«Сіці» кажа, што выйграў суд у АПЛ (не той самы), а з клуба сыходзіць Чыкі Бегірыстайн. Што адбываецца
У Манчэстэры паўза была насычанай.
Пакуль у клубным футболе была паўза на зборныя, у АПЛ было весела – ліга дасудзілася з «Ман Сіці». Але пакуль яшчэ не па справе 115 абвінавачванняў – а іншай, дзе сам «Сіці» аспрэчваў правілы лігі па правілах, якія абмяжоўваюць транзакцыі ад спонсараў, звязаных з уласнікамі клубаў (associated party transactions, далей – APT).
«Сіці» заявіў пра перамогу – АПЛ і тэкст рашэння не так катэгарычны
Нагадаем, што гэтыя АРТ-правілы былі ўведзены лігай у 2021 годзе пасля набыцця «Ньюкасла» Саудаўскай Аравіяй і прадугледжвалі перагляд з боку АПЛ спонсарскіх пагадненняў клубаў на прадмет іх рынкавага кошту (fair market value, FMV). Па гэтым праве былі выключаныя пазыкі клубам з боку іх уласнікаў – за гэта тады прагаласавалі 19 з 20 клубаў уключна з «Сіці» («Ньюкасл» устрымаўся).
Цяпер жа «Сіці» абскардзіў як правілы ў прыватнасці, так і асобныя іх палажэнні, у тым ліку па выключэнні з правіла пазык з боку ўласнікаў, а таксама рашэнні АПЛ па некаторых кантрактах, звязаных з ААЭ.
7 кастрычніка клуб выйшаў з заявай, у якой фактычна сцвердзіў, што выйграў трыбунал:
«Клуб выйграў сваю наступную скаргу: правілы АРТ былі прызнаныя незаконнымі, а рашэнні прэм'ер-лігі па двух канкрэтных транзакцыях спонсарства MCFC былі скасаваныя.
Суд устанавіў, што як пачатковыя правілы APT, так і бягучыя (са зменамі) правілы APT парушаюць заканадаўства Вялікабрытаніі аб канкурэнцыі і патрабаваннях працэсуальнай справядлівасці. Аказалася, што прэм'ер-ліга злоўжывала сваім дамінуючым становішчам.
АПЛ выдала сваю заяву – дзе не была настолькі адназначнай у перамозе «Сіці»:
«Прэм'ер-ліга вітае рашэнне суда, які ўхваліў агульныя мэты, структуру і парадак прыняцця рашэнняў у сістэме правіл APT. Суд падтрымаў неабходнасць сістэмы правіл APT.
Аднак суд вызначыў невялікую колькасць асобных элементаў правіл, якія ў сваёй бягучай форме не адпавядаюць патрабаванням канкурэнцыі і публічнага права. Гэтыя элементы могуць хутка і эфектыўна выправіць ліга і клубы.
«Сіці» разаслаў ліст іншым клубам, у якім сцвярджаў, што з гэтага часу правілы АРТ не дзейнічаюць наогул, ажно рэтраспектыўна з 2021-га – і ліга «падманвае» іх у сваёй заяве.
Хто што выйграў? У цэлым трыбунал адхіліў абсалютную большасць абвінавачванняў «Сіці» па сутнасці правіл АРТ – адзначыўшы, што яны ў цэлым адпавядаюць брытанскаму заканадаўству. Але ўсё ж пагадзіўся з клубам у тым, што змены ў лютым (якія ўскладняюць доказ адпаведнасці дамовы рынкавага кошту), немагчымасць клубаў падаць тлумачэнні па звестках лігі і выключэнне з правіл пазык уласнікаў не адпавядаюць заканадаўству.
Апошняе, як сцвярджае выданне The Lawyer, можа стукнуць па іншых клубах – такім як «Арсенал» і «Ліверпуль», якія маюць вялікія крэдыты ад сваіх уласнікаў. Гэта наўрад ці паўплывае на статус-кво – але абмяжуе такія клубы ў магчымай дзейнасці ў далейшым. «Эвертан», напрыклад, па стане на сённяшні дзень павінен сваім уласнікам 451 млн фунтаў.
«АПЛ не мае намеру змяняць правілы, каб рэтраспектыўна ўключыць у правіла ўжо прадстаўленыя пазыкі. Апроч усяго іншага, гэта адкрые АПЛ для наступных пазоваў з боку тых клубаў, па якіх было б несправядліва заднім чыслом змяняць правілы», – адзначае выданне.
Што тычыцца канкрэтных кейсаў, то трыбунал пагадзіўся з правільнасцю рашэнняў АПЛ па кантрактах з Etihad і First Abu Dhabi Bank. Адмовіў дыскрымінацыю АПЛ супраць краін Персідскага заліва, аднак адзначыў, што ліга парушыла правілы, зацягнуўшы рашэнне, і павінна даць «Сіці» магчымасць прадставіць свае звесткі перад высновамі. Цяпер іх, здаецца, перагледзяць.
Увогуле, гэта цяжка назваць перамогай «Сіці» – таму што сутнасць і неабходнасць правіл суд такі пацвердзіў. Хіба што АПЛ не зможа перафарміраваць правілы ў межах, якія вызначыў трыбунал.
Чыкі Бегірыстайн сыходзіць з клуба – кажуць, што планаваў даўно. Але таймінг падазроны
Акрамя таго, у гэтую ж паўзу стала вядома – і ўжо афіцыйна – што спартыўны дырэктар «Сіці» Чыкі Бегірыстайн па завяршэнні сезона пакіне клуб. «Гараджане» ужо нават абвясцілі пра замену – з наступнага лета ў Манчэстэр пераедзе спартыўны дырэктар «Спортынгу» Угу Віяна.
Ён заменіць Бегірыстайна ў ліпені наступнага года, а да гэтага будзе супрацоўнічаць з Чыкі, каб забяспечыць плаўны пераход.
Выданне The Athletic паведаміла, што Бегірыстайн даўно планаваў сысці з пасады пасля таго, як яму споўніцца 60 гадоў.
Аднак таймінг – менавіта ў гэтым сезоне – выглядае крыху падазрона. У тым ліку праз сумна вядомыя 115 абвінавачанняў у парушэннях правіл АПЛ, да якіх Бегірыстайн па пасадзе наўрад ці быў недатычны.
Прынамсі, менавіта ён быў адным з тых, хто пераконваў гульцоў у тым, што ўсё добра – нядаўна пра гэта распавёў Эмерык Лапорт:
«Калі я быў там і з'явіліся гэтыя навіны, прыйшлі спартыўны дырэктар (Чыкі Бегірыстайн – заўв.) і генеральны дырэктар (Феран Сарыяна – заўв.) і сказалі ўсім гульцам і персаналу, што мы ўсе можам быць вельмі спакойнымі, таму што «Ман Сіці» не парушыў ні аднаго правіла. Яны сказалі нам, што ўсё добра, таму ўсё думаем, што з «Сіці» усё будзе добра».
60-гадовы спецыяліст праз узрост і працягласць працы ў клубе (у 2025-м ужо будзе 13 гадоў) сапраўды мог захацець адпачынку - аднак аб'ява, яго час і кантэкст надаюць нотку сумневу.
Фота: АПЛ, Martin Rickett, Andrew Yates/Global Look Press
Іншыя пасты карыстальніка
