Нядаўна Чалядзінскі думаў даверыць Гутару біць пенальці, а цяпер можа і аштрафаваць – брамнік робіць шмат дурнога

«Мінск» добра стартаваў у сёлетнім сезоне: па выніках чатырох тураў забраўся на трэці радок з сям'ю пунктамі ў актыве. Для параўнання: у мінулым чэмпіянаце па выніках першага кола каманда Арцёма Чалядзінскага мела ўсяго пяць балаў.

Тады галоўны трэнер тлумачыў правальны вынік недахопам дасведчаных футбалістаў – і летам яму падпісалі некалькіх ўзроставых гульцоў, у тым ліку Аляксандра Гутара. 35-гадовы брамнік прыйшоў у канцы чэрвеня, адразу стаў асноўным, а з трэцяй гульні яшчэ і атрымаў павязку капітана. У выніку Гутар згуляў ва ўсіх астатніх 17 матчах сезона ЧБ-2024 (прапусціў 20 мячоў, правёў чатыры матчы на ​​нуль, зрабіў 13 сэйваў), дапамог «Мінску» фінішаваць на бяспечным 13-м радку. А яшчэ палепшыў сваё дасягненне па «сухарах» у ЧБ – на сёння мае іх 120 у 253 гульнях. Больш толькі ва Уладзіміра Бушмы – 140 разоў у 344 сустрэчах. Чалядзінскі быў задаволены гульнёй Гутара і ў нейкі момант нават выказваў гатоўнасць даверыць таму выкананне пенальці, але да гэтага пакуль не дайшло.

Зімой Гутар працягнуў кантракт з «Мінскам» на сезон, перанёс невялікую аперацыю, і ў цяперашнім чэмпіянаце працягвае выводзіць «гараджан» на поле як капітан. Праўда, да дзеянняў брамніка за чатыры гульні назбіралася шмат пытанняў.

Ужо ў матчы адкрыцця ЧБ Гутар пусціў «матылька» ад «Нафтана» (1:2). Мяч нібыта ляцеў у яго, але здарылася нешта цяжка вытлумачальнае.

Далей была пераможная гульня з «Віцебскам» (2:1). Адзіны мяч «паўночнікі» забілі са стандарту, падчас якога, здаецца, Гутар страціў вароты. У любым выпадку дзейнічаў ён нягегла:

У трэцім туры «Мінск» згуляў унічыю з «Іслаччу» (1:1). Наконт гола да Гутара пытанняў няма. Аднак у канцоўцы галкіпер мог падарыць перамогу «ваўкам» – пасля не самага складанага ўдару Яўгена Юдчыца Гутар ледзь не адбіў мяч у свае вароты – той ударыўся ў перакладзіну, пасля чаго брамнік усё ж зафіксаваў яго рукамі.

У чацвёртым туры «Мінск» перамог «Маладзечна» (3:2). «Гараджане» двойчы прапусцілі з пенальці, таму прэтэнзіі Гутару тут складана прад'яўляць, тым больш ён абодва разы адгадаў напрамак удару. Але пытанні выклікаюць паводзіны кіпера пасля першага прапушчанага мяча – ён чамусьці накінуўся на Максіма Будзько, які толькі забіў і хацеў хутчэй даставіць мяч да цэнтра. Прычым зрабіў гэта жорстка – паваліў форварда «Маладзечна» ў сетку, хапаў за галаву. Галоўны арбітр Сяргей Сцяцурын за гэта паказаў Гутару жоўтую картку.

Для брамніка гэта другое папярэджанне ў сёлетнім чэмпіянаце. Першае ён атрымай у гульні з «Віцебскам» за размовы з арбітрам, прычым у шараговай сітуацыі – пасля нягрубага фолу гульца «Мінска» недалёка ад цэнтра поля.

Пасля гульні з «Маладзечна» пытанне дысцыпліны ўзняў Чалядзінскі – ад пачатку чэмпіянату футбалісты «Мінска» назбіралі 14 папярэджанняў. Трэнер адзначыў, што адна справа – картка, атрыманая ў адзінаборствах, іншая – за неспартыўныя паводзіны. «Натуральна, футбаліст павінен разумець і за гэта несці нейкую адказнасць. Але калі ён гэтага не разумее – значыць унутры нашай каманды будуць нейкія санкцыі ў адносінах да яго», – дадаў Чалядзінскі.

Гутар тут адзін з галоўных прэтэндэнтаў на санкцыі ўнутры каманды.