Шкурыну адшукалі двайніка ў Польшчы – той таксама выступае на стадыёнах

Шмат беларусаў з нецярпеннем чакала першы гол Іллі Шкурына за «Легію». Здарыўся ён у сёмым матчы за варшаўскі клуб – у паўфінале Кубка Польшчы беларус дабіў «Рух» з Хожува (5:0). Да гола аказалася не гатовая прэс-служба «Легіі», якой спатрэбіўся дадатковы час, каб зрабіць адпаведную пікчу для сацыяльных сетак:

Шкурын перапыніў галявую засуху з 11 матчаў: заспеў знянацку прэс-службу «Легіі», але пацешыў партнёраў і заўзятараў

Першаму мячу Шкурына радаваліся не толькі беларусы, але і яго партнёры па «Легіі», і польскія заўзятары клуба. Некаторыя з іх пад пастом пра гол беларуса сталі жартам пісаць, што вызначыўся Давід Падсядла – папулярны ў нашых суседзяў музыка.

«Калі Падсядла стаў гуляць у «Легіі»?»

«Падсядла з голам, брава»

Падабенства сапраўды ёсць:

Давід Падсядла – адзін з самых папулярных музыкаў у Польшчы. На YouTube яго кліпы збіраюць дзясяткі мільёнаў праглядаў. Самыя папулярныя – Małomiasteczkowy (58 мільёнаў), mori (52 мільёна), Nie Ma Fal (49 мільёнаў), W Dobra Strone (47 мільёнаў), Pastempomat (40 мільёнаў). На Spotify адразу сем яго трэкаў пераваліла за 50 мільёнаў праслухоўванняў, а самы папулярны называецца «I ciebie też bardzo» (90+ мільёнаў праслухоўванняў).

Падсядле 31 год. Нарадзіўся ў прамысловым горадзе Дамброва-Гурніча на Поўдні Польшчы. Там у 2010-м разам з сябрамі заснаваў рок-гурт Curly Heads, у якім стаў вакалістам. У 2011-м калектыў удзельнічаў у праслухоўванні на польскім «Шоў талентаў», аднак у першым раўндзе журы хацела ўзяць далей толькі Падсядлу. Вакаліст не пагадзіўся ісці далей без сяброў.

У 2012-м Падсядла ўжо самастойна ўдзельнічаў у польскім Х-Faktor і стаў пераможцам. Гэта стала паваротным момантам у кар'еры – акрамя славы і грошай, як пераможца ён атрымаў кантракт на запіс альбома з буйным брытанскім лэйблам Syco Music. Падсядла шанцам скарыстаўся – у 2013-м выпусціў першы альбом Comfort and Happiness, які стаў самым прадаваным у Польшчы за той год.

У 2015-м музыка выпусціў альбом Annoyance and Disappointment, у 2018-м Małomiasteczkowy і ў 2022-м Lata dwudzieste. Усе чатыры ў гады выхаду былі топ-1 па продажах і за кожны артыст атрымаў алмазную кружэлку – узнагароду, якая прысуджаецца за продаж 150+ тысяч экзэмпляраў.

Нейкі час Падсядла яшчэ працягваў выступаць з Curly Hearts. У 2014-м гурт выпусціў англамоўны альбом Ruby Dress Skinny Dog, які атрымаў статус залатога (15+ тысяч прададзеных копій). Нягледзячы на ​​поспех, вакаліст у інтэрвʼю рабіў уражанне даволі сціплага чалавека: «Залаты дыск і канцэрты, якія прыцягваюць вялікую цікавасць, – гэта поспех. Бо яшчэ зусім нядаўна мы даплачвалі за магчымасць граць у пабах Сасноўца, а сёння ў нас ёсць кружэлка, вокладка, буклет, канцэртны тур і мы працуем з прафесіяналамі. Ці можа быць большы поспех для школьнай групы?»

У Падсядлы ёсць яшчэ адно крутое дасягненне. Яго сольны канцэрт у жніўні 2023-га стаў самым буйным, які прымаў «Нарадовы» – галоўны стадыён Польшчы, дзе гуляе нацыянальная зборная. На тое мерапрыемства сабралася каля 80 тысяч чалавек. У гэтым рэйтынгу паляк абыходзіць Эда Шырана (75 тысяч у жніўні 2022-га), The Weeknd (62 007 чалавек у жніўні 2023-га), Coldplay (57 574 чалавек у ліпені 2022-га) і многіх іншых. Дарэчы, у гэты рэйтынг сёлета можа заляцець Макс Корж. Беларус плануе даць канцэрт 9 жніўня, усе квіткі былі распрададзеныя за пяць дзён.

У Падсядлы не толькі знешняе падабенства са Шкурыным. Паляк хоць і дае інтэрв'ю значна часцей за беларуса, але пра сваё прыватнае жыццё не гаворыць. На гэты момант вядома, што вакаліст не жанаты, але польскія СМІ пішуць, што ён сустракаецца з мясцовай актрысай Марыяй Дэнбскай.

Цікава, што калі Падсядла жыў у Варшаве, ён наведваў матчы «Легіі»:

Аднак сёння музыка жыве ў Празе – не адным з раёнаў Варшавы, а сталіцы Чэхіі. Таму за гульнёй беларускага двайніка ён можа сачыць хіба што па тэлевізары.