Сядзеў за аферу, прывёз у Беларусь Рамарыа, шукаў гульцоў у Бразіліі, а цяпер – прыпісаў сабе бізнес-цэнтр экс-кіраўніка тэніса
Дзмітрый Саксонаў вядзе рызыкоўную гульню.
5 верасня «Наша Ніва» апублікавала журналісцкае расследаванне з двума галоўнымі героямі – адзін з іх валодае нерухомасцю, а другі быццам бы забраў яе сабе, але гэта аказалася ўкідам. Забаўная гісторыя – асабліва з улікам таго, што абедзве згаданыя асобы звязаныя з белспортам.
Аляксандр Шакуцін з 2012-га па 2017-ы ўзначальваў Беларускую федэрацыю тэніса, у які сам любіў пагуляць у вольны час. Але больш Шакуцін заўсёды быў вядомы як адзін з паспяховых у лукашэнкаўскай Беларусі бізнесменаў – і, як і многія іншыя з такіх, быў заўважаны з дыктатарам на ўборцы бульбы. У 2020-х бізнесмен публічна не даваў падстаў сумнявацца ў сваёй лаяльнасці і атрымаў санкцыі за блізкасць да дыктатара.
У 2013-м Шакуцін задумаў узвесці комплекс будынкаў каля Драздоў – любімага раёна Мінска для жыцця вышэйшых рэжымных чыноў. Па дакументах ён праходзіў, нагадваючы пра спартыўныя перавагі ініцыятара, як «гасцінічны комплекс з тэнісным цэнтрам у межах праспекта Пераможцаў – завулка Вяснянкі». А ў СМІ падаваўся як «бізнэс-квартал» пад назвай «Шантэр Хіл». Як цяпер паведамляе «Наша Ніва», ільготны крэдыт на будаўніцтва структуры Шакуціна атрымалі ў Кітаі, пра што дамаўляўся асабіста Лукашэнка.
У 2016-м будаўніцтва пачалося, але да 2020-га яго не паспелі завяршыць. А далей пайшлі адзін за адным кавід, санкцыі са звужэннем заходняга рынку збыту, вайна ва Украіне... Увогуле, перад Шакуціным паўсталі вялікія цяжкасці з выплатай крэдыту – яго дакладная сума невядомая, «НН» ацэньвае дыяпазон у 40-100 мільёнаў долараў. А аб'екты «Шантэр Хіла» выглядаюць вонкава гатовымі, але так і не ўведзеныя ў эксплуатацыю. Хоць на самой гасцініцы можна было б і адбіць нейкія выдаткі, ды толькі яе Шакуцін сам у свой час «зрэзаў» на карысць цяпер не самых запатрабаваных у цэлым у Мінску офісных памяшканняў (а гасцінічны бізнес сёння перажывае бум праз наплыў расіян).
У пачатку лета 2024-га мінакі заўважылі, што па ўсім «Шантэр Хіле» ўвечары раптам уключылася святло. Але ахоўнікі патлумачылі, што гэта для фатаграфавання памяшканняў – што спарадзіла чуткі пра хуткі продаж будынкаў.
Здаецца, сітуацыяй вырашыў скарыстацца другі герой гэтай гісторыі. У канцы жніўня 2024-га ў шэраг беларускіх СМІ прыйшоў прэс-рэліз ад кампаніі X-Labs inc., якая ўваходзіць у Парк высокіх тэхналогій у яго цяперашнім стане. У гэтым прэс-рэлізе смела заяўлялася, што кампаніі перададуць увесь комплекс «Шантэр Хіл» і дададуць замову на «распрацоўку перадавых рашэнняў на базе штучнага інтэлекту» на 180 мільёнаў долараў. Усю гэтую інфармацыю апублікаваў адзін з найбуйнейшых цяпер беларускіх сайтаў Onliner – атрымаўся гучны загаловак.
