Дрэды Кундэ дапамаглі «Барселоне» пачаць разгром «Барусіі» – няўдала сфаліў яшчэ адзін валасацік
Сапраўдная бітва прычосак.
Чвэрцьфінал Лігі чэмпіёнаў прынёс гледачам іспана-нямецкае супрацьстаянне. «Барселона» і «Барусія» вырашаюць паміж сабой, хто з іх годны таго, каб крочыць далей за вушастым трафеем. Каталонцы на «Мантжуіку» забяспечылі сабе такі вынік, пасля якога ўжо не выпадае пераймацца за матч у Дортмундзе. «Блаўгранас» амаль адразу наваліліся на вароты Кобеля, але першы гол прыйшоў са стандарту. А фол, які дапамог іспанскаму гранду вызначыцца, атрымаўся даволі смешным.
На 23-й хвіліне Карым Адэемі спрабаваў перакуліць мяч праз Жуля Кундэ.
Перайграць свайго візаві немцу не ўдалося, але гулец «Барусіі» рабіў усё магчымае. Левы вінгер, які сам носіць шыкоўную шавялюру, схапіў француза за дрэды.
Кундэ амаль адразу ўпаў, а суддзя ўзнагародзіў Карыма за такія дзеянні жоўтай карткай.
Жуль быў вельмі абураны.
Аднак праз некалькі імгненняў яму заставалася толькі падзякаваць Адэемі. Падача ў штрафную – і, нарэшце, Рафінья заносіць мяч у вароты «чмялёў»!
Валасы Жуля Кундэ дапамаглі пакласці пачатак разгрому гасцей. «Барусія» атрымала 0:4. У гэтым годзе чакаць яе ў фінале ЛЧ наўрад ці выпадае.
Крыніца: Megogo
Іншыя пасты карыстальніка
