Манолас, Гроскройц, Кальехон і яшчэ 6 вядомых гульцоў, якія цяпер гуляюць у нізах
Зорка знайшлася нават у Бутане!
Нядаўна ў футбольныя стужкі навін вярнуўся Костас Манолас – аўтар аднаго з самых вядомых галоў «Ромы» ў ХХІ стагоддзі.
З'явіўся ён праз нечаканы кар'ерны рух – пакінуўшы «Салернітану», гулец перайшоў у аматарскі чэмпіянат Грэцыі.
А вось яшчэ гульцы (вы напэўна пра іх чулі), якія, аказваецца, дагэтуль гуляюць – прычым у вельмі нечаканых месцах.
Костас Манолас («Панаксіякос», аматарскі чэмпіянат Грэцыі)
Уласна, Манолас абраў клуб не проста так – менавіта ў «Панаксіякосе» грэк пачынаў футбольную кар'еру, калі яму не было яшчэ і 16.
Па вяртанне гулец паспеў запаліць: у першым жа матчы выйшаў з капітанскай павязкай у старце і забіў пяць мячоў за 34 хвіліны, пакуль не быў заменены.
Кевін Гроскройц («Вакер Кастроп», Д8 Германіі)
Гроскройц злева пад 19-м нумарам
36-гадовы Гроскройц таксама яшчэ гуляе – у другім нямецкім аматарскім дывізіёне. Яшчэ ў 2021-м легенда «Дортмунда», які паспеў яшчэ пагуляць за «Галатасарай», «Штутгарт», «Дармштат» і «Эрдзінген», абвясціў пра завяршэнне прафесійнай кар'еры.
Пасля гэтага да 2023 года гуляў за «Бевінгхаўзен», з тых часоў – Гроскройц і асістэнт галоўнага трэнера ў «Вакеры Кастроп» з Вэстфаленлігі 2.
Пакуль што ў 25 матчах за клуб у яго 3 галы.
Экс-гулец зборнай Англіі, «Ліверпуля», «Вэст Хэма» і «Ньюкасла» яшчэ мінулы сезон праводзіў у Лізе 2 Францыі з «Ам'енам».
Аднак гэтым летам нечакана пайшоў ратаваць «Бардо», які праз фінансавыя праблемы адправілі ажно ў чацвёрты дывізіён. Усё таму, што з таго ж «Ам'ена» жырандзінцаў пайшоў ратаваць і спартыўны дырэктар – ад яго англічанін і атрымаў запрашэнне.
Пакуль што ў 3 матчах Кэрал мае 5 галоў – не Манолас, але таксама нядрэнна для пачатку.
Экс-гулец «Мілана» і адна з зорак японскага футбола ўжо даўно падарожнічае па свеце – у 2021-м заязджаў нават у «Нефтчы» з Азербайджана і «Судуву» з Літвы.
А яшчэ ў 2018-2023 гадах працаваў трэнерам у сістэме зборных Камбоджы.
Аднак сёлета Хонда гуляе – за клуб «Пара» з чэмпіянату Бутану. Спачатку прыехаў на адзін матч у жніўні – каб паўдзельнічаць у першым раўндзе кваліфікацыі азіяцкай Чэлендж-лігі (супраць непальскага «Чэрч Бойз Юнайтэд»), які бутанцы выйгралі.
А потым – зусім нядаўна, 20 кастрычніка – на апошні матч чэмпіянату Бутану паміж «Пара» і «Тхімпху Сіці», у якім вырашаўся лёс чэмпіёнства. Там Хонда дублем вырваў нічыю, якая прынесла тытул яго клубу.
Марцін Шкртэл («Гайскала Разточна», Д7 Славакіі)
Шкртэл у першую чаргу асацыюецца з абаронай «Ліверпуля», хаця таксама меў больш за 100 гульняў за «Фенербахчэ».
39-гадовы абаронца ўжо мае сваю «трэнерскую» працу – у верасні 2024-га замяніў у «Дунайскай Стрэдзе» на пасадзе спартыўнага дырэктара Глеба Платава. Аднак і футбалістам таксама застаецца – гуляе ў падвалах Славакіі за «Гайскалу» з 2022 года.
Пазіцыя родная – цэнтр абароны, аднак і забівае, мяркуючы па інстаграме клуба (статыстыкі няма), даволі часта. Там жа гаворыцца, што трэнерам клуба з'яўляецца стрыечны брат зоркі Раман Шкртэл.
Кальехон правёў нядрэнную кар'еру – меў 77 матчаў за «Рэал», амаль 350 – за «Напалі», свяціўся ў «Эспаньёле», «Фіярэнціне» і «Гранадзе».
З апошняй у ліпені гэтага года 37-гадовы вінгер пайшоў на паніжэнне – у «Марбелью», якая гуляе ў трэцім дывізіёне. Пакуль – 9 матчаў і два галы, прычым першы – у дэбютным матчы супраць «Кастыльі», за якую калісьці гуляў.
Джордан Айб не запомніўся дарослай кар'ерай – хаця 119 матчаў у АПЛ за «Ліверпуль» і «Борнмут» усё ж адбегаў. Гэта адзін з талентаў, якія сябе не рэалізавалі.
З 2020-га кар'ера ўсяго толькі 28-гадовага вінгера імкліва коціцца ўніз: спачатку «Дэрбі», потым спроба выратавацца ў «Аданаспоры» (за які так і не згуляў), далей – нонлігавы «Ібсфліт» з Д5 і вось з пачатку сёлетняга кастрычніка «Хэйс энд Ідзінг».
За новы клуб Айб паспеў згуляць тройчы, але пакуль без галоў.
Эрнанес («Сале», Д7 Італіі)
Бразільскі паўабаронца ў 2010-2017 гадах пасля паспяховых выступаў за «Сан-Паўлу» затрымаўся ў Серыі А – выступаў за «Лацыа», «Інтэр» і «Юве». Пасля гэтага вяртаўся ў родны клуб і ездзіў на заробкі ў кітайскі «Хэбэй».
У 2023-м Эрнанес узнік у падвалах італьянскага футбола ў «Сале», дзе гуляе дагэтуль. Анансавалі перападпісанне такой эпічнай графікай на фоне стокавай фатаграфіі з вотэрмаркамі.
Педра Леон («Мурсія», Д3 Іспаніі)
Педра Леон – пасярэдзіне
Педра Леон, здаецца, амаль усю кар'еру правёў у Ла Лізе – мае там 346 матчаў. Стартаваў увогуле ў звышзорным «Рэале» – нават забіваў за яго ў ЛЧ «Мілану» ў 2010-м, гуляючы побач з Раналду, Азілам, Дзі Марыяй, Хабі Алонса, Рамасам, Ігуаінам, Касільясам і іншымі і выйшаўшы на замену замест Пепе.
З 2022 года ён гуляе ў трэцім дывізіёне – за «Мурсію», дзе за два з лішнім сезоны аформіў 21 гол.
Фота: svwo2965_official, Loic Cousin/Icon Sport, fk_hajskala_raztocno, marbellafcoficial, «Хэйс энд Ідзінг», antequeracf, pannaxiakos_ao
Іншыя пасты карыстальніка
