«Тарпеда-БелАЗ» – адна з найбагацейшых каманд ЧБ, але фантастычна панылая. Нібыта выправіліся, а цяпер ізноў
Трэба пастарацца, каб не заснуць.
«Тарпеда-БелАЗ» – адно з галоўных расчараванняў на старце футбольнага сезона ў Беларусі. Канешне, брэсцкае «Дынама» з Аляксандрам Сяднёвым тут цяжка дагнаць, але жодзінцы далібог стараюцца. У трох турах чэмпіянату яны ні разу не перамаглі, а ў Кубку прайшлі той самы Брэст дзякуючы ўсяго толькі аднаму мячу ў двух матчах (0:0, 1:0).
Галоўная праблема падапечных Дзмітрыя Молаша – галы. Агулам у сезоне-2025 Іх забіта ўсяго два: апроч брастаўчан удалося засмуціць «Гомель» пасля кутняга ў 1-м туры (1:1). Далей былі сумныя нулі з чэмпіёнам мінула ЧБ мінскім «Дынама» і «Слуцкам», які зорак з неба не хапае. Адзін гол жодзінцаў у ЧБ – гэта на ўзроўні перадапошняй «Смаргоні», апошняга «Маладзечна» і мінскага «Дынама», у якога на гульню меней праз завіруху падчас сустрэчы з «Нёманам».
Атрымліваецца нейкі дысананс: з найдаражэйшым складам у лізе (6,15 мільёнаў віртуальных еўра паводле Transfermarkt), вялікай трансфернай кампаніяй (11 навабранцаў) і добрымі вынікамі ў міжсезонне – і гэткая галявая паныласць! Пэўнае тлумачэнне феномену навідавоку.
За тры дні да старту вышэйшай лігі «Тарпеда-БелАЗ» страціла свайго найлепшага бамбардзіра ў сезоне-2024 (15+1 ва ўсіх турнірах) Максіма Скавыша. 35-гадовы нападнік траўмаваўся на роўным месцы: падчас трэнінгу адчуў дыскамфорт, які аказаўся надрывам ікраножнай цягліцы – 3 красавіка форвард пачаў індывідуальныя заняткі. Паводле інфармацыі Tribuna.com, паўнавартаснае вяртанне можа зацягнуцца і на месяц.
У міжсезонне Жодзіна актыўна ўзмацняла склад – але толькі не пазіцыю цэнтральнага нападніка. Там пасля сыходу Дзяніса Лапцева, Андрэя Кобеца і арандаванага Станіслава Рубана Скавыш стаўся адзіным выбарам. Цяпер жа, калі ён траўмаваўся, ролю цэнтрфорварда даводзіцца выконваць намінальнаму вінгеру Ілле Васілевічу і арандаванаму з маскоўскага «Тарпеда» атакаваламу паўабаронцу Мамаду Камара.
Абодва за сваю кар'еру гулялі нападнікаў, але пакуль атрымліваецца не вельмі. З Васілевічам, які атрымлівае часу менш за малійца, зусім няма хайлайтаў у аглядах матчаў, а Камара свае моманты губляе. Хаця, з іншага боку, іх вельмі цяжка назваць стоадсоткавым.
У нулявым матчы з «Дынама» афрыканец спрабаваў замкнуць прастрэл, але пазіцыя была ну вельмі няпростай.
Пры гэтым выхадзе легіянеру відавочна не хапіла спрыту, але яго даганяў абаронца.
У матчы з «Гомелем» прыгожы стрэл Камары з левай не менш эфектна пацягнуў брамнік Станіслаў Кляшчук.
У матчы са «Слуцкам» Камара біў з вострага кута ў барацьбе – і было б дзіўным, каб гэтая спроба аказалася паспяховай.
Пакуль што стаўка Молаша на паўабаронцаў як форвардаў не працуе. Але ў каманды з гэтым трэнерам не ўпершыню ўзнікаюць праблемы з выніковасцю.
У сезоне-2022, дэбютным для Молаша ў Жодзіна, «аўтазаводцы» скончылі 30 тураў на 8-м месцы з 35 забітымі мячамі (1,16 гола ў сярэднім за гульню) – 11-ы паказнік па лізе.
У наступны год «Тарпеда-БелАЗ» стала трэцім, але зноў з сумным галявым паказнікам: 33 мячы за 28 тураў, то бок 1,17 у сярэднім за матч (9-ы паказнік пры 15 калектывах у лізе). Амаль палову матчаў (13 з 28) таго чэмпіянату «аўтазаводцы» скончылі ўнічыю (з іх пяць разоў 0:0 і сем 1:1). Гучыць як пекла для заўзятара.
Выбіваецца з шэрані сезон-2024, дзе «Тарпеда-БелАЗ» ізноў жа заваявала бронзу ды яшчэ ўвайшло ў топ-3 лігі па колькасці забітых мячоў – 45 за 30 матчаў. Траціну з іх аформіў Скавыш. Больш забілі толькі брэсцкае «Дынама» (62) ды мінскае (50), а ў «Нёмана» таксама было 45. Але клубнае кіраўніцтва тады паляпшэннем галявой сітуацыі не цешылася. Хадзілі чуткі пра магчымае звальненне Молаша, бо цэлілі на ўсе ўнутраныя трафеі, а ўзялі толькі Суперкубак.
Цяпер «Тарпеда-БелАЗ» ізноў рухаецца са скрыгатам – без галоў каманда ідзе ажно 13-й у ЧБ – пры Молашу горш было толькі ў сезоне-2022, калі стартавалі ўвогуле з трох параз.
Іншыя пасты карыстальніка
