Брата Белінгема ўжо хочуць клубы топ-ліг – куды можа перайсці Джоб
Пакуль 19-гадовы паўабаронца выступае ў Чэмпіёншыпе.
У Чэмпіёншыпе засталося згуляць усяго сем матчаў да канца сезона. Назіраць за барацьбой за месцы ў топ-2 і топ-6 (каманды з 3-га па 6-е згуляюць у плэй-оф) заўсёды цікава. Сярод прэтэндэнтаў на павышэнне – «Сандэрленд», у складзе якога гуляе Джоб Белінгем, брат паўабаронцы мадрыдскага «Рэала» Джуда.
Пакуль каманда Джоба ідзе чацвёртай – практычна без шанцаў зачапіцца за другое ці трэцяе месца (адставанне ў 9 пунктаў). Аднак «Сандэрленд» можа не турбавацца за свой удзел у плэй-оф – адрыў ад сёмага месца складае 15 пунктаў.
У матчах за права атрымаць трэцюю пуцёўку ў АПЛ «каты» будуць змагацца не толькі за месца сярод наймацнейшых клубаў Англіі, але і, хутчэй за ўсё, за Джоба Белінгема. 19-гадовы футбаліст летам мінулага года працягнуў кантракт з клубам да 2028-га, аднак ужо стаў трансфернай мэтай самавітых клубаў з топ-5 ліг Еўропы.
Заўсёды выходзіць у старце «Сандэрлэнда», стаў асноўным у моладзевай зборнай Англіі
Джоб – універсальны гулец цэнтра поля. У гэтым сезоне ён гуляў на пазіцыі апорніка (17 матчаў), цэнтральнага паўабаронцы (14 матчаў) і нават атакавалага паўабаронцы (4 матчы). Запісаў на рахунак 4 галы і 3 асісты, але гульцоў яго пазіцыі варта ацэньваць не толькі па сістэме «гол+пас», але і па ўплыве на гульню падчас матчаў.
З падрабязнай статыстыкай Джоба вы можаце азнаёміцца ў яго профілі на Tribuna.com.
Напрыклад, ён першы ў камандзе па працэнце дакладных перадач без уліку брамнікаў і абаронцаў (85), а таксама першы сярод паўабаронцаў па колькасці нанесеных удараў (праўда, над дакладнасцю трэба яшчэ папрацаваць – усяго 18 працэнтаў трапленняў у створ). Белінгем з'яўляецца важным элементам «Сандэрленда» – ва ўсіх матчах гэтага сезона ён выходзіў выключна ў стартавым складзе.
Таксама на рахунку Джоба ўжо 4 матчы за моладзевую зборную Англіі – там ён ужо стаў асноўным, пачаўшы тры сустрэчы з першых хвілін. У нядаўнім таварыскім матчы супраць аднагодкаў з Партугаліі вызначыўся першым галявым дзеяннем за каманду — аформіў асіст на Ітана Нванэра, выступаючы на пазіцыі цэнтральнага паўабаронцы.
На рашэнне Джоба пакінуць «Сандэрленд» можа паўплываць фінансавае пытанне. Па звестках сайта Capology, у клубе Чэмпіёншыпа паўабаронца зарабляе 650 тысяч фунтаў у год – і не ўваходзіць нават у топ-5 самых высокааплатных гульцоў каманды. Для параўнання Джуд у «Рэале» зарабляе 660 тысяч усяго за два тыдні.
Партал Transfermarkt ацэньвае Джоба ў 22 мільёны еўра — прыкладна столькі ж «Сандэрленд» хоча атрымаць за сваю зорку.
Хто цікавіцца Джобам Белінгемам
Мы сабралі апошнія чуткі, але тут важна ўлічваць – не ўсе крыніцы маюць добрую рэпутацыю.
Да ненадзейных крыніц сапраўды нельга аднесці журналіста Sky Sports Фларыяна Платэнберга. Ён паведаміў, што нямецкі «Лейпцыг» ужо правёў першыя перамовы пра магчымы трансфер паўабаронцы. Клуб з Бундэслігі сур'ёзна зацікаўлены ў ім, сабраў усю неабходную інфармацыю, але пакуль лічыць цэннік занадта высокім.
