Ключавая траўма Глеба: Венгер абураўся праз пафігізм у зборнай Беларусі, фінал ЛЧ быў пад пагрозай, дабіў экс-партнёр па «Барсе»
Сёння рэжымнік мяркуе, што каталонцы падвялі з аднаўленнем.
Сянняшні рэжымнік Аляксандр Глеб перыядычна ўспамінае сваю карʼеру, у якой было некалькі топавых футбольных клубаў. У нядаўняй размове ў праекце «На банцы» Глеб заявіў, што большасць яго футбольных праблем здарылася праз адно пашкоджанне пры гульні за зборную – «усё праз гэтую траўму, яна адна». Разбіраемся, што тады здарылася і як паўплывала на шлях гульца.
Глеб успамінае, што падчас гульні за «Арсенал» «за зборную паехаў – і меніск, аперацыю зрабілі». Размова пра сустрэчу адбору да чэмпіянату свету-2006 Шатландыя – Беларусь, якая прайшла 8 кастрычніка 2005 года. Пасля гульні тагачасны трэнер гасцявой каманды Анатоль Байдачны заявіў, што для Глеба гэта быў найлепшы матч за зборную. Аглядальнікі сапраўды адзначалі, што гульня футбаліста дазволіла Беларусі ўсталяваць кантроль над мячом у сярэдзіне поля. А некалькі вострых перадач Глеба не ператварыліся ў галы толькі праз каркас чужых варот. Зрэшты, Беларусь усё адно выйграла 1: 0 дзякуючы голу Віталя Кутузава ў самым пачатку сустрэчы.
Пра траўму Глеба па гарачых слядах не пыталіся. Таму што яна не прывяла да замены – у справаздачы толькі згадвалі, што футбаліст «у пачатку другога тайма пашкодзіў калена, папрасіў дапамогі медыкаў у броўкі, а потым добры дзясятак хвілін, пакуль не разбегаўся, прысутнічаў на полі толькі намінальна». Толькі напярэдадні наступнага матчу зборнай, 12 кастрычніка супраць Нарвегіі (0:1), стала вядома, што ў гульца дыягнаставанае «пашкоджанне меніска і бакавой звязкі левага калена» – і тое ў «Прэсболе» лічылі, што калі б паядынак у Мінску «быў з разраду вырашальных, Глеб напэўна выйшаў бы на поле». Аднак ужо 14 кастрычніка ў лонданскай прыватнай клініцы футбалісту зрабілі аперацыю.
«Глеб быў праапераваны ў пятніцу, хоць хірургічнае ўмяшанне патрабавалася правесці яшчэ ў папярэдні ўік-энд. А беларусы хацелі даць яму ўкол і прымусіць выйсці на поле ў паядынку з Нарвегіяй, які нічога не значыў. Гэта непрымальна. Яны не толькі без павагі ставяцца да здароўя футбалістаў, ім наогул напляваць на гульцоў», – абураўся тады галоўны трэнер «Арсенала» Арсен Венгер.
Аднаўленне Глебу абяцалі за 5-8 тыдняў, яно пайшло па найгоршым прагнозе – на полі ён вярнуўся 7 снежня ў матчы Лігі чэмпіёнаў супраць «Аякса». Як цяпер распавядае экс-футбаліст, тады ў яго ўсё роўна балела калена, і ён адчуваў, што гуляе не на 100%, праз што нават падышоў да Венгера з просьбай аддаць яго на паўгода ў арэнду ў Нямеччыну «набраць упэўненасць». Але трэнер адназначна заявіў, што бачыць Глеба ў аснове і нікуды яго не адпусціць – і пасля гэтых слоў, па адчуваннях гульца, «калена прайшло».
Зрэшты, і далей Глеб хоць нячаста, але прапускаў гульні. А 25 красавіка 2006-га ў самым пачатку паўфінальнага матчу Лігі чэмпіёнаў у адказ з «Вільярэалам» зноў атрымаў па тым жа калене. «Пачулася храбусценне, і спачатку я думаў, што трэба прасіць замену, аднак потым боль спыніўся. Пачуваўся нармальна і ў выніку адгуляў усе 90 хвілін», – па гарачых слядах каментаваў Глеб, які на гульню і так выйшаў на абязбольванні праз іншы ўдар.
Аднак здымкі калена футбаліста адаслалі ў ЗША, адкуль прыйшоў адказ, што можна абысціся без новай аперацыі – толькі ўзяць паўзу ў 10 дзён. Цяпер Глеб апісвае сваю рэакцыю на гэтую навіну так: «# # # [блін], Госпадзі, дзякуй». У выніку футбаліст паўдзельнічаў у фінале ЛЧ, дзе «Арсенал», праўда, саступіў «Барселоне» 1:2.
