Былы гулец ЧБ бадзёра пачаў у «Ман Сіці» – і раптам знік нават з заяўкі. Вось што з ім адбылося
Што здарылася?
Гэтай зімой мы шмат абмяркоўвалі пераход Абдукадыра Хусанава ў «Манчэстэр Сіці». Узбекістанскі абаронца стаў самым дарагім футбалістам, які калі-кольвек выступаў у чэмпіянаце Беларусі. Каб выкупіць гульца ў «Ланса», босам «Сіці» прыйшлося раскашэліцца на 40 мільёнаў еўра. Частка грошай перапала і «Энергетыку-БДУ», за які выступаў Хусанаў да ад'езду ў Францыю.
Пасля пераходу ў «Манчэстэр Сіці» Хусанаў даволі часта выходзіў на поле, няхай і атрымлівалася не заўсёды ўдала. У дэбютнай гульні з «Чэлсі» ён абрэзаўся ўжо на 3-й хвіліне, а на 4-й зарабіў жоўтую картку. Але тады «МС» здолеў адгуляцца і перамагчы 3:1.
Затое ўжо ў наступнай гульні Хусанаў вызначыўся дэбютным голам. Мяч меў камічнае адценне, але вельмі дапамог прайсці «Лейтан Арыент» з Д3 у 1/16-й Кубка Англіі (2:1).
Паступова Хусанаў набіраўся ўпэўненасці, а сваёй сціпласцю ўлюбіў у сябе заўзятараў «Сіці», якія ў лютым прызналі ўзбека найлепшым абаронцам месяца. Хусанаў працягваў стабільна гуляць у сакавіку. Тады ў матчы з «Брайтанам» (2:2) здарыўся непрыемны момант – былы абаронца «Энергетыка-БДУ» паразіў свае вароты.
Пасля гэта Хусанаў адправіўся ў зборную, за якую поўнасцю адгуляў матчы з Кыргызстанам (1:0) і Іранам (2:2) у кваліфікацыі да чэмпіянату свету. Узбекістан, дарэчы, за крок ад выхаду на Мундыяль – за два туры да канца адбору ідзе на другім месцы ў групе з адрывам ад трэцяга ў чатыры пункты. На ЧС едуць дзве першыя каманды.
У час паездкі ў зборную Хусанаў быў заняты не толькі футболам. Абаронца паспеў зрабіць прапанову сваёй дзяўчыне:
Сустрэўся з прэзідэнтам Узбекістана Шаўкатам Мірзіёевым:
А яшчэ атрымаў у падарунак чорны Mercedes-Benz G-класа, які звычайна называюць «гелентваген», ад Улугбека Асанбаева – экс-футбаліста зборнай Казахстана з узбекскімі каранямі:
Пасля вяртання са зборнай Хусанаў выйшаў 30 сакавіка ў старце на чвэрцьфінал Кубка Англіі з «Борнмутам» (2:1). У канцы першага тайма абаронца атрымаў жоўтую картку, а ў перапынку Гвардыёла яго замяніў. З таго часу Хусанаў на полі больш не з'яўляўся, а прайшло, між іншым, ужо восем матчаў. У апошніх двух – з «Вулвз» (1:0) і «Саўтгемптанам» (0:0) у прэм'ер-лізе – нават не прысутнічаў у заяўцы. Што ж здарылася?
Падобна, што Хусанаў проста прайграе канкурэнцыю. Яшчэ ў сакавіку Гвардыёла адзначаў, што не планаваў адразу выкарыстоўваць узбека з такой інтэнсіўнасцю – той за люты і сакавік агулам узяў удзел у дзевяці сустрэчах, шэсць з якіх правёў цалкам. Тым не менш трэнер казаў, што задаволены тым, што паказаў Хусанаў з улікам кароткага тэрміну адаптацыі. «Ён разумее ўсё даволі добра, я спадзяюся на гэта. Мы павінны падштурхнуць яго да разумення, навучання і камунікацыі, таму што гэта сапраўды важна», – казаў Гвардыёла.
У красавіку пасля траўмы аднавіўся адзін з канкурэнтаў Хусанава – Мануэль Аканжы. Супраць «Саўтгемптана» швейцарскі абаронца адгуляў усе 90 хвілін. Тым не менш у лазарэце «Сіці» працягваюць заставацца Натан Аке і Джон Стоўнз. На пачатку траўня журналісты пыталіся ў Гвардыёлы пра адсутнасць гульнявой практыкі ў Хусанава. Пеп адказаў даволі лаканічна: «Гэтая сітуацыя паказвае тое, што нікому не гарантаванае месца ў асноўным складзе. Заўтрашняя гульня [2 траўня з «Вулвз»] таксама не можа быць гарантыяй гэтага».
Англійскія эксперты сыходзяцца ў меркаванне, што Гвардыёла ў вырашальных матчах сезона («Сіці» ідзе чацвёртым і за апошнія два туры можа як падняцца на другое месца, так і застацца без еўракубкаў) вырашыў даверыцца больш дасведчаным абаронцам.
«Ён паказаў болей, чым ад яго чакалі. Але Гвардыёла ўпадабаў больш дасведчанага [Ёшку] Гвардыёла ў вырашальныя моманты сезону», – словы інсайдэра Джэка Гогана.
«З'яўленне Ніка О’Райлі на левым флангу, стабільная гульня ў цэнтры абароны Рубена Дыяша і Ёшкі Гвардыёла, а таксама рашэнне Гвардыёлы гуляць з чатырма абаронцамі з упорам на вынік таксама паўплывалі на выключэнне Хусанава з асноўнага складу. Цяпер яму трэба будзе зноў даказваць сваю здатнасць перад наступным сезонам», – напісалі ў Daily Mail.
Акрамя таго паведамлялася, што ў Хусанава ўзніклі праблемы з адаптацыяй у Англіі. Англійская ўзбекістанца не найлепшая, хоць ён і займаецца з рэпетытарам. Для паўнавартаснай камунікацыі ў камандзе яго моўнага ўзроўню пакуль бракуе. Тым не менш легіянер працягвае вучыць мову, а яшчэ, як пішуць у англійскай прэсе, пасябраваў з бразільскім абаронцам Віторам Рэйсам, які таксама папоўніў шэрагі «Сіці» гэтай зімой.
На фоне адсутнасці гульнявой практыцы і праблем з адаптацыяй у прэсе з'явіліся чуткі пра цікавасць да Хусанава з боку «Барселоны». Каталонскі партал carpetasfcb.com паведаміў, што «сіне-гранатавыя» зацікаўлены ў арэндзе ўзбека з правам выкупу. Праўда, агент футбаліста Гайрат Хасбіулін гэтую інфармацыю назваў «лухтой».
Іншыя пасты карыстальніка
