«Дынама» ўзяло Суперкубак без 18 (!) гульцоў чэмпiёнскага ростэра – вось куды яны сышлi (нехта паспрабуе адняць iншыя трафеi)
Ёсць ужо нават галы былым.
Узімку мінскае «Дынама» зладзіла вялікую перабудову – галоўны трэнер Вадзім Скрыпчанка растлумачыў яе сумесным з кіраўніцтвам рашэннем «амаладзіць склад», галоўнай прычынай чаго назваў «удзел у групавым этапе Лігі канферэнцый, які паказаў, над чым трэба працаваць, каб у будучым на такім узроўні выглядаць больш канкурэнтаздольнымі». У сухiм астатку каманду пакінулі амаль два дзясяткі футбалістаў, якія былі датычныя да чэмпіёнства-2024.
На іх месца прыйшлі пакуль што 12 чалавек (прычым трое проста вярнуліся з арэнды), і Скрыпчанка перад Суперкубкам паспеў сказаць пра кадравы дэфіцыт – мы аналізавалі, на каго цяпер можа разлічваць трэнер.
Аднак і такім ростэрам «Дынама» змагло ўзяць першы трафей сезона.
А куды сышлі тыя, хто сваім унёскам у перамогу ў ЧБ-2024 дапамог мiнчанам атрымаць права згуляць за Суперкубак? Расказваем пра ўсіх у адным пасце.
Абарона
Футбаліст 2024 года Беларусі і асноўны брамнiк «Дынама» мінулага сезона (46 сустрэч, 26 «сухіх», 35 прапушчаных мячоў) 21-гадовы Фёдар Лапавухаў пайшоў у балгарскі ЦСКА за 650 тысяч еўра.
24-гадовы левы абаронца Раі Лопес у мінулым сезоне быў заўважным выканаўцам у складзе «Дынама»: па-бразільску тэхнічна разганяў флангавыя атакі і дастаўляў мяч у штрафную. Агулам правёў 42 матчы, у якіх адзначыўся 3 галамі і 6 асістамі. У пачатку лютага свабодным агентам перайшоў у малдоўскі «Шэрыф».
Глыбіня складу на левым фланзе абароны паменьшылася з сыходам у дзяржынскі «Арсенал» 19-гадовага Мацвея Міхайрына. У 2024-м за «Дынама» ён правёў 6 матчаў без выніковых дзеянняў.
Адразу трох дасведчаных выканаўцаў (амаладжэнне як-нiяк) «бела-сінія» пазбавіліся ў цэнтры абароны. 39-гадовы Аляксандр Сачыўка (13 сустрэч) новы клуб не знайшоў – кажуць, мае прапанову ад «Мiнска», але думае ўвогуле скончыць. 34-гадовы капітан Сяргей Паліцевіч (23 матчы) сыйшоў у «Тарпеда-БелАЗ». 33-гадовы Дзяніс Палякоў (9 гульняў) стаў футбалістам брэсцкага «Дынама». Жодзiнцы i брастаўчане – з топ-4 вышэйшай лігі і прэтэндуюць на чэмпiёнства ў 2025-м, так што былыя мiнчан будуць iм жа цяпер намагацца перашкодзiць.
У перадсезонцы Паліцевіч паспеў адзначыцца голам у браму свайго былога клуба – але не святкаваў.
Паўабарона
Найлепшы асістэнт «Дынама» ў мінулым сезоне Павел Сядзько (34 матчы, 5 галоў i 9 асiстаў) мог згуляць на двух флангах і ў цэнтры поля, але так сябе ставiў, што стамiў трэнера.
26-гадовы гулец таксама сышоў у «Тарпеда-БелАЗ» і паспеў засмуціць былы клуб перад Палiцевiчам.
Таксама ў Жодзіна паехаў 32-гадовы апорнік Аляксандр Сялява (39 матчаў, 3 галы i 2 асiсты). Але на яго пазiцыю ў адваротным кiрунку рушыў супастаўны 24-гадовы Максiм Мякiш.
«Дынама» пазбавілася i iншых гульцоў цэнтра поля: па сканчэнні арэнды ў расійскія «Хімкі» вярнуўся 21-гадовы івуарыец Бані Ам’ян (20 матчаў, 2 гола), 23-гадовы нігерыец Джозэф Акаро (7 матчаў) перайшоў у таджыкістанскі «Істыклол», 26-гадовы расіянін Данііл Кулікоў (17 матчаў, 1+2) – у армянскі «Пюнік», яго 24-гадовы суайчыннік Ігар Школік (34 матчы, 3+6) – у «Іракліс» з Д2 Грэцыі.
Яшчэ адзiн паўабаронца пайшоў з «Дынама», не будучы звязаны з чэмпiёнствам-2024 – Аляксандр Свірэпа мiнулы год правёў у арэндзе ў брэсцкiм «Дынама» (26 матчаў, 3 мячы). Цяпер 25-гадовы апорнік сышоў у БАТЭ, адкуль узялі равеснiка Дзяніса Грачыху.
Атака
Адзін з ключавых выканаўцаў «Дынама» мінулага сезона (43 матчы, 7+5) 26-гадовы левы вінгер Дзмітрый Падстрэлаў сышоў у албанскі «Партызані». У грэчаскі «Астэрас» паехаў 23-гадовы Рэйманд Адэола (34 матчы, 6 галоў), які мог падмяніць Падстрэлава на левым краі, згуляць на правым фланзе ці ўвогуле цэнтрфорварда. У «МЛ Віцебск» сышоў яшчэ адзін універсал-вінгер – 24-гадовы Глеб Жэрдзеў (35 матчаў, 2+4).
Дзмітрый Падстрэлаў
«Дынама» адпусціла і цэнтральных нападаючых, але тое і не дзіва, калі найлепшым снайперам каманды ў сезоне становіцца абаронца.
У «Шыннік» (аўтсайдар расійскага Д2) перайшоў 27-гадовы нігерыец Стывен Альфрэд, які адзначыўся 6 галамі і 3 асістамі за 23 матчы мінулага сезона. Кантракт з «Іслаччу» падпісаў 34-гадовы Уладзімір Хвашчынскі, які выдаў усяго толькі 3+1 за 26 матчаў.
Нарэшце адзiны трансфер, акрамя продажу Лапавухава, якi прынес «Дынама» грошы – пераход 18-гадовага Трафіма Мельнічэнка (37 сустрэч, 3+5) за 350 тысяч еўра ў сiстэму партугальскага «Порту».
Агулам «Дынама» пакiнулi 18 чалавек з ростэра 2024-га плюс Свiрэпа. 9 з iх правялi за клуб у мiнулым сезоне больш за 30 матчаў. 8 экс-гульцоў засталіся ў Беларусі, пры гэтым чацвёра зацікавілі канкурэнтаў: Палякоў – брэсцкае «Дынама», Сядьзко, Сялявам і Паліцевіч – «Тарпеда-БелАЗ». Што яшчэ цiкава – дзевяць з тых, хто пайшоў, не дасягнулi i 25 гадоў. Такое вось рашэнне амаладзiць каманду па-дынамаўскi.
Але пры ўсiм гэтым першы Суперкубак у сваёй гiсторыi «Дынама» ўзяло. Цi будуць яшчэ трафеi i група еўракубкаў у 2025-м – пакажа час. А вы як думаеце?
Іншыя пасты карыстальніка
