Для рэжыму «экстрэмiзм» – тэкст Купалы: яго спявалi на матчах зборнай Беларусi ды БАТЭ, а Гуркоў не хацеў «блытацца з палітыкаю»
Але потым шмат разоў выконваў з Мiхалком.
Беларускі рэжым не спыняецца ў сваім жаданні забараніць і знішчыць усё, што яму не падабаецца. Адзін са спосабаў – даданне ў «спіс экстрэмісцкіх матэрыялаў». Абнаўляюць яго ціха – проста загружаюць на месца аднаго файла Word іншы, дзе ўжо ёсць новыя пункты. Зараз іх ужо больш за 3 тысячы.
У такім фармаце часам нешта праходзіць незаўважаным. І вось напрыканцы лета было выяўлена, што яшчэ на пачатку 2024-га «суд» рэжыму Лукашэнкі па Барысаўскім раёне назваў «экстрэмісцкімі» некалькі песень. У тым ліку – «відэакліп і тэкст» кампазіцыi «Не быць скотам» ад гурта «Ляпіс Трубяцкi». Па сутнасці, забаронены верш класіка беларускай літаратуры Янкі Купалы «Хто ты гэткi?» – яго радкі калектыў Сяргея Міхалка і выкарыстоўваў як тэкст, змяніўшы «А што болей?» на «Чаго болей?» и «Дзе радзiўся?» на «Дзе нарадзiўся?».
«Хто ты гэткi?» ў газеце «Наша Нiва» №3 за 1908 год
Трэк «Ляпісаў» выйшаў у 2011 годзе, кліп набраў амаль 4 мільёны праглядаў на YouTube. А песня гучала і на беларускіх стадыёнах. Так, у кастрычніку 2014-га яе заводзілі фанаты на «Барысаў-Арэне», дзе сустракаліся зборныя Беларусі і Украіны. Тады ўвогуле ультрас выканалі шмат чаго.
А ў сакавіку 2017-га на матчы за Суперкубак Беларусі «Не быць скотам» спявалі фанаты «Тарпеда-БелАЗ». Выйграў трафей тады БАТЭ, перамогшы ў матчы 3:1. Гэта, дарэчы, не адзіны выпадак выканання песні на жодзінскім сектары.
А самая цікавая гісторыя з трэкам і белспортам здарылася ў 2014-м. 25 сакавіка таго года да Дня волі тэлеканал «Белсат» выпусціў відэа, дзе пад «Не быць скотам» вуснамі ў тэкст траплялі вядомыя ў Беларусі людзі – у асноўным з мастацтва і журналістыкі. Але зняўся ў своеасаблівым кліпе і шматразовы чэмпіён свету па тайскім боксе Віталь Гуркоў. З-за яго ж ролік быў выдалены літаральна праз некалькі гадзін пасля выхаду – як потым паведамлялася, спартсмен адхрысціўся ад удзелу, матываваўшы гэта нежаданнем «блытацца з палітыкаю». У выніку ролік перазалілі, паставіўшы на ўсе кадры з Гурковым чорны экран з надпісам «Цэнзура».
А 1 верасня 2014-га Міхалок абвясціў пра стварэнне гурта BRUTTO, адным з вакалістаў якога стаў якраз Гуркоў – ён па жыцці захапляўся музыкай. Новы калектыў выконваў і ранейшыя песні, так што ў выніку Гуркоў не раз праспяваў і «Не быць скотам» – напрыклад, у 2017-м на аншлагавым канцэрце на «Мінск-Арэне».
Іншыя пасты карыстальніка
