Бразілец, які пешкі і з пузікам разрываў за «Віцебск», цяпер жыве ў Літве: трэнуе дзяцей, скінуў 20 кг, завязаў з алкашкай
П'яным ледзь не разбіўся, хадзіў на тэрапію.
Многія беларускія заўзятары памятаюць Рафаэля Ледэсму. Тэхнічны бразілец упершыню аказаўся ў чэмпіянаце Беларусі яшчэ ў сезоне-2009: два гады пагуляў за «Партызан» (32 матчы, 5+4 па гол+пас), затым правёў сезон у мінскім «Дынама» (26 матчаў, 8+3). У ліпені 2017-га плэймекер зноў завітаў у Беларусь: стаў адным з лідараў «Віцебску», у якім адгуляў 26 матчаў і выдаў 7+5.
Ледэсма, якому на момант вяртання ў ЧБ ужо было 34, вельмі спадабаўся віцебскай публіцы: захапляў фінтамі, філіграннымі перадачамі і магутнымі ўдарамі. Гэтыя скілы перакрывалі яго недахопы: адсутнасць хуткасці, слабую працу ў абароне і прыкметны жывоцік. Акрамя таго, Ледэсма ахвотна размаўляў з прэсай і заўзятарамі, а яшчэ дапамагаў уладкаваць у «Віцебск» суайчыннікаў.
У тым ліку дзякуючы эфектнай і эфектыўнай гульні бразільца «Віцебск» у ЧБ-2018 фінішаваў чацвёртым (не хапіла аднаго пункта да тройкі), якое ў далейшым дазволіла стартаваць у кваліфікацыі Лігі Еўропы. Але Ледэсма той паспяховы чэмпіянат да канца не дагуляў. У канцы чэрвеня раптоўна нібыта па сямейных абставінах пакінуў клуб – паляцеў на Мальту, дзе жыла сям'я. А ўжо на пачатку ліпеня «Віцебск» абʼявіў пра скасаванне кантракту.
Ужо ў верасні бразілец падпісаўся з «Сан-Гванам» з Д2 Мальты, аднак у студзені 2019-га перайшоў у літоўскі «Панявежыс», дзе за 28 матчаў забіў шэсць разоў. Затым ізноў вярнуўся на Мальту, дзе выступаў за «Аратары Юс» з лігі мальтыйскага вострава Гоца. Там і завяршыў кар'еру ў ліпені 2021-га.
Большую яе частку Ледэсма правёў у Літве. Разам з «Каўнасам» двойчы станавіўся чэмпіёнам, а ў сезоне-2007 быў найлепшым бамбардзірам і найлепшым гульцом чэмпіянату. Бразілец дагэтуль застаецца найлепшым снайперам літоўскай лігі сярод легіянераў за ўсю гісторыю – 65 мячоў. У Літве Ледэсма знайшоў, як сам казаў у 2018-м, свой «галоўны трафей» – жонку Сімону. З ёй футбаліст мае дваіх дзяцей – дачку Рафаэлу і сына Габрыэла. Праўда, шлюб Сімоны і Рафаэля разваліўся, а разышліся яны, як прызнаваў бразілец, не найлепшым чынам, на што мог паўплываць лад жыцця футбаліста.
Ледэсма прызнаваўся, што, калі гуляў у футбол, мог парушаць рэжым – выпіўка пасля гульні ці трэнінгу для яго была своеасаблівым рытуалам. А яшчэ, падобна, легіянер не быў узорным сем'янінам. Яго аднаклубнік па «Віцебску» Антон Мацвеенка распавядаў, што Ледэсма ўмеў хутчэй за ўсіх склеіць дзяўчыну, у чым яму дапамагалі «кепачка і завушніцы». Аднаклубнікам, па словах Мацвеенкі, заставалася толькі падбіраць за бразільцам.
Пасля завяршэння кар'еры Ледэсма стаў імкліва набіраць вагу і працягваў выпіваць, што аднойчы ледзь не прывяло да трагедыі. Бразілец быў на Мальце. Неяк яму патэлефанавалі сябры і паклікалі на варушняк, які доўжыўся да самай раніцы. Пʼяны Ледэсма сеў за руль – і ледзь не трапіў у аварыю.
Той выпадак прымусіў перагледзець стаўленне да алкаголю. Ледэсма стаў хадзіць на спецыяльную тэрапію, дзякуючы чаму ў траўні 2023-га цалкам адмовіўся ад спіртнога. Тады ж прыняў рашэнне ўзяцца за форму. На той момант бразілец важыў 97 кіло пры росце 180 сантыметраў, за мэту ж сабе паставіў схуднець да 80 – і даў рады за паўгода, хоць пасля і прызнаваўся, што было нялёгка.
«Фізічна гэта было сапраўды цяжка, трэнінгі кожны дзень, жорсткая дыета, кладуся спаць па начах, а мой жывот выдае вельмі гучныя гукі. Дрэнна сплю і гэтак далей. З тых часоў ніякага алкаголю. Сакрэт у тым, што без добрага псіхічнага здароўя нічога не было б магчымым! Я ў гэтым упэўнены», – падзяліўся ён у сваім інстаграме.
Сёння Ледэсма падтрымлівае форму, а фота і відэа з мацоўні рэгулярна з'яўляюцца ў сацсетках. Калі меркаваць па здымках, бразілец шмат падарожнічае, але яго пастаяннае месца пражывання – Літва, дзе ён адчувае сябе добра і якая ўжо стала домам. З верасня мінулага года Ледэсма працуе дзіцячым трэнерам у «Жальгірысе» з Каўнаса. Як паведамляла прэс-служба клуба, былы гулец праводзіць індывідуальныя трэнінгі, якія скіраваныя на якасць перадач, першага дотыку і іншых тэхнічных элементаў – карацей, на тое, у чым сённяшні коўч сам калісьці меў добры ўзровень. Заняткі ў бразільца платныя. За шэсць сесій бацькам давядзецца заплаціць 129 еўра.
З літоўскай мовай у бразільца няма праблем. Ён спакойнай дае інтэрв'ю мясцовым медыям і нават сам зʼяўляецца вядоўцам аднаго з падкастаў пра футбол. А яшчэ выступае як амбасадар вытворцы біялагічных дабавак, якога рэкламуе ў сябе ў інстаграме, і аднаго з салонаў прыгажосці, паслугамі якога карыстаецца.
Нягледзячы на развод, ад дзяцей бразілец не аддаліўся. Габрыэл і Рафаэла ходзяць у адну са школ Каўнаса і праводзяць выходныя разам з бацькам. Хлопец, дарэчы, як і бацька, ляўшун і нядрэнна ўмее жангляваць. Нават калі гэта мяч для баскетболу.
Крыніца: Instagram rafael.ledesma10
Іншыя пасты карыстальніка
