Глебы адзначылі 9 траўня: «цікавы парад», дзе славілі бягучую вайну, бульба ўкраінскіх дзяцей, «абмундзіраванне» ў чырвона-зялёным
Уразілі кітайскія і егіпецкія «сябры».
Позна вечарам 8 траўня па цэнтральнаеўрапейскім часе і ўжо 9 траўня па маскоўскім у 1945 годзе была падпісаная капітуляцыя фашысцкай Германіі ў Другой сусветнай вайне. У шматлікіх краінах Еўропы 8 траўня з’яўляецца днём цішыні і памяці ахвяр той вайны. Сярод беларусаў ёсць прыхiльнiкi такога падыходу са сваiмi аргументамi.
Але ў рэжымнай Беларусі поўная арыентацыя на Расію – а там 9 траўня робяць пафаснае свята: у гарадах ладзяцца парады, запускаюцца салюты і гэтак далей, а прапаганда дасягае максiмальнага размаху. Адпаведна, у нашай краiне адбываецца штосьцi вельмi блiзкае.
Складана зразумець, як у гэта шчыра ўцягнуцца, калі Расія праз 80 год пасля свайго сапраўды вельмі важнага ўнёску ў перамогу над фашызмам ператварылася ў агрэсара і вядзе захопніцкую вайну ва Украiне з мэтай знiшчыць рэальную дзяржаўнасць i самасвядомасць цэлага народа. Але ёсць тыя, у каго ўуягнуцца атрымлiваецца. Сярод такiх – i былыя футбалiсты Аляксандр ды Вячаслаў Глебы са сваiмi жонкамi.
Аляксандр Глеб з жонкай Святланай і дзецьмі ў такі дзень уключылi дзяржТБ. Там паказвалi зняты на кіеўскай кiнастудыi ў савецкi час фільм пра вайну «В бой идут одни «старики». Увагу жонкi экс-футбалiста прыцягнула сцэна, у якой дзеці ядуць бульбу, спечаную ў вогнiшчы. Дзеці, дарэчы, украiнскiя, размаўляюць у гэтай сцэне на роднай мове, а бульбу ядуць, таму што больш няма чаго – у канцы сцэны афiцэр, якi сустрэў малых, загадвае салдату адвесцi iх у сталовую ды накармiць. Але да Святланы Глеб у той момант стужкi яўна прыйшло не спачуванне, а штосьцi больш падобнае да зайдрасцi – жанчына на камеру сказала: «Блін, як смачна. Я захацела бульбу такую».
Далей фiльм на ТБ перарываўся на хвіліну маўчання. Тут жонка Глеба зафiксавала, як усе навакольныя ўсталi. Гэта як раз прыняты жэст для цішыні і памяці – але для чаго ж яго здымаць?
Тым больш хутка фiльм працягнуўся, там завялi расiйскую песню «Смуглянка» – i Святлана Глеб стала весела падпяваць, а яе дочкі танчыць.
У Інстаграме жонкі малодшага Глеба Вольгі ад самага ранку пачалі з’яўляцца тэматычныя сторыс. Пара завяла сябе пад сняданак трансляцыю параду ў Маскве, якi Уладзiмiр Пуцiн максiмальна прадказальна выкарыстаў для ўсхвалення сваёй цяперашняй вайны ва Украiне. Парад жанчына назвала цiкавым, а асабліва Вольгу і Вячаслава здзівілі вайскоўцы з Кітая і Егіпта, якія выступалі на шэсці. Не абышлося і без узгадвання Аляксандра Лукашэнкі, які «там, а потым будзе тут».
Далей экс-футбаліст і яго цяжарная жонка, па яе выразе, «абмундзіраваліся» – чырвона-зялёнымі сцяжкамі, якiя узнялі «за мірнае неба над галавой» (у якiм лятаюць баявыя дроны акурат праз палiтыку Лукашэнкi) і кепкай з дзяржгербам. У такiм выглядзе пайшлі ў парк Перамогi, дзе было «можна і паесці, і пагуляць, і паглядзець на ўсякія машыны» – ваенныя, канешне.
Таксама пара цешылася расійскім спевакам.
Іншыя пасты карыстальніка
