Ад «КраСавы» ў «МЛ» з’ехаў іспанец з працай у Індыі ды Танзаніі – у Беларусі ўразіўся лёдам (не на хакеі) ды нават у цырк схадзіў
Раней быў памочнікам у Лукi.
Іспанцы ў белфутболе – гэта не нешта новае. Тым больш трэнеры: першаадкрывальнікам даўно стаў БАТЭ, зараз яны ёсць у дзвюх зборных.
У лютым 2025-га дадаўся яшчэ адзін – 36-гадовы Мікель Гільен стаў трэнерам па фізпадрыхтоўцы ў «МЛ Віцебск». Цяпер коўч кажа, што гульцы клуба знаходзяцца «на ўзроўні 60-65 працэнтаў фізічных здольнасцяў». Што, зрэшты, не перашкодзіла выдатна стартаваць у ЧБ.
Гільен нарадзіўся і вырас у іспанскай Сарагосе, дзякуючы чаму з дзяцінства ведаў аднаго беларускага гульца. Калі будучаму трэнеру было 12 гадоў, у «Сарагосу» на паўсезона заехаў Сяргей Гурэнка – у Ла Лізе згуляў 11 разоў, а яшчэ ўдзелам у чатырох матчах, у тым ліку двух паўфіналах і фінале, дапамог клубу выйграць Кубак Іспаніі-2000/01. Цяпер Гільен называе Гурэнку «легендарным у мінулым футбалістам».
У самога іспанца не было гульнявой кар’еры. Пасля школы ён скончыў універсітэт па фiзкультурнай спецыяльнасцi і ўжо ў 22 гады стаў коўчам у сістэме «Сарагосы». Пасля сезона там пачаў змяняць каманды іспанскага мінора ў якасцi трэнера па фізпадрыхтоўцы, на якой да гэтага часу спецыялізуецца. А ў 2017-м з’ехаў у Індыю – тры гады правёў у «Бенгалуру».
Першую палову 2021-га Гільен працаваў у румынскім «Дынама» Бухарэст, які ледзь выратаваўся ад вылету з Д1. А ў верасні таго ж года ўліўся ў трэнерскі штаб Ліясаса Лукі ў кіпрскім «Арысе», які да таго моманту вярнуўся ў Д1 Кіпра і перайшоў пад кантроль фармальна беларускага бізнесмена Уладзіміра Фёдарава. Але ўсё было больш заблытана. Цяпер тыя ж, хто за «Арысам», стаяць і за «МЛ».
У студзені 2022-га «Арыс» заключыў кантракт з падпісантам за рэжым Яўгенам Яблонскім, але з ім Гільен папрацаваў зусім няшмат – пасля пятага месца па выніках двух колаў чэмпіянату ў лютым «Арыс» растаўся са штабам Лукі, якога замяніў беларускі трэнер Аляксей Шпілеўскі.
Далей Гільен зноў абраў вельмі экзатычны варыянт – пяць месяцаў прапрацаваў у «Азаме» з чэмпіянату афрыканскай Танзаніі. У 2023-м былі чатыры месяцы ў «Аудзе» з Д1 Латвіі. А затым іспанец вярнуўся на Кіпр – зноў далучыўся да штаба Лукі, але ўжо ў АЕЗ з Д2.
У лютым 2024-га разам з шэфам Гільен перайшоў у іншую каманду лігі – «Фрыдам 24 – Красава – Іпсонас», якую ў 2022-м выкупіў са зменай назвы расійскі блогер Яўген «КраСава» Савін. Былы футбаліст пасля інтэрв’ю з украінскімі калегамі пра вайну ва Украіне, якая працягваецца Расіяй, атрымаў у Расіі крымінальную справу за «дыскрэдытацыю арміі». Клуб жа на днях выйграў Д2 пад кіраўніцтвам Лукі. Гільен зрабіў свой унёсак у першай палове сезона, пакінуўшы каманду ў студзені 2025-га.
Гільена распавядаў, што, атрымаўшы прапанову ад «МЛ Віцебска», маўляў, «пачуў пра мэты клуба, зразумеў, што там працуюць сапраўдныя прафесіяналы, і вельмі хутка пагадзіўся». Але, калі ўспомніць, што «МЛ» дэ-факта звязаны з «Арысам», то нават экзатычным для іспанца беларускі варыянт асабліва не назавеш.
Гільен актыўна вядзе свой інстаграм, у якім расказвае пра свае паездкі па свеце, якія здараюцца не толькі праз працу. Для кожнай краіны, як і для кожнага клуба, ў сторыс заведзены спецыяльны раздзел – там ужо ёсць «МЛ» і Беларусь, пазначаная дзяржсцягам.
У інтэрв’ю Гільен расказваў, што ён, калі прыязджае ў новую краіну, стараецца «максімальна ўвабраць у сябе ўсё, што акружае, зразумець мясцовую культуру». I па Беларусі іспанец за пару месяцаў ужо паспеў крыху паездзiць. Так, найбольш кантенту – з Мiнска, дзе дэ-факта базуецца дэ-юрэ вiцебскi клуб. Напрыклад, трэнер пагуляў па вулiцы Камсамольскай у цэнтры сталiцы.
Любаваўся відамі Верхняга горада на Нямізе.
Але i ездзіў у Мірскі замак.
I недзе сярод леса катаўся на квадрацыклах.
Схадзіў туды, куды ў мiнулых краінах трапіць было б, напэўна, складана – на хакей, канкрэтна на матч мінскага «Дынама» супраць «Лады» (4:2) на пачатку сакавіка. Той паядынак быў прысвечаны рэжымным сілавікам у гонар так званага «дня міліцыі».
Пабываў іспанец і на Мінскім моры, на якім уразіўся халоднаму пляжнаму пяску.
І ўпершыню ў жыцці прайшоўся па замерлым вадаёме.
Гільен нават завітаў у цырк, падпiсаўшы сторыс: «Новы беларускі досвед». Хаця, як той казаў, хто бачыў беларускi футбол, той у цырку не смяецца.
У Беларусь трэнер прыехаў са сваёй дзяўчынай Андрэа Нова.
Разам яны хадзілі палётаць у аэратрубе.
А яшчэ ездзілі адпачываць на прыроду.
А дзе б вы параілі пабываць іспанцу?
Фота: Instagram mikelguillen
Іншыя пасты карыстальніка
