Пакуль самы вялікі шок сезона ЛЧ: хто гэтыя людзі з «Бруге», якія сенсацыйна выбілі «Аталанту»
19-гадовы хлопец, выхаванец «Барсы» і экс-трэнер паўпрафесійнага клуба.
«Бруге» вельмі нечакана выбіў дзейнага пераможцу Лігі Еўропы «Аталанту» з Лігі чэмпіёнаў, абсалютна па гульні перамогшы намінальнага фаварыта ў абодвух матчах (5:2 агулам).
Нагадаем, што «Аталанта» у стыкі выпала з топ-8 групавога этапу ЛЧ, фінішаваўшы дзевятай, тады як «Бруге» па выніках групы быў 24-м, то бок намінальна гэта самая слабая каманда стыкавых матчаў.
З некаторымі імёнамі бельгійскай каманды вы добра знаёмыя – як з экс-брамнікам «Ліверпуля» Сімонам Міньёле, які ўзяў пенальці ў матчы у адказ, або шматгадовым лідарам каманды Гансам Ванакенам.
Але выніковыя дзеянні ў гэтых матчах здзяйснялі, магчыма, не настолькі вядомыя гульцы – коратка знаёмімся з імі.
Статыстыка супраць «Аталанты»: 2 галы, 1 асіст
Ферана Жуджлу мусяць памятаць фанаты «Барселоны» – выхаванец Ла-Масіі паспеў засвяціцца ў 2021-м у асноўным складзе клуба падчас кадравага крызісу на пачатку працы Хаві. Тады ён нават забіў «Эльчэ» – быў самым старэйшым з «новых» зорак, сярод якіх асабліва ззялі Гаві з Алексам Бальдэ.
Жуджла замацавацца ў «Барсе» не змог – у 2022-м яго адпусцілі ў «Бруге» за 5 млн еўра. У першых двух сезонах зрабіў 15+8 і 11+9 па сістэме гол+пас адпаведна.
У супрацьстаянні з «Аталантай» Жуджла забіў першы мяч у першым матчы, аддаў асіст на першы гол каманды ў другой гульні, а таксама забіў сам трэці гол «Бруге».
Статыстыка супраць «Аталанты»: 2 галы, 1 асіст
Ідэнтычныя паказнікі ў Тальбі – менавіта ён аддаў асіст на Жуджлу ў першым матчы, а ў другім забіў першыя два мячы.
Тальбі ўсяго 19 гадоў, ён выхаванец «Бруге» – з асноўнай камандай толькі з 2023 года, а першыя мячы на прафесійным узроўні пачаў забіваць у сезоне 2024/25.
Тальбі ў 2023-2024 гадах ужо паспеў перажыць траўму пярэдняй крыжападобнай звязкі. Ён мае мараканскія карані, аднак на юнацкіх узроўнях гуляе за Бельгію – праўда, у U-19 і U-21 яшчэ нават не дэбютаваў!
Статыстыка супраць «Аталанты»: 1 гол
Густаф Нільсан вырваў перамогу ў першым матчы з пенальці на 90+4-й хвіліне. 27-гадовы швед – наўрад ці той, каго ў «Бруге» трымаюць на продаж.
Прыйшоў у каманду толькі сёлета з «Юніяна» Сэн-Жылуа, дзе правёў моцны сезон 2023/24 (17+5), аднак цікава не гэтае. З 2020 па 2023 год Нільсан гуляў за «Веен» у трэцім нямецкім дывізіёне!
Статыстыка супраць «Аталанты»: 2 асісты
А вось 23-гадовы грэк Хрыстас Цоліс абышоўся без галоў – аднак аддаў адразу два асісты ў другім матчы. Выхаванец ПАОКа паспеў прайсці праз «Норвіч» у АПЛ і Чэмпіёншыпе, «Фартуну» Дзюсельдорф у другой Бундэслізе і «Твэнтэ» – там нават заскочыў у Лігу канферэнцый.
Аднак нідзе ён нават блізка не быў да ЛЧ – і вырашальных выніковых дзеянняў у плэй-оф турніру.
Бонус: трэнер Нікі Хаен
Легенда «Сінт-Труйдэна» як гулец – Нікі Хаен не дужа вядомы на міжнародным узроўні трэнер. Яго кар'ера аж да 2020 года была напоўнена дробнымі бельгійскімі клубамі і пасадамі памочніка, пасля чаго яму на сезон даверылі «Васланд-Беверэн».
«Бруге» ж ён узначаліў дзякуючы ледзь не выпадковаму павышэнню пасля звальнення папярэдніка ў сакавіку 2024-га – да таго працаваў у моладзеўцы клуба. Да гэтага клуба Хаен працаваў у – увага! – паўпрафесійным валійскім клубе «Хаверфордвест», які у тым сезоне фінішаваў трэцім з канца ў валійскай Прэм'ер-Лізе.
Фота: Jan De Meuleneir, Spada, Bruno Fahy, Dha, Jan De Meuleneir / Global Look Press
Іншыя пасты карыстальніка