Магчыма, гэтае пытанне ўдасца ўладзіць падчас летніх перамоваў. У 2020-м яго брат Джуд перайшоў з «Бірмінгема», які на той момант таксама выступаў у Чэмпіёншыпе, у дортмундскую «Барусію» за 30 млн еўра. Прычым Белінгему-старэйшаму ў той момант было ўсяго 17.
Гэта была б добрая гісторыя, калі б дортмундцы раскрылі свету адразу двух братоў. Нямецкая каманда сачыла за прагрэсам паўабаронцы цягам многіх гадоў і лічыць, што ён можа мець такі ж патэнцыял, як і старэйшы брат.
Навіны пра сур'ёзную цікавасць з боку «Барусіі» з'явіліся яшчэ ў лістападзе, а нядаўна дортмундскі клуб ізноў звязалі з імем Джоба. Інфармацыю паведаміў той жа Фларыян Платэнберг са Sky Sports.
Выданне, якое паведамляе пра цікавасць манкуніянцаў, не такія надзейныя, але іх адразу два – UtdDistrict і TEAMtalk. Першыя чуткі, якія злучаюць МЮ і Джоба, з'явіліся ў канцы снежня, а нядаўна інфармацыя зноў усплыла ў стужках навін.
Сцвярджаецца, што за 19-гадовым англічанінам скаўты «Манчэстэр Юнайтэд» пачалі сачыць яшчэ пасля таго, як камандзе не ўдалося падпісаць Джуда Белінгема. Пытанне ў тым, ці сапраўды ў Манчэстэры лічаць, што Джоб ужо гатовы ўносіць уклад у прагрэс каманды. Або глядзяць на перспектыву?
Патрапіць з Чэмпіёншыпа ў Лігу чэмпіёнаў (ніхто ж не сумняваецца, што «Форэст» фінішуе ў топ-5 АПЛ?) – гэта быў бы імклівы скачок. Тое ж выданне TEAMtalk паведамляе, што ў клубе сур'ёзна настроеныя набыць гульца, нягледзячы на канкурэнцыю.
Нядрэнны варыянт, улічваючы, што ў складзе Нотынгема не так шмат зорных гульцоў, а Нуну ў гэтым сезоне раскрыў таленты футбалістаў, якія не дацягвалі да топ-клубаў па сваім узроўні.
Яшчэ адзін нядрэнны варыянт для таго, каб пераход не закруціў галаву маладому паўабаронцу. Пра цікавасць з боку «арлоў» паведаміла выданне talkSPORT яшчэ ў студзені. Англічанін з'яўляецца доўгатэрміновай мэтай «Пэлас», у клубе хацелі падпісаць яго яшчэ падчас зімовага трансфернага акна.
Прыклад Адама Уортана, які перайшоў у «Крыстал Пэлас» з Чэмпіёншыпа, а затым атрымаў выклік у зборную Англіі, павінен прымусіць Джоба разгледзець гэты варыянт.
Тут удакладнім адразу – крыніцай інфармацыі з'яўляецца выданне The Sun, якое славіцца сваімі «інсайдамі». Яно сцвярджае, што «Чэлсі» ўключыўся ў гонку за падпісанне Джоба. Таксама паведамляе, што Белінгем пакіне клуб, калі «Сандэрленд» не зможа атрымаць пуцёўку ў АПЛ.
Але ў такі пераход не вельмі вераць нават былыя гульцы «сініх». Да прыкладу, Эмануэль Пеці сцвярджае, што хлопцу яшчэ рана выходзіць на такі ўзровень: «Я вельмі паважаю Джоба, але ён не гатовы гуляць за «Чэлсі». Гэта быў бы скачок на тры-чатыры прыступкі, ён выдатна гуляе ў «Сандэрлендзе», яго звязваюць з многімі топ-клубамі, але ён не падыдзе «Чэлсі».
Пра цікавасць да Джоба ў канцы студзеня паведаміў Экрэм Конур, чые інсайды спраўджваюцца далёка не кожны раз. Пакуль размова ідзе толькі пра разгляд кандыдатуры Белінгема на дадаванне ў спіс трансферных мэт на лета-2025.
***
Як лічыце, які з клубаў пасуе Джобу Белінгему найбольш у плане развіцця кар'еры?
Фота: Tiff Barber/Global Look Press, Moritz Mueller/Global Look Press, «Сандерленд»
Іншыя пасты карыстальніка
