Як працуе той самы «суперкампутар», на прагнозы якога часта спасылаюцца
Разабраліся ў механіцы.
Часта на абшарах разнастайнага футбольнага кантэнту – ад сацсетак да «Трыбуны» – можна ўбачыць тыя ці іншыя прагнозы «ад суперкампутара». Амаль заўсёды яны датычацца рэсурсу Opta Analyst.
Opta Analyst дае даволі шмат розных прагнозаў па топ-лігах (АПЛ, Серыя А, Ла Ліга, Бундэсліга, Ліга 1), ЛЧ, 2-4 дывізіёнах Англіі і англійскай жаночай Суперлізе.
Як наконт вынікаў канкрэтных матчаў:
Так і па выніках чэмпіянатаў у цэлым:
Нейкага ўяўнага «суперкампутара», які «ведае», як скончыцца той ці іншы матч, відавочна, не існуе. Усё робіць алгарытм, які базуецца на аснове Opta Power Rankings (рэйтынг сілы клубаў).
Як працуе Opta Power Rankings
Opta Power Rankings – гэта распрацаваная кампаніяй сістэма, якая ацэньвае больш за 13 тысяч мужчынскіх футбольных клубаў і больш за 2 тысячы жаночых па шкале ад 0 да 100.
Грунтуецца яна на старым добра правераным рэйтынгу Elo – адзнацы, якую часта выкарыстоўваюць у багата якіх відах спорту (яе варыянт і ў рэйтынгу зборных ФІФА), фармуючы ў каманд пасля кожнага матча адзнакі на аснове базы даных з 2,5 млн матчаў з 1990 года.
Пасля кожнага матчу каманды «абменьваюцца» рэйтынгавымі пунктамі ў залежнасці ад выніку: тое, што атрымлівае адна каманда, яе супернік губляе. Напрыклад, калі адна каманда атрымала 5 пунктаў Elo, іншая іх страціць. Залежаць страты ад суадносін рэйтынгаў каманд-суперніц кожнага матча.
Асноўныя патэрны змен рэйтынгаў такія:
• Калі выйграе каманда з больш высокім рэйтынгам, абмен складзе менш балаў.
• Калі выйграе каманда з ніжэйшым рэйтынгам, абмяняецца больш балаў.
• Калі каманды згуляюць унічыю, некалькі балаў перападзе камандзе з меншым рэйтынгам.
• Чым больш розніца мячоў у матчы, тым большая колькасць балаў будзе абменьвацца.
Напрыклад, калі каманда А з рэйтынгам 2690 абгуляе 1:0 каманду Б з рэйтынгам 2350, то атрымае +2 пункты, а каманда Б – 2). Калі ж каманда Б абгуляе каманду А 5:0, то атрымае +37 пунктаў (а каманда А страціць 37). Такім чынам, калі гістарычна слабейшая каманда нечакана набірае ход, з часам яе рэйтынг падцягваецца да мацнейшых клубаў.
Аднак перад Opta была праблема – неабходнасць параўноўваць паміж сабой і клубы розных дывізіёнаў, краін і нават кантынентаў. Для гэтага ўжылі прынцыпы рэйтынгу Elo і да іншых узроўняў – так што фінальны рэйтынг Elo складаецца па формуле:
Канчатковы рэйтынг клуба = асабісты рэйтынг клуба + рэйтынг чэмпіянату + рэйтынг краіны + рэйтынг кантынента
Пры гэтым калі рэйтынг клуба мяняецца па выніках кожнага матча, іншыя рэйтынгі адпаведных узроўняў мяняюцца наступным чынам:
• толькі для найвышэйшага ўзроўню (напрыклад, для матчаў клубаў з двух розных кантынентаў змяняюцца толькі рэйтынг клуба і рэйтынг кантынента);
• толькі для непасрэдна ўцягнутых турніраў, краін або кантынентаў падчас асабістых сустрэч (напрыклад, для матчаў клубаў па АПЛ і Лізе 2 Англіі ў Кубку змяняюцца толькі рэйтынгі АПЛ і Лігі 2, без уплыву на Чэмпіёншып, Лігу 1 або Англію ў цэлым).
Пасля падсумоўвання фінальных рэйтынгаў Elo клубаў іх ператвараюць у Power Rankings: ужываюць рэйтынг 0 для найслабейшага клуба, 100 для найлепшага, астатніх размяркоўваюць прапарцыйна.
Па стане на 3 траўня наймацнейшым клубам па гэтай сістэме з'яўляецца «Ліверпуль» – усяго ў топ-10 увайшлі пяць англійскіх клубаў, а вылет «Рэала» з ЛЧ адкінуў каманду Анчалоці на восьмае месца.
Наймацнейшым клубам Беларусі проста цяпер па гэтай сістэме з'яўляецца мінскае «Дынама».
А «Шахцёр» выявіў недахоп рэйтынгу: паколькі клуб ужо не гуляе (таму што не існуе), яго рэйтынг застаецца нязменным – пытанне ўжо да самой Opta, чаму салігорцаў адтуль проста не выдалілі.
«Легія» Ілля Шкурына ў агульным топе знаходзіцца больш чым на 600 радкоў вышэй за мінскае «Дынама» (гэта другая па рэйтынгу каманда Польшчы).
А вось ЦСКА Сафія Лапавухава ўжо мае не такі значны гандыкап перад беларускімі клубамі (у нацыяльным рэйтынгу Балгарыі клуб на сёння трэці).
Ужыванне рэйтынгу для прагнозаў
Ужо на тле Power Rankings і букмекерскіх каэфіцыентаў суперкампутар вызначае верагоднасці тых ці іншых вынікаў кожнага матча.
Для гэтага ён сімулюе кожны з матчаў «тысячы разоў», якія засталіся ў турніры, улічваючы вышэйзгаданыя ўваходныя звесткі. На аснове гэтых сімуляцый мадэль таксама вызначае, як часта тая ці іншая каманда фінішавала на якім месцы – адтуль і ўмоўныя 10% на чэмпіёнства ўмоўнага «Рэала».
Менавіта такім чынам «суперкампутар» таксама можа вызначыць і фініш у тым ці іншым прамежку і нават прадугледзець фінальную колькасць пунктаў. Ён проста вылічвае сярэднюю з таго, што насімуляваў.
Фота: Panoramic, Global Look Press, АПЛ
Іншыя пасты карыстальніка