Далей пра праблемы з каленам шмат гадоў не было чуваць. Часам замінала Глебу гуляць траўма сцягна, але няшмат. Неўзабаве пасля пераходу ў «Барселону» ў 2008-м пачалася чарада іншых пашкоджанняў – шчыкалаткі, галенастопа, зноў сцягна, іншай шчыкалаткі. Калена нагадала пра сябе 15 траўня 2011 года, калі Глеб гуляў за «Бірмінгем», куды каталонцы аддалі ў чарговую арэнду. У матчы АПЛ з «Фулхэмам» футбаліст сутыкнуўся з экс-партнёрам па каталонскім клубе Эйдурам Гудзьёнсэнам, пасля чаго сышоў з поля, пакінуўшы сваю каманду ў меншасці, бо ліміт замен ужо быў вычарпаны.
«Звычайная падножка, але ад рэзкага руху меніск вылез, закруціўся і блакаваў калена – тое самае, якое траўмаваў у 2005-м з шатландцамі. У «Барселоне», параіўшыся, далі дабро на аперацыю ў Лондане ў таго ж хірурга, што і шэсць гадоў таму. Ён застаўся вельмі задаволены, таму што ўдалося захаваць меніск», – распавядаў тады Глеб, дадаючы, што Гудзьёнсэн быў у шоку ад наступстваў і тэлефанаваў «выказаць спачуванне».
Сёння ж беларускі экс-футбаліст наракае, што ў «Барселоне» яму далі няправільную праграму аднаўлення. «Трэба адразу было пачынаць рэабілітацыю, а іспанцы мне, маўляў, месяц адпачні, проста хадзі на мыліцах і ўсё. І ў мяне настолькі цягліца атрафіравалася, што яе трэба было аднаўляць. Калі б я ў Нямеччыну не паехаў у клініку доктара «Баварыі» і не пачаў [аднаўленне], не ведаю, колькі спатрэбілася б, каб прыйсці ў сябе. Там ужо практыкаванняў надавалі. Але [аднаўленне] доўгі час заняло, і балела доўга», – паскардзіўся Глеб.
Улетку 2011-га футбаліст сышоў у «Вольфсбург» – цяпер успамінае, што трэнер Фелікс Магат, знаёмы па «Штутгарце», спачатку абяцаў даць час аднавіцца, але потым «пачаў прыспешваць», і Глеб «з апухлым каленам на ўколах праз боль» правёў чатыры матчы, пасля чаго пагаварыў з трэнерам з нагоды непажаданых рызык – і бакі вырашылі расстацца. Далей футбалісту «неабходны быў нейкі душэўны варыянт» – ім аказаліся расійскія «Крылы Саветаў». Там было толькі два месяцы гульнявой праграмы з сакавіка па травень 2012-га, Глеб у цэлым паспеў аднавіцца і, хоць «калена пабольвала», паўдзельнічаў у 8 з 12 сустрэч, прычым у шасці апошніх праводзіў на полі па 90 хвілін.
У сярэдзіне 2012-га Глеб, вызваліўшыся ад кантракту з «Барселонай», апынуўся ў БАТЭ, дзе калена па-ранейшаму давала пра сябе ведаць. У камандзе футбаліст аказаўся ў прывілеяваным становішчы – як успамінае, «да гульняў рыхтаваўся практычна сам, сам выбіраў, над чым папрацаваць«, а яшчэ «запампоўваў» калена, заадно пастаянна выкарыстоўваючы супрацьзапаленчы прэпарат. Але яно ўсё роўна «пабольвала перыядычна» да 2013 года.
Сёння Глеб лічыць, што менавіта гэтая траўма не дала яму вярнуцца на высокі ўзровень. «Там размовы былі, клубы еўрапейскія. А траўму атрымаў – усё гэта спынілася», – успамінае футбаліст. Аднак сітуацыя выглядае так, што Глеб з 2008-га ў цэлым быў вельмі траўматычным, і праблема былі звязаныя не толькі ў няўдачы з каленам.
Таксама экс-футбаліст дадае, што праз меніск «цяпер не гуляе». Хоць сам жа кажа, што па футболе не сумуе, да яго не цягне. У 2024-м Глебу чарговым разам прааперавалі левае калена – але ўжо не ў Лондане, а ў Мінску.
Іншыя пасты карыстальніка
