першым коле.
Праз паўгода ва УПЛ зʼехаў Вандэрсан Мараньяа. 27-гадовага бразільца, які хутка стаў адным з найлепшых апорнікаў ЧБ, захацела «Александрыя». Так на банкаўскі рахунак «Віцебску» ўпала яшчэ 100 тысяч еўра.
«Энергетык-БДУ» – 311 тысяч еўра
У часы шчодрых інвестыцый Аляксандра Зайцава ў брэсцкае «Дынама» там любілі браць маладыя кадры ў «студэнтаў». У ліпені 2019-га «Энергетык-БДУ» перадаў правы адразу на трох сваіх 22-гадовых футбалістаў – паўабаронцаў Уладзіслава Васільева і Аляксея Наско, а таксама нападніка Усевалада Садоўскага. «Калектыўны» трансфер абышоўся брастаўчанам прыкладна ў 100 тысяч долараў.
У студзені 2020-га «Энергетык-БДУ» за 95 тысяч еўра аддаў у «Дынама» найлепшага снайпера чэмпіянату-2019 Іллю Шкурына. Трансфер аформілі як пераход свабоднага агента – 20-гадовы футбаліст датэрмінова скасаваў пагадненне з мінчукамі, якое дзейнічала да лютага 2020-га, але ў Брэсце не застаўся, а адразу адправіўся ў расійскі ЦСКА.
Праз паўгода БАТЭ выкупіў паўабаронцу Шахбоза Умарава – 21-гадовы ўзбек каштаваў усяго 20 тысяч долараў. Плюс праект Анатоля Юрэвіча атрымаў права на 20 працэнтаў ад наступнага продажу футбаліста – так у пачатку 2023-га на рахунак «Энергетыка-БДУ» ўпала яшчэ 10 тысяч еўра пасля здзелкі Барысава і «Ардабасы».
Апошні і пакуль самы гучны трансфер мінчукоў адбыўся мінулым летам. Клубу ўдалося атрымаць каля 100 тысяч еўра на продажы ў «Ланс» 19-гадовага абаронцы з Узбекістана Абдукадыра Хусанава.
«Дынама» Мінск – 670 тысяч еўра
У студзені 2022-га мінчукі аформілі адразу два трансферы. Спачатку каманду пакінуў Аляксандр Сялява. 29-гадовы апорнік за 120 тысяч еўра падпісаўся з «Растовам», адкуль бясплатна вярнуўся ў «Дынама» праз паўтара года.
Праз некалькі тыдняў у чэмпіянат Егіпта ўкаціў Жан По, якога ў 2021-м прасіў застацца ў Беларусі Аляксандр Лукашэнка. Адзін з аўтсайдараў афрыканскай лігі заплаціў за 25-гадовага івуарыйца 250 тысяч еўра.
Мінулай зімой у «Дынама» не мелі вялікай ахвоты перад стартам у Лізе чэмпіёнаў расставацца са сваім найлепшым снайперам Уладзіславам Марозавым. Аднак у клубе не ўстаялі перад 300 тысячамі еўра ад партугальскай «Арокі».
«Іслач» – 670 тысяч еўра
Трансфер Мамо Янсане ў верасні 2020-га стаў першым сурʼёзным продажам у гісторыі «ваўкоў». Пакупнік аказаўся даволі нечаканым – малійскі «Блэк Старз». «Іслач» хацела за нападніка каля 300 тысяч долараў. Ніхто акрамя афрыканскага клуба не пагадзіўся на такую суму.
Праз паўгода «Іслач» папоўніла казну яшчэ 250 тысячамі еўра. 20-гадовы нігерыйскі абаронца Годфры Стывен абраў «Ягелонію», хоць столькі ж была гатовая заплаціць і «Црвена Звезда».
Мінулай зімой «ваўкі» зараблялі ўжо на беларусах. У маскоўскае «Тарпеда» зʼехаў Аляксандр Гуз. За 19-гадовага гульца моладзевай зборнай клуб расійскага Д2 выклаў 120 тысяч еўра.
«Ваўкі» напэўна зарабілі больш за 670 тысяч еўра. У жніўні 2022-га яны абʼявілі пра трансфер Івана Дыбанга ў замежны клуб, якім аказалася эстонская «Левадыя». Аднак фактычна 21-гадовы камерунскі абаронца зʼехаў гуляць на правах арэнды ў «Крыўбас». Афіцыйна пераход з беларускага клуба ва ўкраінскі праз Эстонію аформілі ў лютым 2024-га. «Крыўбас» заплаціў за афрыканца «Левадыі» 500 тысяч еўра. Невядома, якая частка ад гэтай сумы прызначалася «Іслачы».
