Як жа паматала ўдзельнiкаў віктарыны АБФФ – з каманды Бумагi за краты, ад Зяленскага да «зоркі» у пацешным баскетболе Расіі
Адначасова ў Беларусі і на волi толькі адзін.
Віктарыны – дастаткова папулярны фармат ролікаў што для тэлебачання, што для інтэрнэту. Не прайшлі яны і міма белспорту – цяпер для сваіх відэа выкарыстоўваюцца, напрыклад, брэсцкім і мінскім «Дынама». Ну а ў пачатку 2020-га сваю віктарыну спрабавалі запусціць у АБФФ – але хутка скончылі. І як жа па-рознаму склаліся лёсы ўдзельнікаў тых відэа! Так, што захацелася расказаць вам.
Праект футбольнай федэрацыі называўся «ФутбаLove», вядучым стаў Віктар Кучынскі – не самы вядомы КВЗшнiк, які да таго крыху супрацоўнічаў з АБФФ. На яе канале выйшла толькі два выпускі шоу. Першы, ад 31 студзеня 2020-га, набраў амаль 5 тысяч праглядаў – магчыма, таму што ўдзельнікі былі звыклымі для аўдыторыі і ў цэлым максімальна вядомымі ў белфутболе: каментатар Мікалай Хадасевіч ужо сышоў з «Беларусь 5» і стаў футбольным блогерам, а Аляксандр Івулін запаліў сваімі бадзёрымі і адкрытымі рэпартажамі на канале «ЧестнОК».
Калегам трэба было адгадваць футбалістаў па простых і «ўскладненых» фота, адказваць на тэматычныя пытанні, вырашаць рэбусы і нават адгадваць каментары з сацсетак беларускіх футбалістаў. Усё расцягнулася на 40 хвілін нават у мантажы, а паядынак скончыўся ўнічыю, таму абодва выканалі «пакаранні»: Івулін праанансаваў выхад новага роліка ад Хадасевіча, а той падпісаўся на выпадковага хлопчыка, які напісаў Івуліну з просьбай наконт бясплатнай рэкламы.
А вось другі выпуск, ад 7 лютага 2020-га, не набраў і 800 праглядаў. Аўдыторыі відавочна не зайшла ідэя запрасіць даўніх знаёмых Кучынскага з беларускіх комікаў. Сцяпан Манкевіч тады займаўся стэндапам у Мiнску (мабыць, самым вялікім поспехам было пасоўванне аднаго фармату на лакальную анлайн-платформу) і працаваў вядучым на забаўляльным радыё з «сямейства» рэжымнай БТРК. Сяргей Гарох жа ў 2010-х чатыры разы выйграваў на ўкраінскім шоу «Рассмяшы коміка», дзе выклікаў рэальны смех у цяперашняга прэзідэнта Украіны Уладзіміра Зяленскага. А ў 2019-м «зачапіўся» у Расіі – патрапіў у спаборнае шоу «Імправізацыя. Каманды», якое прадзюсавалі вядомыя ў суседняй краіне гумарысты, якія прабіліся на «тэлек». Разам з трыма калегамі Гарох склаў каманду «Мінскія» і выйграў адзін з сезонаў спаборніцтва. Але паралельна працягваў выступаць у Беларусі і крыху супрацоўнічаў з дзяржТБ за кадрам, а з Манкевічам здымаўся ў падкасце «МИР ДВЕРЬ МЯЧ», дзе абмяркоўвалі ў тым ліку спорт.
У другім «ФутбаLove» былі крыху іншыя раўнды, але ў цэлым напаўненне аказалася прыкладна тым жа. Пасля фінальнага раўнда, дзе трэба было ўказаць, якія футбалісты атрымлівалі «Залаты мяч», выйграў Гарох, які даручыў Манкевічу 20 разоў набіць мяч.
Што было далей з удзельнікамі шоу? Пра Івуліна, думаем, вы і так ведаеце: падчас пратэстаў 2020-га ён адкрыта казаў пра гвалт «сілавікоў» і дыктатуру, у 2021-м рабіў рэаліці-шоу са сваёй спробы прабіцца ў «Крумкачы», 3 чэрвеня таго года быў кінуты за краты, атрымаў тэрмін дэ-факта за выхад на праезную частку падчас свайго ўдзелу ў мірнай дэманстрацыі. 17 лютага 2023-га выйшаў на волю і з’ехаў з Беларусі, каб працягваць займацца сваёй справай – цяпер жыве ў Польшчы і здымае відэа ўжо не пра спорт, а пра лёсы людзей, якім таксама прыйшлося пакінуць Радзіму з-за рэпрэсій. Зрэшты, нядаўна блогер разава схадзіў на матч «Легіі» і мiнскага «Дынама».
