Хто прынёс Беларусі першы медаль Парыжа: бойфрэнд – алімпійскі чэмпіён, у 19 абышла тую, каго называла кумірам

2 жніўня Беларусь заваявала першы медаль на Алімпіядзе ў Парыжы. Віялета Бардзілоўская стала другой у скачках на батуце, саступіўшы толькі Брыёні Пэйдж з Вялікабрытаніі 0,42 балы.

Беларускія батутысты ўжо трэція Гульні запар атрымліваюць узнагароды (да таго было два золата), аднак упершыню ў прызы патрапіла прадстаўніца жаночай каманды. Поспех Бардзілоўскай у нейкім сэнсе можна назваць нечаканым, бо ў гэтым сезоне яе найлепшым вынікам было 10-е месца на этапе Кубка свету. Аднак ужо ў Парыжы падчас кваліфікацыі яна стала найлепшай сярод 16 удзельніц па выніках першай спробы, таму на другую нават не выйшла, бо датэрмінова патрапіла ў фінал.

У фінале Бардзілоўская скакала першай. Пасля выступу выглядала, што яна не вельмі задаволеная сваёй спробай. Але вынік беларускі (56,060) быў найлепшым аж да выхаду на батут перадапошняй фіналісткі. Вось што сказала Бардзілоўская пасля спаборніцтваў:

– Шанц ёсць заўсёды. Рада, што сабралася ў патрэбны момант, паказала добры выступ, хаця не абышлося без памылак. Падтрымлівала і трэнерка Вольга Уласава. Медаль вельмі каштоўны для нас усіх. Увечары заўзею за Івана Літвіновіча.

За сваё алімпійскае срэбра па вяртанні на Радзіму спартсменка мусіць атрымаць 6 тысяч базавых велічынь (на сёння 76,7 тысячы долараў).

А што ўвогуле вядома пра Бардзілоўскую?

Нарадзілася 7 чэрвеня 2005 года ў Магілёве. Бацькі аддалі яе ў спорт, калі дзяўчынцы было чатыры. Яе кумірам у дзяцінстве была магілёўская батутыстка Таццяна Пятрэня, якая станавілася чэмпіёнкай свету і Еўропы. Бардзілоўская яшчэ студэнткай магілёўскай вучэльні алімпійскага рэзерву казала, што марыць пра алімпійскі медаль – маўляў, так яна хоча скончыць спартыўную кар'еру. Здаецца, мара споўнілася занадта рана.

Ну а Пятрэня на пачатку гэтага года адзначала талент зямлячкі і прадракала ёй вялікую будучыню:

– Таленавітая спартсменка, працавітая, мэтанакіраваная. Веру, што дасягне большага за мяне. Яна робіць даволі складаную праграму, а ў батуце якраз шануюцца складанасць, вышыня, тэхніка выканання, – казала падпісантка за дыктатуру.

Сама Пятрэня алімпійскі медаль так і не ўзяла. У Афінах-2004 стала апошняў у кваліфікацыі, у Пекіне-2008 не патрапіла ў фінал, у Лондане-2012 ад п'едэстала аддзялілі 0,3 балы, а ў Рыа-2016 выйграла кваліфікацыю, але праз памылку ў вырашальнай спробе стала толькі пятай.

Нягледзячы на розніцу ва ўзросце ў 24 гады, Бардзілоўская і Пятрэня паспелі разам пабыць у камандзе. Ветэранка завяршыла кар'еру толькі ў снежні 2023-га, калі ёй было 42 гады.

У траўні 2021-га Бардзілоўская стала чэмпіёнкай Еўропы сярод юніёраў у сінхронных скачках, а ў лютым 2022-га дэбютавала на дарослым узроўні. Да бана за вайну, якую Расія вядзе супраць Украіны пры падтрымцы рэжыму Лукашэнкі, Бардзілоўская паспела выступіць на адным толькі этапе Кубка свету – у Баку стала другой у кваліфікацыі, але сёмай у фінале, і далей амаль два гады не мела паўнавартаснай міжнароднай практыкі.

У траўні гэтага года, калі беларускім батутыстам ужо вярнулі магчымасць ездзіць на турніры ў Еўропу, няхай і пад нейтральным сцягам, Бардзілоўская заваявала алімпійскую ліцэнзію па суме двух найлепшых вынікаў на этапах Кубка свету (у Баку была 10-й, а ў Котбусе 12-й).

Той поспех дзяўчына адзначыла рамантычным пацалункам з партнёрам па зборнай 23-гадовым Літвіновічам, які таксама адабраўся на Гульні.

Літвіновіч і Бардзілоўская з'яўляюцца парай. Ён – алімпійскі чэмпіён, і ў Парыжы таксама выступіць у фінале. Перад пачаткам Алімпіяды букмекеры і эксперты называлі Літвіновіча фаварытам у сваёй дысцыпліне.

Беларусам прагназуюць медалi на Алiмпiядзе: ёсць галоўны фаварыт i некалькi цвёрдых прэтэндэнтаў

Гэты раман – не нешта ўнікальнае для беларускага батута. Больш за тое, беларуская пара батуцістаў ужо выстапала на адной Алімпіядзе ў фінале. Калі Ганчароў станавіўся ў Рыа чэмпіёнам, яго будучая жонка, а на той момант яго дзяўчына Ганна Гарчанок таксама выйшла ў фінал, але заняла там апошняе месца.