Гісторыя дня: Румынія пакінула Еўра з пачуццём уласнай годнасці – гэта бачна і на прыкладзе распранальні

Еўра-2024 дабег ужо стадыі чвэрцьфіналаў, але нават зборныя, якія ўжо пакінулі Германію, працягваюць упрыгожваць турнір яркімі фарбамі.

Румынія стала адной з галоўных нечаканасцяў гэтага лета. Камандзе Эдварда Іардэнеску, якая трапіла ў адну групу з Бельгіяй, Украінай і Славакіяй, прадказвалі барацьбу за трэці радок, аднак перамога над украінцамі ў першым туры, а таксама далейшы збег абставінаў дапамаглі перамагчы ў квартэце.

3:0 над камандай Сяргея Раброва не толькі сталі вырашальнымі ў барацьбе за выхад з групы, але і ўвойдуць у найноўшую гісторыю румынскага футбола як адзін з найлепшых матчаў за доўгі час.

У 1/8-й Румынія спадзявалася атрымаць Аўстрыю або Польшчу, але сустрэлася з Нідэрландамі – і амаль без шанцаў саступіла 0:3.

Нягледзячы на горкую паразу і вылет з турніру, румыны вельмі прыгожа развіталіся з Германіяй. УЕФА і нямецкія СМІ ацанілі такі крок.

Румыны па прыкладзе японцаў ідэальна прыбралі за сабой у распранальні мюнхенскай «Альянц Арэны»:

І пакінулі ліст-падзяку арганізатарам турніру:

«Еўра-2024 стаў адной з найважнейшых футбольных падзей у нашай гісторыі, і мы вельмі рады, што турнір праводзілі менавіта ў Германіі. Кожная гульня, кожная эмоцыя і ўсё вакол аб'ядноўвалі нас вакол магіі футбола.

Мы пакідаем Германiю, ведаючы, што аддалі ўсё для Румыніі, і ўдзячныя за ўсё, што мы тут перажылі. Для нас было гонарам быць часткай вялікай еўрапейскай футбольнай сямʼі.

Дзякуй за тое, што дазволілі нам адчуць сябе як дома! Мы ўдзячныя за ўсе зручнасці, якія былі вялікай часткай нашага станоўчага вопыту на чэмпіянаце Еўропы.

Нацыянальная зборная Румыніі».

Сапраўдныя джэнтльмены і выдатны прыклад, як трэба развітвацца з буйнымі турнірамі.

***

Румыны ў шосты раз удзельнічалі ў еўрапейскім першынстве і толькі ў другі раз у сваёй гісторыі выйшлі з групы.

Самым паспяховым быў Еўра 2000 года, калі каманда з маладымі Адрыянам Муту, Крысціяну Ківу і легендай румынскага футбола Георге Хаджы гуляла ўнічыю з Германіяй і перамагала Англію ў групавым этапе.

Тады Румынія кваліфікавалася адразу ў чвэрцьфінал, што да сёння з'яўляецца яе найлепшым вынікам на Еўра.

Фота: UEFA, Graham Chadwick/ALLSPORT