Скандал у «Чэлсі»: Энца праспяваў расісцкі чант пра Францыю, аднаклубнікі вельмі пакрыўдзіліся

Не паспеў Энца Марэска ўзначаліць «Чэлсі», як у клубе ўжо адбыўся скандал – які сапраўды паўплывае на настроі ў распранальні.

Усё праз перамогу зборнай Аргенціны – і яе фінал на ЧС-2022 супраць Францыі.

Аргенцінцы праспявалі расісцкі чант пра французаў – гэта патрапіла ў стрым Энца

Пасля перамогі на Кубку Амерыкі аргенцінцы традыцыйна шмат святкавалі – адзін з эпізодаў адбыўся ў аўтобусе. Адтуль прамы эфір вёў Энца Фернандэс – якраз у той момант, калі гульцы зацягнулі расісцкі чант пра гульцоў зборнай Францыі.

Перакладаецца ён так: «Яны гуляюць за Францыю, але яны ўсе родам з Анголы! Яны трахаюцца з трансамі, як гей Мбапэ. Іх маці з Нігерыі, а тата з Камеруна. Але ў пашпарце напісана – французы!»

Потым нехта кажа Энца спыніць здымку і відэа абрываецца.

Узнік гэты чант яшчэ падчас фіналу ЧС-2022 супраць Францыі сярод заўзятараў – тады, калі памятаеце, у Аргенціне (ды і сярод каманды ў тым ліку) наогул не было межаў у, так мовіць, «тролінгу» суперніка.

Фафана асудзіў чант, ён і шэраг аднаклубнікаў адпісаліся ад Энца

Аднаклубнікі Энца па «Чэлсі» – некаторыя з іх, уласна, непасрэдна французы – нашчадкі мігрантаў – не ўспрынялі паводзіны аргенцінца.

Уэслі Фафана, француз, апублікаваў пост ў сацсетках з выразным тэкстам: «Футбол у 2024 годзе: расізм выйшаў з-пад кантролю».

Шэраг гульцоў «Чэлсі» адпісаліся ад Фернандэса ў сацсетках. Гэта сямёра французаў – Крыстафер Нкунку, Леслі Угачукву, Аксель Дысасі, Мола Гюсто, Бенуа Бадзяшыль, Маланг Сар і Уэслі Фафана, а таксама бельгіец Рамэа Лавія.

З іншых футбалістаў Францыі выказаўся Жуль Кундэ з «Барселоны»: «Шкада».

Федэрацыя футбола Францыі звернецца ў ФІФА і ў аргенцінскую федэрацыю з гэтай нагоды. Міністр спорту Францыі Амелі Удэа-Кастэра таксама заклікала ФІФА адрэагаваць на інцыдэнт.

ФІФА і Федэрацыя футбола Аргенціны пакуль маўчаць.

Энца ўжо папрасіў прабачэння, «Чэлсі» правядзе ўнутранае дысцыплінарнае расследаванне

У ноч з 16 на 17 ліпеня Энца Фернандэс апублікаваў у сваіх сацсетках пост з выбачэннямі:

«Хачу шчыра прынесці прабачэнні за відэа, апублікаванае ў маім інстаграме падчас святкаванняў зборнай. Песня змяшчае вельмі крыўдную лексіку, і гэтым словам няма апраўданняў.

Я выступаю супраць дыскрымінацыі ва ўсіх формах і прашу прабачэння за такое ахопленае эйфарыяй святкаванне перамогі на Кубку Амерыкі. Гэтае відэа, гэты момант, гэтыя словы не адлюстроўваюць ні маіх перакананняў, ні характару.

Мне шчыра шкада».

«Чэлсі» таксама адрэагаваў – паабяцаў правесці ўнутранае дысцыплінарнае расследаванне:

«Чэлсі» лічыць коль-якія формы дыскрымінацыйных паводзінаў абсалютна непрымальнымі. Мы ганарымся тым, што ёсць разнастайны, інклюзіўны клуб, дзе людзі з усіх культур, супольнасцяў і ідэнтычнасцяў пачуваюцца пажаданымі гасцямі.

Мы прызнаем і шануем публічныя прабачэнні нашага гульца і выкарыстоўваем гэта як магчымасць яго выхаваць.

Клуб пачаў ўнутранае дысцыплінарнае расследаванне».

Аднак варта адзначыць, што на відэа спявае не толькі Энца – яму проста не пашчасціла весці прамую трансляцыю ў той момант. Цікава, ці будуць прабачэнні ад іншых прысутных у аўтобусе футбалістаў.

У «Чэлсі» ў Энца ёсць і падтрымка – сенегалец Джэксан

Ужо пасля ўсіх гэтых навін па меншай меры адзін аднаклубнік падтрымаў Фернандэса. Сенегалец Нікаля Джэксан апублікаваў у сторыз відэа, дзе Энца займае цемнаскурае дзіця і забаўляецца з ім, і фота, дзе сядзіць побач з ім на трэнінгу ў клубе.

Сітуацыя ў клубе стала яшчэ больш цікавай, чым звычайна.

Фото: скриншот, Carlton Myrie/Global Look Press