«Дынама» Брэст – 775 тысяч еўра
Летам 2019-га брастаўчане зарабілі на продажы Джоэла Фамее. Трансфер 22-гадовага ганскага форварда каштаваў «Арэнбургу» 150 тысяч еўра. Галоўны трэнер брастаўчан Марцэл Лічка шкадаваў пра сыход футбаліста, але і без яго першае ў гісторыі чэмпіёнства Брэста нікуды не падзелася.
Праз паўгода адбыўся згаданы вышэй пераход Іллі Шкурына па маршруце «Энергетык-БДУ» – «Дынама» Брэст – ЦСКА. Ад «армейцаў» клуб Зайцава атрымаў 500 тысяч еўра.
Не найлепшым прайшло расстанне ў 2022-м з 24-гадовым абаронцам Аляксандрам Паўлаўцом. Футбаліст уступіў у перамовы з «Растовам» без дазволу брастаўчан, парушыўшы такім чынам кантракт. У выніку Паўлавец перайшоў у расійскі клуб, а «Дынама» ацаніла шкоду ад датэрміновага скасавання пагаднення ў 700 тысяч еўра і звярнулася ў АБФФ. Федэрацыя палічыла такую суму завышанай і пастанавіла выплаціць брастаўчанам 125 тысяч еўра.
«Мінск» – 810 тысяч еўра
У кожны год пяцігодкі «гараджане» зараблялі на футбалістах. У пачатку 2020-га прадалі ў сталічнае «Дынама» 21-гадовага лідара атак Івана Бахара. Па словах тагачаснага боса «чырвона-сініх» Ігара Шлойды, за 300 тысяч долараў.
Кіраўнік не стаў хаваць і суму за продаж у наступным годзе абаронцы Дзмітрыя Прышчэпы. Перамовы з «Крыламі Саветаў» па 19-гадовам футбалісце ішлі даволі доўга. Першапачаткова «Мінск» хацеў 100 тысяч еўра, а затым 130 тысяч. Расійскі клуб пайшоў на гэтыя ўмовы. Летам 2021-га «Мінск» за 180 тысяч еўра прадаў у маскоўскі «Лакаматыў» паўабаронцу Кірыла Зіновіча, якому толькі споўнілася 18.
Пасля васьмі галоў у 15 матчах летам 2022-га пакупнік за мяжой знайшоўся і на 22-гадовага Ягора Багамольскага. За футбаліста, у якога заставалася ўсяго паўгода кантракту з «Мінскам», заплацілі 100 тысяч еўра.
Летась «гараджанам» удалося зарабіць 80 тысяч еўра на продажы ў БАТЭ 20-гадовага цэнтральнага хаўбека Кірыла Чарнавока.
Адразу два трансферы ў Расію мінчукі аформілі ў пачатку 2024-га. У першыя дні года кантракт з яраслаўскім «Шыннікам» з Д2 падпісаў 21-гадовы дэф моладзевай зборнай Глеб Якушэвіч, што абышлося ў 50 тысяч еўра. У лютым 2024-га пасля прагляду «Мінск» дамовіўся з «Арэнбургам» па форвардзе Цімафею Мартынаве, праўда, сума аказалася сціплай для 18-гадовага праспекта – 30 тысяч еўра.
БАТЭ – 2,46 мільёна еўра
У пачатку 2021-га «Ягелонія» прапанавала за 26-гадовага баснійскага абаронцу Бояна Насціча 150 тысяч еўра. Барысаўцам за некалькі дзён перамоваў удалося падняць кошт да 200 тысяч еўра. Пры гэтым старшыня праўлення БАТЭ Андрэй Капскі заявіў, што «сума за Насціча значна большая за тую, якая была агучаная ў СМІ».
Улетку 2022-га на здзелках па Аляксандары Філіповічы і Вілуме Вілумсане сумарна атрымалася зарабіць 250-300 тысяч еўра. 27-гадовы серб падпісаўся з «Партызанам». Вілумсан, якому было 23, атрымаў двухгадовы кантракт у нідэрландскім «Гоў Эхед Іглз». Тады ж «Шахцёр» саслабіў БАТЭ, выкупіўшы ў яго правы на Максіма Скавыша – за 31-гадовага форварда «гарнякі» выклалі каля 300 тысяч еўра.
У пачатку 2023-га скончылася барысаўская гісторыя Шахбоза Умарава. Пасля высылкі ў дубль і арэнды ў «Ардабасы» казахстанскі клуб вырашыў выкупіць правы на паўабаронцу за 50 тысяч еўра, з якіх 10 тысяч сышлі «Энергетыку-БДУ».
