«Гомель» не забівае ўжо пяць тураў. Новыя форварды не цягнуць, а вось куды знік на Кіпры той, хто разарваў ЧБ-2024

На старце сезона «Гомель» прайшоў праз няпростае выпрабаванне – матчы з бронзавым і срэбным прызёрам мінулага ЧБ. Каманда Андрэя Гараўцова дала рады – з «Тарпеда-БелАЗ» згуляла ўнічыю (1:1), а «Нёман» мінімальна перамагла.

Далей «Гомель» чакалі менш рэйтынгавыя супернікі, аднак у матчах са «Славіяй» (0:1), БАТЭ (0:0), «Мінскам» (0:1), «Віцебскам» (0:2) і «Іслаччу» (0:0) удалося набраць усяго два пункты, пры гэтым забіць не атрымалася ні разу. Два галы за сем тураў – найгоршы вынік ва ўсім ЧБ. Нават «Маладзечна», якое саступіла ўсім, мае на адзін мяч болей.

Пры гэтым па сумарным паказніку чаканых галоў «Гомель» (7.79 XG) знаходзіцца на 10-м месцы – вышэй за «Нафтан» (6.69 XG), які здолеў адзначыцца дзевяць разоў, і БАТЭ (5.50 XG), які мае шасць галоў у актыве. А вось па розніцы паміж чаканымі галамі і фактычнымі падапечныя Гараўцова другія ў ЧБ – 5.79. Гэтым паказчык горшыя справы толькі ў «Тарпеда-БелАЗ», які таксама пакутуе ў гэтым сезоне на выніковасць, але ўсё ж не як «Гомель» (11.13 XG – 5 галоў = 6.13).

Выглядае, што «Гомель» не можа знайсці сябе ў атацы пасля сыходу свайго галоўнага страйкера мінулага сезону Родзі Эфаге. Габонец стаў найлепшым снайперам ЧБ-2024 – забіў 17 галоў, яшчэ чатыры разы асіставаў партнёрам. Пры гэтым «Гомель» за ўвесь мінулы сезон забіў 37 мячоў, то бок Эфаге паўдзельнічаў у 56% галявых акцый каманды.

У міжсезонне «Гомель» шукаў замену афрыканскаму бамбардзіру – падпісаў адразу трох цэнтрфорвардаў. 28-гадовы Аляксандр Буцько мінулы сезон правёў у «Іслачы», дзе быў другім снайперам (9 галоў у ЧБ) пасля Аляксандра Шасцюка. У гэтым сезоне за «Гомель» выйшаў ва ўсіх сямі матчах і зарабіў толькі асіст, хоць мог быць і гол, але яго партнёр, бразілец Фернанда Нета, з лініі дабіў мяч, які ўжо каціўся ў пустыя вароты «Нёмана».

У сакавіку «Гомель» на сезон падпісаў 19-гадовага Абу Суф'ян Вадду. У мінулы сезоне нігерыец выступаў за «Загаталу» з азербайджанскага мінора. Навічок неўзабаве аформіў дубль у таварыскім матчы з другой камандай «Віцебска» (3:0), але ў сезоне Гараўцоў пакуль не надта давярае афрыканцу – выпусціў толькі на 15 хвілін супраць «Мінска» (0:1). А пасля гульні з БАТЭ тлумачыў, што Ваду не гуляе, «таму што іншыя хлопцы мацнейшыя за яго».

Таксама ў сакавіку «Гомель» узяў у гадавую арэнду 19-гадовага Кірыла Чабуракава. Расіянін зʼяўляецца выхаванцам «Растова», за чый дубль гуляў у мінулым сезоне ажно ў расійскім Д4 – восем матчаў, два галы. За «Гомель» у гэтым сезоне правёў шэсць матчаў і выніковых дзеянняў не займеў. У красавіку Чабуракаў правёў адну гульню за дубль «Гомеля» ў Д2 і там засмуціў «Белшыну» (2:2). У інтэрвʼю расійскі нападнік параўноўваў Гараўцова з галоўным трэнерам зборнай Расіі і былым галоўным трэнерам «Растова» Валерыем Карпіным. «Гараўцоў чымсьці падобны да Карпіна: адкрыты, пісьменны, у любы момант гатовы дапамагчы сваім футбалістам. Да яго заўсёды можна падысці і спакойна пагаварыць, нешта ўдакладніць», – казаў Чабуракаў.

Пакуль што новым форвардам «Гомеля» не надта ўдаецца замяніць найлепшага бамбардзіра каманды мінулага сезона. Тым часам беларускі спецыяліст Людас Румбуціс даў параду Гараўцову паехаць у Афрыку, каб адшукаць там новага Эфаге. А што адбываецца са старым?

Эфаге пасля заканчэння кантракта з «Гомелем» з'ехаў на Кіпр, дзе на два з паловай гады падпісаўся з «Арысам» Аляксея Шпілеўскага. У сярэдзіне лютага форвард дэбютаваў – выйшаў на 15 хвілін супраць АЕЛ (4:0). У сакавіку Эфаге адзначыўся голам – забіў чэмпіёну Латвіі РФШ (3:2) у таварыскім матчы.

Праз некалькі дзён пасля спарынгу Эфаге зноў згуляў за «Арыс» у чэмпіянаце – выйшаў на 18 хвілін супраць АЕК (1:1), але на 90+7-й хвіліне таго матча здарылася зваротная замена праз траўму. З таго часу нейкай дадатковай інфармацыі пра стан здароўя Эфаге клуб не распаўсюджваў. Аднак больш у заяўку «Арыса» легіянер пакуль не трапляў.

Па звестках жа «Трыбуны», пашкоджанне Эфаге не было вельмі сур'ёзным. Ён ужо аднавіўся, але не трапляе ў склад праз канкурэнцыю. Цалкам верагодна, што летам ён ізноў зменіць клуб. Ці не азначае гэта вяртання ў Беларусь? Напрыклад, з Кіпра ў Беларусь, у мінскае «Дынама», прыехаў Душан Бакіч. Праўда, яго дзеянні пакуль мала каго ўражваюць.

У чэмпіянаце Кіпра «Арысу» засталося правесці два матчы, але з другога месца каманда Шпілеўскага ўжо нікуды не ссунецца – да лідара «Пафаса» сем пунктаў, а адрыў ад трэцяга АЕКа – шэсць, але «Арыс» мае перавагу дзякуючы перамозе ў асабістай сустрэчы.