Клуб беларуса ў Польшчы 1,5 года не мог гуляць удома – даводзіў стадыён-малютку да ладу. І вось што атрымалася

«Пушча», з якой у канцы студзеня падпісаўся беларус Герман Баркоўскі, выступае ў Экстракласе ўсяго толькі другі сезон. Да таго каманда доўга гуляла у Д2 Польшчы. Павышэнне ў 2023-м паставіла перад клубам пытанне: дзе прымаць супернікаў? Справа ў там, што стадыён у Непаламіцах не адпавядаў патрабаванням эліты, хоць і быў мадэрнізаваны ўсяго гадоў 10 таму. Вось як арэна 17-тысячнага горада яшчэ нядаўна выглядала.

Каб мець магчымасць гуляць у Д1, «Пушчы» давялося абраць часовы дом. Ім стаў хатні стадыён «Краковіі» ў Кракаве. Ён здольны прыняць 15 тысяч гледачоў і знаходзіцца пракладна ў 25 кіламетрах ад Непаламіц. Там «Пушча» гуляла паўтара гады, пакуль вяліся працы на яе ўласнай арэне.

У Непаламіцах зрабілі шмат працы. Напрыклад, задаволілі тэлевізіёншчыкаў. Правамі на паказ матчаў польскай вышэйшай лігі валодае Canal+. І раней на стадыён нават не мог заехаць аўтамабіль, які перадае сігнал трансляцыі – давялося пашыраць і праезд, і паркінг.

Важным момантам сталі месцы для камер. Матчы «Пушчы» ў першай лізе трансляваліся з невялікіх вышак каля поля. Canal+ настаяў, каб пункты аддалілі і паднялі. Дзеля гэтага разабралі дзіцячую пляцоўку і паставілі пяць веж. Некаторыя з іх абшылі дрэвам пад пушчанскі стыль. Месца для канструкцый не хапала, а таму давялося плаціць грошы ўласніку суседняй прыватнай тэрыторыі.

Акрамя гэтага ў Непаламіцах замянілі металічныя канструкцыі пад трыбунамі, завялі аптавалакно для тэлебачання і павялічылі колькасць VIP-месцаў (іх павінна быць 250). А вось гасцявых фанатаў стадыён пакуль не можа прымаць.

У найбліжэйшы час гарадскія ўлады збіраюцца дадаць яшчэ 500 крэслаў за варотамі. А калі «Пушча» застанецца ў Экстракласе, то неўзабаве будзе збудавана вялікая, двухтысячная, трыбуна за другімі варотамі.

Наогул, стадыён удзельніка Экстракласы павінен умяшчаць мінімум 4500 тысяч гледачоў. Сёння ж у «Пушчы» толькі 2000 месцаў. На пашырэнне ўмяшчальнасці ліга дала яшчэ тры гады. Зазначым, што ў Беларусі да маштабу арэны не ўзнікла б пытанняў – хатнія матчы можна праводзіць на пляцоўках, якія здольныя прыняць хаця б 1500 гледачоў.

Усё гэта было зроблена для таго, каб мясцовы клуб нарэшце мог гуляць на сваім стадыёне ў Экстракласе. Першы для «Пушчы» поўнавартасны хатні матч чэмпіянату адбыўся 2 сакавіка і сабраў поўныя трыбуны. Білеты на ліблінскі «Матор» раскупілі вельмі хутка. Праўда, вынік мясцовых заўзятараў расчараваў – «Пушча» саступіла 0:1. Баркоўскі правёў поўны матч. Яго каманда пасля 23 тураў ідзе трэцяй з канца – і гэта месца на вылет. Зрэшты, у табліцы высокая шчыльнасць, і справы на сёння не выглядаюць безнадзейна.

Гаспадары гулялі ў спецыяльных футболках, прысвечаных гістарычный для для клуба падзеі.

На трыбунах таксама было вельме атмасферна. Мясцовыя фанаты зладзілі піратэхнічнае шоу.

Вечарам таго ж дня «Пушча» даведалася свайго суперніка па паўфінале Кубка Польшчы, куды сціплая каманда дабралася ўпершыню. Нагадаем, што важны гол у чвэрцьфінале забіў Баркоўскі – яго удар дапамог прайсці варшаўскую «Палонію» (2:1). Па выніках лёсавання ў Непаламіцы прыкладна праз месяц прыедзе «Погань» са Шчэцына. Абноўлены стадыён чакае вялікі матч.