Мюлер – галоўная легенда ў «Баварыі» ў XXI стагоддзі. Гуляў яшчэ з Клозэ і Падольскі, паставіў клубны рэкорд

Хэдлайнерам мінулага ўік-энду ў нямецкім футболе стаў Томас Мюлер. 34-гадовы форвард «Баварыі» пабіў 45-гадовы рэкорд Зепа Маера па колькасці матчаў у складзе мюнхенцаў, правёўшы 710-ю (!) гульню за родны клуб.

Мюлер з'явіўся на полі на 59-й хвіліне матча, ужо на 78-й забіў прыгожы гол, дапамогшы перамагчы 2:0, і стаў найлепшым гульцом сустрэчы. Ідэальны сцэнар для такога вечара.

Свята імя Мюлера на «Альянц Арэне» – Томас адсвяткаваў на трыбунах з фанатамі, пасля была фотасесія «у космасе»

Матч з «Фрайбургам» Томас Мюлер чакана пачаў у запасе – пад кіраўніцтвам Венсана Кампані ён ужо не будзе гульцом стартавага складу, але нараўне з Мануэлем Ноерам будзе заставацца самай уплывовай фігурай у распранальні. Да таго ж ён усё яшчэ добра ўмее гуляць у футбол.

На 78-й хвіліне матча 34-гадовы ветэран тонка прыняў мяч, прыбраў абаронцу гасцей правай нагой пасля перадачы Сержа Гнабры і магутным ударам з левай падвоіў перавагу «Баварыі»:

Сапраўдная прыгажосць! Пасля фінальнага свістка Мюлера павіншавалі ўсё - і аднаклубнікі, і трэнерскі штаб, і кіраўніцтва мюнхенцаў, і заўзятары на стадыёне. У выніку Томас палез на трыбуны святкаваць разам з фанатамі - на «Альянц Арэне» нікога не любяць так, як Мюлера:

Ужо ў распранальні – яркае святочнае фота з партнёрамі:

А потым – касмічная фотасесія на «Альянц Арэне» ў межах прэзентацыі новых буцаў для рэкардсмена:

Мюлер дэбютаваў за «Баварыю» 16 гадоў таму – і перажыў некалькі эпох у камандзе

Сярод легенд мюнхенскай «Баварыі» ў XXI стагоддзі можна назваць нямала прозвішчаў – ад Олівера Кана, Бастыяна Швайштайгера і Міраслава Клозэ да Мануэля Ноера, Франка Рыберы і Ёзуа Кіміха. Але каго не назаві, усе яны будуць абавязкова перасякацца з Томасам Мюлерам, які гуляў разам з большасцю гэтых футбалістаў (калі не гуляў непасрэдна на полі, то ўжо быў у структуры клуба, калі яны там выступалі).

У 2008-м Мюлер стартаваў у складзе нямецкага «рэкардмайстра» пад кіраўніцтвам Юргена Клінсмана, калі каманду цягнулі Лука Тоні, Марк ван Боммел і бразільцы Зе Рабэрта і Лусіа. Швайнтайгеру тады было ўсяго 24, а 18-гадовы Тоні Кроас яшчэ гуляў пад 39-м нумарам на спіне.

Так выглядаў асноўны склад мюнхенцаў на матч з «Гамбургам» 15 жніўня 2008 года, калі Томас упершыню выйшаў на поле ў футболцы «Баварыі»:

Самае цікавае, што адным з апанентаў Мюлера ў яго дэбютным матчы быў тады 23-гадовы Венсан Компані – дзейны галоўны трэнер мюнхенцаў.

Томас гуляў з Марцінам Дэмічэлісам, фармаваў з Марыё Гомесам надзвычай небяспечную пару цэнтрфорвардаў, выйграў чэмпіянат свету, суправаджаў Рыберы і Арьена Рабэна ў прайм-тайме іх кар'еры, выйграваў трэбл з Юпам Хайнкесам, шчодра асіставаў Роберту Левандоўскам, прайшоў эру Пепа Гвардыёлы, узяў усе магчымыя трафеі з Хансі Флікам, а цяпер выступае з праспектамі Аляксандрам Паўлавічам, Джамалам Мусіялой і Матысам Тэлем, якія нават не хадзілі яшчэ ў школу, калі Мюлер ужо забіваў на «Альянц Арэне».

«Няма яшчэ аднаго такога Томаса Мюлера, – распавёў Гвардыёла ў інтэрв'ю афіцыйнаму сайту «Баварыі». – Ён адзін з найлепшых гульцоў у гісторыі клуба і футбола ў цэлым. Не толькі таму, што выйграў шмат трафеяў, але і таму, што ён заўсёды там, дзе патрэбна камандзе ў цяжкі момант.

Мой любімы момант з Томасам здарыўся ў 2016-м, калі мы гулялі з «Ювентусам» у Лізе чэмпіёнаў і прайгравалі 1:2 за хвіліну да фінальнага свістка. Ён зраўняў лік і перавёў гульню ў дадатковы час. Там мы перамаглі з лікам 4:2. Што мяне заўсёды захапляла ў яго асобы - гэта тое, як ён святкуе галы. Калі сёння футбалісты забіваюць галы, яны бягуць і святкуюць галы сам-насам. Томас іншы, напэўна, больш шчыры – ён проста хоча абняць партнёраў па камандзе пасля гала».

Гвардыёла ўжо даўно не трэнуе «Баварыю», але з вялікай павагай успамінае Мюлера як аднаго з найвялікшых нямецкіх футбалістаў. І гэта так, хаця амаль кожны фанат нямецкага футбола аднойчы хейціў Мюлера за нязграбны стыль гульні. Гэта не замінае заўзятарам паважаць Томаса за шчырасць, прыземленасць, гумар і павагу да супернікаў.

Кантракт Мюлера з «Баварыяй» заканчваецца ў канцы сезона - але ён хоча працягваць гуляць

Хоць некаторыя шматгадовыя былыя партнёры Мюлера па камандзе скончылі кар'еру больш як 10 гадоў таму, хоць Томас перажыў у Мюнхене 14 (пастаянных і часовых) трэнераў, яму ўсё яшчэ толькі 34 гады (35 споўніцца ў канцы месяца).

Кантракт з «рэкардмайстарам» разлічаны да завяршэння сезона 2024/25, і шмат хто з заўзятараў перакананы, што гэта апошні сезон для Томаса ў прафесійнай кар'еры. Хаця складваецца ўражанне, што Мюлер яшчэ шмат чаго здольны прапанаваць камандзе ў новай ролі паўнавартаснага джокера.

Верагодна, шмат што будзе залежаць ад таго, ці змогуць мюнхенцы вярнуць чэмпіёнства на поўдзень Германіі - калі не, Томас знойдзе ў сабе сілы і матывацыю зрабіць гэта ў сезоне 2025/26.

Фота: скриншоти трансляції Setanta Sports, FC Bayern, adidasberlin/Instagram, Sven Hoppe/picture alliance/Global Look Press