Унікальная з'ява ў Д2 Беларусі: людзей на трыбунах быццам бы вобмаль – затое лічбы ў пратаколах ого-го якія!
І нават з такімі цудамі наведвальнасць прасядае.
Пра другі па моцы футбольны дывізіён Беларусі мы ведаем, што гэта турнір не для гледачоў. Сярэдняя наведвальнасць матчаў ужо дзесяць гадоў не пераадольвала адзнаку хаця б у 500 чалавек, а мінулы сезон стаў найгоршым з кавідных часоў.
На гульнях першай лігі-2024 у сярэднім збіраліся 322 чалавекі. Паказнік цяперашняга чэмпіянату пасля 4-х тураў неістотна перасягае гэту лічбу – 340. Але нават такая наведвальнасць атрымалася ў выніку анамалій. Глядзім падрабязней.
Паводле афіцыйных пратаколаў, рэкордная на сёння наведвальнасць у першай лізе-2025 зафіксаваная ў «Баранавічаў». На хатні матч каманды ў 1-м туры супраць «Слоніма» (1:2) нібыта сабралося 2000 гледачоў пры ўмяшчальнасці стадыёна 2998 чалавек – то бок ён мусіў быць запоўнены на дзве траціны.
Паводле фотаздымкаў з матчу, на адкрыццё сезона сапраўды прыйшло шмат людзей як для Д2. Мабыць, і тысяча была. Але ці дзве?
Для параўнання, вось як выглядаў поўны стадыён падчас яго адкрыцця ў 2022 годзе пасля рэканструкцыі.
Другое і трэцяе месца ў топе наведвальнасці Д2 гэтага года займаюць адразу два матчы пінскай «Хвалі». Паводле пратаколаў, мясцовы стадыён у 1-м туры з «Лідай» (3:2) быў запоўнены амаль напалову – 1250 гледачоў пры ўмяшчальнасці 3136 (40%).
Людзей на трыбуне, якая насупраць камеры транляцыі, перад самым пачаткам матчу можна было пералічыць па пальцах. Але з часам гледачы падцягнуліся.
На асноўнай трыбуне людзі месціліся бліжэй да цэнтру. А вось па краях можна назіраць процьму свабодных месцаў. У сукупнасці, да 40 адсоткаў запаўняльнасці гэта неяк непадобна.
Матч 3-га тура, у якім «Хваля» гуляла са «Слонімам» (3:1), нібыта сабраў яшчэ больш – 1280 чалавек. Гэтым разам на трыбуне, што насупраць камеры трансляцый, цягам усяго матчу амаль нікога не было.
На асноўнай трыбуне, зноў жа, усе месціліся бліжэй да цэнтру, а бакі былі незапатрабаваныя. Ёсць 1280?
Апошні стадыён, які быццам бы прабіў 1000 гледачоў у гэтым Д2, – магілёўскі «Спартак». Паводле пратакола, на першым хатнім матчы «Дняпра» супраць «Асіповічаў» (3:2 у 2-м туры) сабралося 1150 чалавек. У працэнтных адносінах гэта мала – усяго 15% ад арэны на 7350 месцаў. Але падобна, што і тут не ўсё адназначна.
Трыбуны насупраць камеры і па баках былі пустымі.
Акей, магчыма, усе 1150 пратакольныя гледачы сядзелі на трыбуне пад дашкам. Спачатку згадаем, як яна выглядае.
А цяпер фотасправаздача з таго матчу ў афіцыйнай суполцы «Дняпра». Пабачыць тысячу, шчыра кажучы, складана.
Не паверылі ў заяўленую колькасць гледачоў і аўтары Telegram-каналу «Белорусский Минор», дадаўшы яшчэ некалькі ракурсаў.
На наступным хатнім матчы «Дняпра» (2:1 супраць АБФФ U-19 у 4-м туры) наведвальнасць была больш сціплай – усяго 660 чалавек. Што цікава, трыбуны выглядалі прыкладна гэтак жа, як і на сустрэчы з уяўнымі 1150 гледачамі.
Іншыя пасты карыстальніка
