☠️ «Хвіліна маўчання для Рафіньі, які памёр»: Аргенціна нават без Месі зноў прынізіла Бразілію

Зборная Аргенціны знішчыла Бразілію ў кваліфікацыі на ЧС-2026 4:1.

Як заўжды, гэтае дэрбі не абышлося без гучных канфліктаў і эмоцый.

Рафінья зладзіў трэшток перад матчам – і не вывез гэта на полі

І без таго звышпрынцыповае супрацьстаянне дадаткова перад гульнёй падпаліў лідар бразільцаў Рафінья, выдаўшы ў размове з Рамарыа наступную фразу:

💬 «Мы пераможам, несумненна. На полі і за яго межамі, калі давядзецца. Ці паспрабую забіць? Так, з усіх сіл. ##### [да чорта] іх».

Мяркуецца, што гэта завяло як аргенцінскіх футбалістаў, так і заўзятараў. Апошнія са стартавых хвілін забаўляліся на хатніх трыбунах тым, што Рафінью называлі «сукіным сынам» і кпліва заклікалі ўсё ж такі выйсці на поле, іранізуючы над яго бледнай гульнёй:

Зборнікі Аргенціны ўзяліся актыўна апрацоўваць вінгера «Барсы», калі камфортна павялі 3:1 у першым тайме. Задума мела поспех – у нейкі момант у Рафіньі здалі нервы: пасля адзінаборства ён адштурхнуў Тальяфіка, што справакавала галоўную сутычку ў матчы:

Якраз падчас яе Атамендзі нагадаў, што Рафінья зрабіў не так – папрасіў таго «менш гаварыць»:

Эмоцыі не суцішыліся да самага перапынку, бразільскага вінгера ў распранальню цягнулі ледзь не сілком – пацешна, што гэты абавязак на сябе ўзяў 18-гадовы мадрыдыста Эндрык:

Як аказалася, гэта таксама наступствы дзеянняў аргенцінцаў – спачатку Эміліяна Марцінес «незнарок» падштурхнуў Рафінью, а затым Рамэра і Парэдэс «пагладзілі» па галаве:

Тым часам фаны працягвалі – выконвалі даволі жорсткую крычалку: «Хвіліна маўчання для Рафіньі, які памёр»:

Зрэшты, рыторыку ў пасляматчавых святкаваннях падхапілі і футбалісты – скандавалі тое ж самае разам з заўзятарамі.

Канфлікты з Рафіньяй – не адзіны. Адзначаліся і зоркі «Рэала»

Куды ж без гэтага? Напэўна, самы яскравы з другарадных хайлайтаў – сутычка Радрыга і Парэдэса. Бразілец назваў Леандра «надзвычай дрэнным гульцом», на што той нагадаў пра колькасць выйграных Кубкаў Амерыкі – 2:0 не на карысць гульца «Рэала». Радрыга, дарэчы, замянілі ўжо ў перапынку:

Вінісіус, надзіва, быў менш узрушаным. Аднак карыстальнікі сацсетак заўважылі, як у гэтым інцыдэнце на 40-й хвіліне паказваў камусьці пальцамі лічбу два. Хтосьці мяркуе, што ён і тут нагадваў пра колькасць сваіх кубкаў Лігі чэмпіёнаў:

MVP матча стаў Энца Фернандэс, а напрыканцы пры 4:1 хаўбек таксама дазволіў сабе канфрантацыю – парадыраваў абаронцу Бразіліі Орціса:

Аргенціна лёгка справілася нават без Месі – для яе матчы з Бразіліяй ужо становяцца прахаднымі

Нагадаем, што гэтае акно зборных Аргенціна праводзіць без траўмаванага Ліянеля Месі. Хаця іх склад усё роўна выглядаў магутна:

У бразільцаў вылучаецца хіба што лінія нападу, якая ў выніку ніяк сябе не праявіла:

Ад супертопаў да гульцоў «Аль-Насра» і «Вулвз» – як змянілася зорнасць складу Бразіліі за 20 гадоў

Разгром пачаў Хуліян Альварэс, потым былі гол+пас ад Энца, а кропку на 71-й паставіў сын Сімеонэ – супернік адказаў толькі голам Куньі.

Цяпер у Бразіліі чатыры паразы і нічыя ў апошніх пяці сустрэчах з Аргенцінай з адным забітым мячом: 0:1, 0:1, 0:0, 0:1, 1:4. Чатыры мячы каманда прапусціла ў кваліфікацыі ЧС упершыню ў сваёй гісторыі.

Хуліян Альварэс пасля свістка затроліў бразільцаў – сказаў, што з Месі паклалі б яшчэ больш. А вось Вінісіус папрасіў прабачэння ў фанаў і выказаў занепакоенасць станам зборнай:

💬 «Мы згулялі вельмі дрэнна, а Аргенціна – выдатна перад сваімі фанамі. Трэба пераасэнсаваць усё, што мы зрабілі. Такое не можа здарацца. Трэба ўдасканальвацца і не здавацца – да чэмпіянату свету застаўся год».

Праўда, на ЧС Бразілія пакуль афіцыйна не выйшла – ідзе 4-й у табліцы адбору:

Каманду чакана раскрытыкавалі на Бацькаўшчыне, больш за ўсё пастараліся СМІ – прыраўнялі гэты вынік да паразы ад Германіі 1:7 на ЧС-2014. Экс-футбаліст Дэнілсан таксама не змаўчаў:

💬 «Я адчуваю вялікі сорам, таму што гэта першы раз, калі я бачу зборную такой… Ганебна для заўзятараў, для федэрацыі, ганебна для трэнера (Дарывал Жуніяр), для футбалістаў».

***

У аргенцінцаў супрацьлеглыя эмоцыі. У сетцы завірусіўся задаволены твар коўча Ліянеля Скалоні на апошняй хвіліне матча:

Фота: Alejandro Pagni/Alamy Live News