Але неўзабаве інфармацыя была выпраўленая – і згадка «Шантэр Хіл» знікла. А «Наша Ніва» высветліла, што прэс-рэліз першапачаткова быў ілжывым. Ды і згаданыя 180 мільёнаў долараў для X-Labs inc. вылучаць збіралася Blockchain Sports Ecosystem. А «біяграфія» абедзвюх кампаній замыкаецца на адным чалавеку.
Гаворка пра Дзмітрыя Саксонава, пра якога мы ў апошнія месяцы не раз пісалі. Гэта ён арганізаваў паездку гульцоў чэмпіянату Беларусі ў Бразілію ў якасці «скаўтаў» для маладых футбалістаў.
І ён жа пачаў прыцягваць да рэкламы свайго футбольнага праекта зорак мінулага – некаторыя з іх у ліпені 2024-га прыехалі ў Мінск, дзе на «Дынама» структуры Саксонава зладзілі «фестываль» з масавай раздачай футбольных мячоў. Адным з запрошаных аказаўся легендарны бразільскі форвард Рамарыа.
У сацсетках Саксонаў не скупіцца на кампліменты на ўласны адрас, называючы сябе «выбітным прадпрымальнікам і наватарам». «Наша Ніва» малюе зусім іншую карціну – як паведамляе выданне, у біяграфіі Саксонава ёсць дзясяткі эпізодаў махлярства, два «суды» і адзін «прысуд» на чатыры гады калоніі ўзмоцненага рэжыму. Паводле інфармацыі «НН», пасля выхаду на волю «бізнесмен» захапіўся стартапамі – сферай, дзе правал праекта ў інвестараў лічыцца не прыкметай махлярства, а своеасаблівай платай за шанц на поспех. Ну а перад публікацыяй ад «Анлайнера» пару месяцаў Саксонаў укідваў чуткі, што «Шантэр Хіл» чамусьці аддадуць менавіта яму.
У цэлым свае праекты Саксонаў стаў рабіць на сутыку футбола і тэхналогій – і аднекуль знайшоў грошы на адкрыццё сеткі школ у Бразіліі. А ў гонар X-Labs inc. названы «Юні Ікс Лабс» – каманда з Д3, якой моцна дапамагае фірма. «Юні» цяпер упэўнена лідаруе ў мінскай зоне Д3 і ўжо гарантаваў сабе месца ў агульным плэй-оф турніру.
У прэс-рэлізе ад структур Саксонава таксама сцвярджалася, што X-Labs inc. возьме ўдзел у праекце ў Саудаўскай Аравіі, дзе нібыта пабудуюць «жылы раён са 1500 віл і каля 3330 кватэр» з футбольнай акадэміяй у прыдачу. На далучаным фота Самсонаў ціснуў руку камусьці, апранутаму ў стылі шэйхаў, ну а на фоне быў лагатып фонду Jossor Alpha Investment. Вось толькі ніякай дэталёвай інфармацыі пра гэты фонд не адшукаць. Увогуле, і гэтая гісторыя гучыць зусім ненадзейна.
Пакуль што падобна, што Саксонаў дзейнічае па метадзе Сяргея Аўтуховіча – яго тая ж «НН» трапна назвала «ябацькам лейтэнанта Шміта». Махляр-рэцэдывіст, называючыся прозвішчам Заслаўскі, прыдумляў, як прыпісваць сабе фэйкавыя дасягненні, у тым ліку спартыўныя, а з імі актыўна напрошваўся на сустрэчы з прадстаўнікамі вярхоў беларускага рэжыму.
Саксонаў жа на прэс-канферэнцыю перад згаданым футбольным фестывалем зазваў так званага «намесніка міністра спорту» Аляксандра Бараулю і, што яшчэ больш паспяхова, блізкага да Лукашэнкі Дзмітрыя Баскава. Да яго Саксонаў трымаўся бліжэй – потым такімі фотаздымкамі можна ўражваць і іншых рэжымнікаў.
Саксонаў на фота злева
Ну а «Шантэр Хіл» пакуль што застаецца за Шакуціным – рэальнага пакупніка на комплекс з грудай праблем знайсці складана.
Іншыя пасты карыстальніка
