Златан і Шаўчэнка – легенды «Мілана». А калі іх аб'яднаць, будзе сын беларускага футбаліста

Год таму ў сям'і беларускага паўабаронцы Яўгена Шаўчэнкі і ягонай жонкі Дарʼі адбылася радасная падзея – у маладой пары нарадзіўся сын. Нядаўна ён адзначыў свой першы дзень нараджэння. І так мы даведаліся, як хлопчыка завуць:

Так, яго завуць Златан. А калі яго імя вымавіць разам з прозвішчам, то ў многіх заўзятараў «Мілана» могуць пайсці настальгічныя слёзы.

На ўсякі выпадак патлумачым. Цёзка па прозвішчы і сына, і самаго беларускага паўабаронцы Андрэй Шаўчэнка – легенда «расанеры». За іх украінец правёў найлепшыя гады карʼеры: узяў удзел у 322 гульнях і забіў 175 мячоў – гэта другі паказнік у гісторыі «Мілана». А яшчэ выйграў усе трафеі на ўнутранай арэне, а на міжнароднай стаў пераможцам Лігі чэмпіёнаў і Суперкубка Еўропы. Таксама гульцом «Мілана» ў 2004-м Шэва атрымаў «Залаты мяч» – узнагароду, якая ўручаецца найлепшаму футбалісту года ў свеце:

Цёзка па імені сына беларускага футбаліста Златан Ібрагімавіч за карʼеру паспеў пагуляць багата дзе, але, здаецца, самым важным для легендарнага шведа стаў этап менавіта ў «Мілане». Там ён скончыў карʼеру, а пасля вярнуўся ў клуб у якасці дарадцы па спартыўных і камерцыйных пытаннях. За час выступлення за «расанеры» Ібра забіў 93 мячы ў 163 матчах, двойчы дапамог клубу ўзяць скудэта.

У Яўгена Шаўчэнкі карʼера пакуль што складваецца больш сціпла. Першую палову 2024-га ён правёў у тульскім «Арсенале» ў Д2 Расіі. Паўабаронца дапамог камандзе заняць 4-е месца, якое дала права згуляць з 13-й камандай мясцовай прэм'ер-лігі за месца ў эліце. Але ў стыках «Арсенал» саступіў «Ніжняму Ноўгараду» па суме двух матчаў (2:1, 0:2). Шаўчэнка за тулякоў агулам правёў 8 матчаў і вызначыўся дзвюма галявымі перадачамі. Яго кантракт з клубам разлічаны да 30 чэрвеня 2025 года.