У Іспаніі маштабная паводка – Ла Ліга пераносіць матчы, сярод ахвяр футбалісты

2024 праходзіць у Еўропе пад акампанемент стыхійных бедстваў. У прыватнасці, паводак, якія за апошнія месяцы пракаціліся па кантыненце і цяпер дабраліся да Іспаніі.

Па пірэнейскай краіне на гэтым тыдні ўдарыў магутны шторм, які пацягнуў за сабой значнае павышэнне ўзроўню вады ў вадаёмах. Найбольш пацярпелі паўднёва-ўсходнія рэгіёны Іспаніі.

У правінцыях Валенсія і Кастылія-Ла-Манча рэкі выйшлі з берагоў, затапіўшы многія населеныя пункты і прычыніўшы масавыя разбурэнні.

Наступствы настолькі сур'ёзныя, што паўплывалі ў тым ліку на футбол.

⚠️ У чацвер, 31 кастрычніка, Ла Ліга паведаміла пра перанос найбліжэйшых матчаў, якія павінны былі прайсці ў гэты ўік-энд у найбольш пацярпелых рэгіёнах.

Гаворка пра дзве сустрэчы Ла Лігі: «Валенсія» – «Рэал» і «Вільярэал» – «Рая Вальекана».

Акрамя гэтага ліга перанесла матчы Сегунды «Кастэльён» – «Расінг Фероль», «Эльдэнсе» – «Уэска» і «Левантэ» – «Малага».

Новыя даты матчаў пакуль не названыя.

⚠️ Па стане на 31 кастрычніка афіцыйна зафіксаваная гібель 158 чалавек, якія сталі ахвярамі стыхіі. Пры гэтым лічбы не канчатковыя, бо выратавальныя працы працягваюцца.

Адной з ахвяр стаў гадаванец мясцовай «Валенсіі» Хасэ Кастыльеха. Пра гэта ў сваіх сацсетках паведаміў яго былы клуб «Эльдэнсе».

Хасэ Кастыльеха

Футбалісту было 28. Пасля акадэміі «Валенсіі» Хасэ гуляў у ніжэйшых лігах Іспаніі. Акрамя «Эльдэнсе», ён выступаў таксама за «Алікантэ», «Патэрну», «Буньёль», «Рэкамб'ёс Калон», «Роду» і г.д.

⚠️ Іншы ўраджэнец рэгіёну, гулец «Барселоны» Феран Торэс стаў адным з тых, хто далучыўся да дапамогі пацярпелым ад паводкі.

Паводле інфармацыі Mundo Deportivo, Торэс, які нарадзіўся ў валенсійскім горадзе Фаёс і ў тым ліку ведаў Кастыльеха, вырашыў перадаць пэўную суму грошай, каб дапамагчы людзям, якія страцілі маёмасць, а таксама зоаабаронцам, якія цяпер працуюць у правінцыі, ратуючы жывёл.

⚠️ Мільён еўра на дапамогу пацярпелым ахвяраваў «Рэал», кія мусіў гуляць з «Валенсіяй» у гэты ўік-энд.

⚠️ Пры гэтым пагроза не мінула. Метэаролагі чакаюць новых паводак у некаторых рэгіёнах, а Нацыянальная метэаралагічная служба Іспаніі ўказала на самы высокі ўзровень небяспекі надвор'я.

Фота: Rober Solsona/Keystone Press Agency, Carme Ripollæs/Keystone Press Agency, Eldense