Хадасевіч цяпер таксама жыве па-за Беларуссю – каментуе матчы на Setanta Sports з Грузіі. У 2020-х яшчэ некалькі гадоў блогер рабіў выпускі пра ЧБ, якія неяк спрабавала заблакаваць АБФФ, але з часам страціў цікавасць да пільнага назірання за белфутболам і перастаў яго асвятляць. Нядаўна таксама ў анлайне запусціў уласную школу спартыўнага журналіста і перыядычна публікуе тэксты вучняў.
Манкевіч у 2020-м уладкаваўся працаваць крэатыўшчыкам у каманду самага папулярнага блогера з Беларусі Улада Бумагi. Таксама працягваў выступаць са стэндапам у Мiнску – у адной з рэцэнзій выступы коміка раілі глядзець тым, хто «стаміўся ад палітыкі». У верасні 2022-га Манкевіч выступаў у Мінску з лекцыяй аб прасоўванні ў YouTube, згадаўшы пра адключаную манетызацыю «ў сувязі з сітуацыяй, якая склалася» (здарылася гэта ў адказ на вайну ва Украіне). Далей пра Манкевіча асабліва нічога не было чуваць – да 20 снежня 2024 года. У гэты дзень «Наша Нiва» даведалася, што комік за кратамі чакае хуткага «суду» па тым жа артыкуле, што раней Івулін – гэта значыць відавочна звязаным з удзелам у пратэстах. За дзень да навін пра бяду Манкевіча Улад Бумага быў адзначаны расiйскім рэжымам – дапушчаны асабіста задаць пытанне яго кіраўніку Уладзіміру Пуціну.
Гарох шчыльна ўліўся ў расійскую сферу гумару. «Імправізацыя. Каманды» восенню 2020-га пусцілі на расійскае агульнадаступнае тэлебачанне, а яго «Мінскія» выйгралі і там. Паціху чацвёрка беларускіх комікаў набірала папулярнасць і цяпер мільгае ў шэрагу расійскіх гумарыстычных анлайн-праектаў, нават вядзе свой – «ОТЫДО» (ролікі рэгулярна набіраюць больш за мільён праглядаў), дзе госці загадваюць сваё стаўленне да зададзенай сітуацыі ад 1 да 100, а беларускія комікі спрабуюць адгадаць лік.
Але Гарох усё ж выглядае самым папулярным з чацвёркі. Ён вядзе і кулінарнае шоу з таксама мільённымі праглядамі, яго клічуць і ў іншыя шоу з прыстойнымі паказчыкамі, ён рэгулярны ўдзельнік праекта «Спартыўныя зашквары», дзе гасцям наваднымі пытаннямі трэба адгадаць, які на картцы на іх ілбах напісаны непрывабны ўчынак спартсмена. А яшчэ Гарох, як сам казаў, «не ведаю навошта на старасць гадоў пачаў гуляць у адзін з самых складаных відаў спорту з ростам 178 і прыкладна такой жа вагой». Гаворка пра баскетбол, дзе беларускі комік уліўся ў аматарскую медыялігу ў складзе 10 – гэта назва праекту з камандамі ў розным «медыяспорце» ад, бадай, цяпер самага папулярнага ў Расіі коміка Азамата Мусагаліева, які мае ў біяграфіі канцэрт на акупаванай Расіяй тэрыторыі Украіны.
10 не набыў вялікіх поспехаў, затое Гароха ў іншым аглядзе назвалі «адной з галоўных медыйных зорак» каманды. Плюс здарылася відавочна вяршыня нядоўгай кар’еры – беларускага коміка паставілі ў персанальную апеку супраць Цімафея Мазгова, расійскага чэмпіёна НБА-2016, які ў 38 гадоў дайшоў да пацешнай лігі.
Увогуле, адзіны з «ФутбаLove», хто застаецца адначасова ў Беларусі і на волі, – гэта вядучы Кучынскі. Ён паспеў пабыць вядучым віктарыны на беларускім адгалінаваньні расiйскага тэлеканала ТНТ, а цяпер – адзін з тых, хто задае пытаньні вялікім імёнам белфутбола ў букмекерскім падкасце «На банке». Да настрою вядучых там бываюць пытанні – напрыклад, адкрытыя фантазіі Георгія Кандрацьева пра гульню зборнай Беларусі ў 2020-х не спынілі ні Кучынскі, ні яго партнёр па кадры Міхаіл Гарнак.
Іншыя пасты карыстальніка
