«Трактар» вярнуўся праз 2,5 года: «горачка» на месцы, трыбуны моцна паменелі, але ўсё роўна выглядалі вельмі пуста
Пачатковы план рэканструкцыі выканалі не цалкам.
Сталічны стадыён «Трактар» вярнуўся ў беларускі футбол пасля рэканструкцыі. 10 траўня ў межах 8-га тура вышэйшай лігі на арэне сустрэліся «Мінск» і дзяржынскі «Арсенал» (2:2). Да таго на легендарным стадыёне апошнім разам гулялі 12 лістапада 2022-га.
Дзве даты раздзялілі без пары дзён 2,5 гады. Паглядзім, што змянілася за гэты час.
Але пачнем з крыху гісторыі. Першая рэканструкцыя стадыёна адбылася яшчэ ў далёкім 1976 годзе – арэна, уласна, стала «Трактарам», таму што была пераданая МТЗ. Тады пабудавалі верхні ярус асноўнай трыбуны і насыпныя земляныя – па баках. Умяшчальнасць стадыёна склала 25 тысяч чалавек.
У выніку другой рэканструкцыі напрыканцы 1990-х стадыён стаў такім, якім мы яго ведалі да нядаўняга часу. Земляныя трыбуны змяніліся на жалезабетонныя, паставiлi пластыкавыя сядзенні, умяшчальнасць стала роўнай 17,6 тысячы. Але з цягам часу арэна аказалася найгоршай для прагляду футбола.
Трэцяя рэканструкцыя стадыёна распачалася толькі ў верасні 2023-га – да таго, маўляў, рыхтавалі пляцоўку. Мадэрнізацыя арэны была прымеркавана да будаўніцтва побач кітайскага стадыёна (на фота вышэй бачна расчышчанае месца для яго), які павінен адкрыцца ў чэрвені 2025-га.
За рэканструкцыю «Трактара» адказвалі беларускія будаўнікі. Яму надалі статус «моладзевай будоўлі», што дазволіла прыцягваць чальцоў БРСМ і студэнтаў разнастайных сталічных вузаў, дапамогай якіх пазней хваліўся дзяржаўны «Мінскбуд».
Праз суседства з «кітайцам» «Трактар» зазнаў сур'ёзныя змены. Стадыён чакала перапланіроўка – знос усіх трыбун, акрамя галоўнай праз адсутнасць неабходнасці такой колькасці месцаў. На іх месцы планаваліся па два трэнавальных і міні-футбольных полі і яшчэ дзве пляцоўкі для стрытбола.
Пра знос паўночнай, паўднёвай і ўсходняй трыбуны адсправаздачыліся ў красавіку 2024 года.
Ад былога «Трактара» засталiся каркас асноўнай трыбуны i натуральнае поле, якое падчас будаўніцтва стараліся не пашкодзіць (але, гледзячы па здымках, гэтага не атрымалася).
У той жа час паведамлялася пра працы на адзінай трыбуне, якая засталася: перапланіроўка памяшканняў, новая пешаходная галерэя, мантаж канструкцый дзвюх кафэ з панарамным асцякленнем.
Летам 2024-га будаўнікі адчыталіся пра ўпарадкаванне тэрыторыі стадыёна. На месцы былых трыбун сфармавалі і азелянілі адкосы, вакол асноўнага поля зноўку паклалі асфальт, як было на старым «Трактары».
Адкрылі адноўлены «Трактар» 14 лістапада 2024-га, калі туды завітаў Аляксандр Лукашэнка. У той дзень у якасці масоўкі для дыктатара на полі трэнаваліся футбалісткі жаночай каманды «Мінска», якім ён сказаў, што з дзяцінства «спаў з мячом» і даў, як звычайна, «бясцэнную» параду.
У выніку рэканструкцыі ўмяшчальнасць «Трактара» зменшылася з 17600 да 5600 чалавек, у тры з лiшкам разы. Крэслы змянілі акрас на колеры «Мінска», якому цяпер належыць «Трактар». Таксама можна ўбачыць адноўлены каментатарскі пакойчык і VIP-ложу, якой зрабiлi дах. А яшчэ на стадыёне нарэшце аднавілі электраасвятленне – як пісаў ВК-паблік «Арэны Беларусі», ранейшая сістэма не працавала з «часоў СССР».
Натуральнае поле не кранулі, толькі ўстанавілі новыя брамы, кутавыя сцяжкі і дрэнажную сістэму.
Прыемна выглядаюць і памяшканні ўнутры.
Зладзіць запланавую колькасць трэнавальных і міні-футбольных палёў з пляцоўкамі не атрымалася. У канчатковай версіі засталося толькі па міні-футбольнаму полю са штучным газонам за кожнай брамай (зрэшты, пра гэта паведамілі яшчэ ўлетку). Пад былой усходняй трыбунай зробленыя лёгкаатлетычныя дарожкі. Іх можна заўважыць на параўнальным фота ніжэй, як і адну з міні-футбольных пляцовак. Па краях трыбуны можна ўбачыць і абяцаныя кафэ з панарамнымі вокнамі. Паставiлi спецыяльную сетку за брамай, каб мяч далёка не ўлятаў.
Як можна меркаваць з фота, асобныя крэслы ў нізе трыбуны – гэта безбар'ерная прастора для інвалідаў і асоб, якія іх суправаджаюць.
Яшчэ адна навінка – электроннае табло, якое месціцца з боку легендарнай «горачкi». А на ўваходзе на адноўлены «Трактар» можна пабачыць мурал у гонар «Мінска». Яго рабілі студэнты БНТУ.
На гульні «Мінска» з «Арсеналам», паводле пратаколу, прыстнічала 325 чалавек – усяго 5,8% ад новай умяшчальнасці. Шчыра кажучы, нават столькі налічыць складана.
Мiнi-футбольныя пляцоўкi за брамамi карысталi для размiнкi рэзерву – кожная каманда сваю.
Табло працавала як трэба.
А легендарная «горачка» засталася пры працы, але і там людзей было вобмаль.
Цяпер «Трактар» плануюць выкарыстоўваць толькi для ўнутраных спаборніцтваў. Міжнародныя, якія мог прымаць стары стадыён, будуць праводззць на «кітайскiм» суседзе, які месціцца ў некалькіх дзясятках метраў.
Іншыя пасты карыстальніка
