🔥 Покер у браму «Баавішты» вывеў Дзёкерэша ў лідары «Залатой буцы» – яго не спыняе і правіла аб каэфіцыентах
Прадстаўнік не топ-лігі апошні раз браў узнагароду ажно 23 гады таму!
На носе травень, у большасці ўнутраных чэмпіянатаў Еўропы засталося згуляць у сярэднім 3-4 туры, а значыць, мы набліжаемся да вызначэння ўладальніка «Залатой буцы».
Па выніках бягучага сезона ўзнагароду можа атрымаць незвычайны пераможца. Цяперака ў гонцы лідаруе нападнік «Спортынга» Віктар Дзёкерэш. 26-гадовы швед можа стаць першым з 2002 года гульцом не з класічнай пяцёркі топ-ліг Еўропы, хто заваюе гэты індывідуальны трафей.
У апошні раз гэта рабіў таксама прадстаўнік «Спортынга» – у сезоне 2001/02 бразілец Марыё Жардел настраляў за чэмпіянат 42 галы і другі раз у кар'еры атрымаў «Залатую буцу».
Цяпер яго сцяжынкай крочыць Дзёкерэш. У мінулыя выходныя ён падмацаваў намеры покерам у вароты «Баавішты», пераацаніць які немагчыма.
Справа ў тым, што «Спортынг» вядзе напружаную барацьбу за чэмпіёнства з «Бенфікай» – у абедзвюх каманд пакуль аднолькавая колькасць пунктаў (75), таму вырашальным паказнік з'яўляецца розніца галоў.
Паколькі ў суботу «Бенфіка» свой матч выйграла 6:0, «Спортынгу» было важна не адстаць. І бамбардзірскі талент Дзёкерэш тут вельмі дапамог. Розніца паміж камандамі – нейкія тры галы.
Віктар у гэтым розыгрышы – безапеляцыйны лідар бамбардзірскай гонкі партугальскага чэмпіянату. Ён апярэджвае нападніка той жа «Бенфікі» Евангеласа Паўлідзіса на 20 галоў!
А ў апошніх дзесяці матчах Дзёкерэш не забіваў толькі ў адным (!):
Таму нядзіўна, што з такімі паказнікамі швед супрацьстаіць нават найлепшым бамбардзірам з топ-ліг. Гэтыя чатыры мячы «Баавішце» дапамаглі абысці найлепшага скорара АПЛ Махамеда Салаха ў бягучым рэйтынгу «Залатой буцы» 2024/25.
А вось утрымаць гэтае лідарства – ужо задача з зорачкай.
Па-першае, Дэкерашу засталося згуляць менш гульняў, чым таму ж Салаху або трэцяму ў спісе Роберту Левандоўскаму (у якога, зрэшты, траўма). У «Спортынга» наперадзе тры сустрэчы чэмпіянату, у «Ліверпуля» – чатыры, а ў «Барселоны» – пяць.
Па-другое, сістэма падліку. За галы ў чэмпіянатах першай пяцёркі табліцы каэфіцыентаў УЕФА налічваюцца 2 балы, тады як галы ў чэмпіянатах, якія займаюць 6–22-е месцы, важаць 1,5 бала. То бок калі ў бліжэйшым туры Дэкераш і Салах заб'юць па два галы, яны ўжо параўняюцца ў рэйтынгу «Залатой буцы».
У такім выпадку вырашальным стане паказнік згуляных хвілін цягам сезона. Напрыклад, у Матэа Рэтэгі з «Аталанты» і ўладальніка «Залатой буцы» Хары Кейна з «Баварыі» цяпер аднолькавая колькасць балаў – па 48. Але прадстаўнік Серыі А знаходзіцца на пазіцыі вышэй, бо згуляў у бягучым сезоне на 212 хвілін менш.
Гэта мае значэнне, бо пры роўнасці пунктаў улічваецца, з якой часцінёй забіваюць нападнікі. Так, Рэтэгі ў гэтым сезоне забівае гол кожныя 86 хвілін, тады як Кейн – кожныя 95.
Як вы лічыце, ці атрымаецца ў Дзёкерэша захаваць лідарства і выйграць гістарычную «Залатую буцу»?
Фота: KodroMagazine, João Bravo/Keystone Press Agency
Іншыя пасты карыстальніка
