Колькі ў белспорце абяцаюць гульцам: тысячы долараў у БАТЭ, смех ад хакейнага «Дынама», у Брэсце круцейшы прыбіральшчык
Мінімальны мінімум – у Баранавічах.
Беларускі футбол збяднеў пад рэжымнымі лімітамі, але ёсць людзі, якія ўсё роўна хочуць атрымліваць болей. Мабыць, цяпер у іх адзін шлях – спатрэбіцца «Макслайну». Віцебскі клуб, які хоча ў Д1, не скупіцца на навічкоў – а згаданы ліміт дзейнічае толькі на «вышку».
Сярод іншых у Д2 паехаў Кірыл Кірыленка, хаця 23-гадоваму гульцу прапаноўваў кантракт адзін з лідараў вышэйшай лігі «Нёман». Футбаліст адкрыта заявіў, што ўмовы ў Гродне яго не задаволілі. Ды і ўвогуле ў Д1, на думку Кірыленкі, усё дрэнна з грашыма.
«Я ведаю, як хлопцы жывуць. Некаторым наогул няма за што жыць. Гэта жудасна. Тыя ўмовы, якія прапануюць каманды вышэйшай лігі, абсурдныя. Мы нават смяёмся з хлопцамі, што ўмовы супастаўныя з умовамі кіроўцы бізнес-таксі ў «Яндэксе». Гэта смешна», – заявіў футбаліст.
Не зусім зразумела, што так насмяшыла Кірыленку. Кіроўцам таксі бізнес-класа ў Мінску абяцаюць 1,5-2,5 тысячы рублёў за месяц, і для гэтага трэба шмат і ўпарта працаваць, у тым ліку па начах. У «вышцы» ж у шматлікіх клубах футбалісты атрымліваюць 3-4 тысячы рублёў на месяц, і толькі для некаторых самых бедных «столь» – 2-2,5 тысячы.
Пры гэтым у ліпені рэжымны «статыстычны камітэт» апублікаваў звесткі за травень пра медыянны заробак – у графе «творчасць, спорт, забавы і адпачынак» было пазначана 1100 рублёў, то бок 50% работнікаў галіны атрымліваюць менш за тыя самыя 1100 рублёў. Гэта самы маленькі медыянны заробак сярод усіх сфер.
Дык а дзе можна лепей сябе забяспечыць: у спорце ці ў таксі? Для таго, каб гэта зразумець, мы зазірнулі ў рэжымны банк вакансій – туды выкладваюць свае патрэбы юрыдычныя асобы, у тым ліку спартыўныя клубы. Наўрад ці ў вас атрымаецца стаць гульцом нейкай каманды праз падобную аб'яву – але размяшчаць іх клубы абавязаныя. А мы дзякуючы гэтаму можам расказаць, што ўбачылі.
У «Нёмане», які не задаволіў Кірыленку, сапраўды сітуацыя футбалістаў не парадуе – добра, там кіраўніку абяцаюць больш, але і трактарыст з сантэхнікам могуць атрымліваць больш, чым спартсмен-інструктар, якому абяцана ад 660 да 1000 рублёў (каля 200-300 долараў).
У «Славіі», адкуль Кірыленка нядаўна сышоў, заробак спартсмену прапануюць яшчэ меншы – строга 626 рублёў (191 долар). За гэтыя грошы трэба яшчэ неяк паладзіць з Іванам Біёнчыкам, што не так проста.
Столькі ж у клубе хочуць плаціць лекару, а эканамістам быць у 1,5 раза больш выгадна.
У «Віцебску», як і ў «Нёмане», сантэхніка шануюць на адным узроўні з футбалістам, прыкладна ў 214 даляраў.
А ў брэсцкім «Дынама» лепш плацяць прыбіральшчыку, чым футбалісту. Але для ўсіх гаворка ідзе пра сумы меншыя за 300 долараў.
У магілёўскім «Дняпры» стажору спартсмена-інструктара (так афіцыйна звычайна праходзяць дублёры і ў цэлым маладыя гульцы) на стаўку гатовы плаціць у раёне 670 рублёў (204 долары). Пры гэтым у абавязкі раптоўна ўваходзіць нібыта ўдзел у планаванні трэнінгаў. Такая вакансія ёсць і ў жаночую каманду «Дняпра».
Спартсмену-інструктару абяцаюць да 1000 рублёў (305 долараў), мінімум - 780 рублёў (238 долараў).
А яшчэ магілёўцам патрэбны кіроўца аўтобуса – і вось яму абяцаюць ужо мінімум 1000 рублёў. Футбалістам у «Дняпры» быць неяк менш выгадна.
Тым больш не хочацца быць аператарам відэазапісу – тут трэба атрымаць вышэйшую адукацыю для таго, каб атрымліваць палову ад стаўкі ў 700 рублёў (214 долараў).