У пачатку таго ж года «жоўта-сінія» прадалі ў «Арыс» Арцёма Шуманскага, якім паралельна цікавіліся ў Расіі. Кіпрыёты аддалі за 18-гадовага форварда 400 тысяч еўра. Таксама ў дамове быў прапісаны працэнт для БАТЭ пры наступным продажы. Таму нядаўна бонусам Барысаў атрымаў 200-220 тысяч долараў за пераход Шуманскага ў ЦСКА.
Летам 2023-га БАТЭ, перажываючы не найлепшыя часы ў фінансавым плане, пачаў распродаж ключавых футбалістаў, прычым трансферы былі выключна ў Расію – усяго на 980 тысяч еўра (19-гадовы брамнік Андрэй Кудравец у маскоўскае «Дынама» за 400 тысяч еўра, 25-гадовы абаронца Захар Волкаў у «Хімкі» за 230 тысяч еўра, 23-гадовы абаронца Уладзіслаў Малькевіч ва «Урал» за 200 тысяч еўра, 26-гадовы паўабаронца Валерый Грамыка ў «Тарпеда» (Д2) за 150 тысяч еўра).
У пачатку 2024-га Барысаў прадаў ва «Урал» 24-гадовага вінгера Арцёма Канцавога за 150 тысяч долараў.
«Шахцёр» – 4,71 мільёна еўра
Лідарам па колькасці і якасці трансфераў на выхад у Беларусі за апошнюю пяцігодку стаў Салігорск. Усяго клуб прадаў 11 футбалістаў.
Першым «Шахцёр» за грошы пакіну брамнік Андрэй Клімовіч. «Гарнякі» не хацелі расставацца з 31-гадовым гульцом зборнай, аднак пасля вылету з еўракубкаў у жніўні 2019-га аддалі «Арэнбургу» за 300 тысяч долараў.
Хаўбек Валеры Грамыка, якому на той момант было 22, так ірваўся з Салігорску, што другую палову 2019-га правёў у дублі. Ну а затым зʼехаў у тульскі «Арсенал» (РПЛ) за сціплыя 80 тысяч еўра.
Тады ж адбылося расстанне з 20-гадовым Максам Эбонгам. Паўабаронца, які толькі дэбютаваў за зборную, адправіўся ў «Астану», дзе адразу стаў гульцом старту. Кіраўнікі казахстанскага клуба назвалі суму трансферу – 250 тысяч еўра.
Улетку таго ж 2020 года «Шахцёр» за грошы расстаўся з двума форвардамі. Віталь Лісаковіч за першае кола стаў лідарам атак Салігорска, забіўшы дзевяць мячоў у 17 матчах. Купля 22-гадовага гульца каштавала маскоўскаму «Лакаматыву» 1,5 мільёна еўра. Праўда, да Салігорска дайшла не ўся сума – 150 тысяч еўра прыйшлося адправіць пасярэдніку ў Шатландыю.
22-гадовага малдаваніна Іона Нікалаеску проста не бачылі ў лініі атакі «Шахцёра», таму развіталіся з ім без шкадавання, пры гэтым здолеўшы нядрэнна зарабіць. Крыніцы ў Малдове паведамлялі, што славацкі ДАК 1904 заплаціў за футбаліста 250 тысяч еўра.
Праз год з Салігорска зʼехаў Дэмба Дарба. За 23-гадовага форварда зборнай Гамбіі эмірацкі «Аль-Наср» перавёў 1,5 мільёна еўра. Адзначым, што годам раней за Дабра давалі больш.
Дзякуючы продажам у Расію ўдалося нядрэнна зарабіць перад стартам сезона-2023. «Ахмат» выклаў 500 тысяч еўра за салігорскіх балканцаў – 27-гадовага абаронцу Мілаша Шатару і 22-гадовага паўабаронцу Заіма Дыванавіча. У маскоўскае «Тарпеда» за 100 тысяч еўра адправіўся 25-летні крайні абаронца Раман Юзэпчук.
Пасля зняцця пунктаў у траўні 2023-га за дагаворныя матчы ў бліжэйшае трансфернае акно «Шахцёр» пакінулі некалькі важных гульцоў. Двое – за кампенсацыю. Існуюць розныя версіі, колькі насамрэч «Крылы Саветаў» заплацілі за Ягора Карпіцкага – ад 100 тысяч да 1 мільёна еўра. Аднак нават калі ўлічыць, што за тады 19-гадовага нападніка выплацілі мінімальную суму, то на лідарства «Шахцёра» ў рэйтынгу гэта не паўплывае. Таксама 300 тысяч еўра Салігорск атрымаў ад маскоўскага «Тарпеда» за 24-гадовага абаронцу Глеба Шаўчэнку.
Іншыя пасты карыстальніка
