Беларускія футбалісты падтрымалі прытулкі для жывёл – зрабілі хвосцікам рэкламу, дапамаглі кормам

Штогод кожную трэцюю суботу жніўня адзначаецца міжнародны дзень аховы бяздомных жывёл. Незвычайная дата была зацверджана яшчэ ў 1992 годзе па прапанове Міжнароднага таварыства правоў жывёл.

Традыцыйна ў гэты дзень зоаабаронцы імкнуцца прыцягнуць увагу да праблемы жывёл, якія па розных прычынах засталіся без дома. Да акцый прыцягваюцца вядомыя людзі ці арганізацыі, а жадаючым прапануецца падтрымаць прытулкі для такіх звяркоў грашыма, кормам, ці, што яшчэ лепш, забраць каго-небудзь з хвосцікаў дадому.

Удзельнічаюць у такой дабрачыннасці і футбольныя клубы. Напрыклад, «Ротар», за які выступае беларус Максім Швяцоў, выйшаў з хвосцікамі на хатні матч супраць «Балтыкі». Ужо пасля гульні ў клубных сацсетках зрабілі падборку з гісторыямі жывёл. Так, Швяцоў быў у суправаджэнні 5-месячнай Верты, якую выратавалі ад вуліцы.

«Атырау» Віталя Жукоўскага таксама выйшаў з сабачкамі на матч. Толькі паглядзіце на мілага шчанюка, якога трымае беларускі галкіпер Ягор Хаткевіч.

Клуб таксама адправіў у мясцовы прытулак сваю маладзёжную каманду, якая прывезла хвосцікам корм і крыху чалавечай увагі.

У Беларусі да праблемы бяздомных жывёлін прыцягнуў «Тарпеда-БелАЗ» – прапанаваў усім неабыякавым прынесці корм на хатні матч з «Нёманам».

А «Макслайн» з Д2 зладзіў пушыстыкам фотасесію на сталічным стадыёне «Дынама». Праўда, для чагосьці запрасілі туды лукашыстку Марыю Васілевіч.