Наогул у белфутболе ўзровень зарплатных абяцанняў ад клуба да клуба скача, нібы лінія на кардыяграме. Вось у «Гомелі» абяцаюць за «высокі прафесійны ўзровень» 2 тысячы рублёў (611 долараў).
У «Слуцку» за такую ж суму, дарэчы, узроўню не патрабуюць.
У «Нафтане» кладуць ад 849 да 1182 рублёў (каля 260-360 долараў). Аператарам у Наваполацку быць усё гэтак жа сумна, а вось лекарам – даволі прэстыжна.
Ратаваць «Мінск» ад вылету можна і на зарплатным узроўні медсястры, але максімум абяцаюць у 5 тысяч рублёў (больш за 1,5 тысячы долараў). Зрэшты, паводле нашай інфармацыі, заробкі ў клубе значна бліжэй да мінімуму.
У «Іслачы» дык увогуле абяцаюць да 6,5 тысячы рублёў (крыху менш за 2 тысячы долараў). У клубах можа быць некалькі ставак з падвышаным лімітам, так што па паперах усё легальна.
У «Арсенале» палічылі ўсё да капейкі: ёсць дзве стаўкі – на 533 даляра і на 782.
У мінскім «Дынама» аднолькавы зарплатны ўзровень для мужчын і жанчын – праўда, з досведам гульні па-за Беларусі. Затое мінімум – 917 даляраў. А можна атрымліваць і 1587.
Самае высокае са знойдзеных абяцанняў – заробак да 12 тысяч рублёў (больш за 3,6 тысячы долараў) у БАТЭ. Але мінімум – у шэсць разоў менш, а яшчэ раптоўна трэба прафтэхадукацыя.
А вось у «Смаргоні» ўсё вельмі сціпла – пад 200 долараў.
У першай лізе можна знайсці больш выгадныя прапановы. Напрыклад, шэсць вакансій на 0,75 стаўкі пад 400 долараў размешчана ад гомельскага «Лакаматыва».
У неспакойным Слоніме абяцаюць крыху менш за 300 долараў.
У «Энергетыку-БДУ» футбалістам усё ж такі быць лепш, чым кіроўцам. Але зарплата ў спартсмена – усяго крыху больш за 200 долараў.
У «Астраўцы» можна амаль дацягнуць да 250 долараў.
Ёсць вакансіі і ў іншых відах спорту. Недарэчныя для КХЛ 300 долараў раптоўна абяцалі на дзевяць месцаў у мінскім «Дынама». Вітаецца досвед у НХЛ.
У іншых выпадках паверыць у рэальнасць лічбаў лягчэй. У Віцебску прапануюць да 366 долараў – адміністратару і спецыялісту па маркетынгу кладуць меней.
У «Гомелі» хакеістам збіраюцца плаціць крыху больш за 200 долараў, а вось лекару – амаль у тры разы больш.
Менш, чым на 200 долараў, шукае сабе хакеістаў «Хімік» – з забаўным патрабаваннем гуляць у Экстралізе «не больш за 5 гадоў».
За валейбол – у хакейным клубе – гатовыя плаціць больш.
Але ёсць у валейболе заробкі і больш цікавыя – напрыклад, у магілёўскім «Камунальніку» абяцаюць 300 долараў. І вось дзе аператарам быць не сорамна.
У «Барысаве-БДУФК» кладуць запаветныя 500 долараў.
«Шахцёр», які гуляе ў чэмпіянаце Расіі, прапануе цэлых 900 долараў.
Выставілі вакансіі і гранды белгандбола. У «Мяшкова» трэнер цэніцца больш, чым гулец, але і спартсмену абяцаюць ад 600 долараў.
У СКА быць гульцом (за каля 300 долараў) таксама не так выгадна, як трэнерам, а ўжо тым больш прэс-сакратаром.
Больш за тое, мінчукоў па абяцаным заробку абганяюць у «Машэку» – 550 даляраў.
У гродзенскім «Кронане» шукаюць строга дасведчанага высокага ляўшу на ўсяго 200 долараў.
У баскетболе ў «Гродна-93» запрашаюць гульцоў, якія забяспечаць «узаемадзеянне ўсіх ліній». Плаціць гатовы да 300 долараў.
У «Мінску», які больш не будзе гуляць у расійскай лізе ЗГБ, могуць прапанаваць 600-1800 долараў.
А ў жаночым «Гарызонце» – толькі 430 долараў.
Нядрэнныя заробкі ў беларускім міні-футболе – «Сталіца» і «Вітэн» могуць прапанаваць у раёне 600 долараў.
А самы маленькі заробак белспорту мы знайшлі ў жаночым хакеі на траве. Баранавіцкі «Тэкстыльшчык» прапануе 0,25 стаўкі на 190 рублёў – 58 долараў.
Іншыя пасты карыстальніка
