Гандбаліст «Вецлара» Плюто пра пераход у Бундэслігу: «Гэта незвычайна – з трэцяй лігі трапіць у першую»
Беларускі лінейны «Вецлара» Мікіта Плюто распавёў пра пераход з трэцяй лігі ў Бундэслігу.
– Калі цябе паклікалі ў «Вецлар», моцна здзівіўся?
– Так. Таму што гэта незвычайна – з трэцяй лігі трапіць у першую. Хіба што падобнае бывае, калі ў клуба ёсць другая каманда, якая выступае ў трэцяй лізе. Але гэта не мой выпадак.
– Як цябе заўважыў «Вецлар»?
– У мяне ёсць менеджар. І раней я даў яму відэа з маёй гульнёй, якое ён паставіў на YouTube. Не ведаю, як мяне заўважылі. Але, думаю, кантакты пачаліся праз менеджара. І ў клубе паглядзелі тое відэа.
– Раней каманды Бундэслігі табой цікавіліся?
– Не. Але, калі я сыходзіў з «Мельзунгена», мне прапаноўвалі застацца ў другой камандзе з чацвёртай лігі. І абяцалі, што буду трэніравацца з першай. Але ў той час там працаваў трэнер, які мне не вельмі падабаўся.
Праз час зноў з'явіўся кантакт з «Мельзунгенам». Новы трэнер мне ўжо больш падабаўся. Але ў чацвёртай лізе ў той час гулялі без масцікі. Я нават уявіць не мог, як гэта. Цяпер ужо дазволілі. Але тады ў зямлі Гесэн нельга было карыстацца масцікай у залах. Каманды, якія гуляюць без яе, – непрафесійныя. Зрэшты, не захацеў пераходзіць не толькі з-за масцікі.
– Трапіць у Бундэслігу – гэта была твая мара?
– Так. Гэта вельмі складана. Па мне, Бундэсліга – самы моцны чэмпіянат у свеце. Думаю, патрапіўшы туды, ты ўжо шмат чаго дамогся. Але не ўсяго. Я пакуль не магу быць задаволены. Напрыклад, яшчэ не закідваў там. Шмат чаго можна палепшыць. Адаптаваўся яшчэ не да канца. Але сітуацыя ўжо нашмат лепш, чым спачатку. У мяне атрымліваецца ўсё больш, – падзяліўся Плюто.