Дзяўчына-асілак з Мінску першай з беларусак прабілася на самы прэстыжны ў свеце турнір па кросфіце

Наталля Князюк стала першай беларускай, якая прабілася ў фінальны этап Crossfit Gаmes – галоўных спаборніцтваў кросфітэраў. У вырашальную стадыю 37-гадовая спартсменка прабілася з 9-м вынікам у Еўропе і 31-м у свеце. Агулам на фінальны этап запрашаюцца па 60 мужчын і жанчын. З беларусаў да яго раней дабіраўся толькі Мікіта Юндаў – у 2019 годзе. Цяпер гэты спартсмен жыве і трэнуе ў Лос-Анджэлесе. 32-гадовы мужчына раней займаўся дзюдо, а цяпер бярэ ўдзел у кросфіт-стартах па ўсім свеце.

Кросфіт – гэта кругавы трэнінг, які спалучае практычна ўсе кірункі атлетыкі: гімнастычныя элементы, аэробіку, лёгкую і цяжкую атлетыку, паўэрліфтынг, сілавыя і кардыёнагрузкі. Асаблівасць гэтай сістэмы трэніровак заключаецца ў высокай інтэнсіўнасці і бесперапыннасці выканання практыкаванняў. Аснова кросфіта – максімальная функцыянальнасць, якая эфектыўна спальвае лішнюю вагу і падтрымлівае арганізм у здаровым стане. Часцей за ўсё гэта спорт для аматараў, але ёсць і вельмі буйныя ды прэстыжныя турніры. Самы круты з іх – Crossfit Games – праводзяцца з 2007 года. На першым этапе анлайн ў ім удзельнічаюць усе, хто хоча, – а гэта 600+ тысяч чалавек.

Пару гадоў таму Юндаў паказваў, як праходзіць адзін з этапаў адбору. Там і падыманне штангі, і крокі-выпады з гантэлямі, і практыкаванні на кольцах, і скакалка – карацей, справа відавочна няпростая.

ВІДЭА

Што тычыцца Наталлі, якая ў дзявоцтве насіла прозвішча Барадзюк, то раней яна займалася біятлонам. А кросфітам захапілася пасля таго, як аднойчы прыйшла ў залу да трэнера па муай-тай Дзяніса Князюка, каб падтрымаць форму. Аказалася, што яна яшчэ знайшла сабе і мужа.

Муж і жонка разам кіруюць клубам функцыянальнага мнагабор'я PoisonBox. Некалькі разоў яны змянялі памяшканне для трэнінгаў. Сёння заняткі праводзяцца па вуліцы Ляшчынскага ў Мінску ў першай сертыфікаванай у Беларусі кросфіт-зале. Дзяніс Князюк таксама кіруе Беларускай федэрацыяй функцыянальнага мнагабор'я. Ён зладзіў ужо больш за 15 турніраў па кросфіце, у тым ліку «Бітву гарадоў» і Bro Games, на якія раней прыязджалі атлеты з Украіны і Расіі.

Свой прагрэс ад кросфіту Наталля адчула ўжо праз тры месяцы заняткаў. Жанчына хвалілася, што хутка навучылася падцягвацца, адціскацца і працаваць з гірамі. Вось так яна выглядала ў пачатку кросфіт-кар'еры ў сакавіку 2017-га.

Прыкладна праз паўгода жанчына зацяжарыла. Але нават у такі далікатны перыяд працягвала займацца ў залі, няхай і ў больш лёгкім рэжыме. Спартсменка падрабязна распавядала пра змены ў трэнінг-праграме, каб не было шкоды дзіцёнку. Напрыклад, адмовілася ад розных скачкоў, штангі і практыкаванняў на прэс, а адціскацца стала ў спрошчаным фармаце.

Дзяніс і Наталля выступалі ў пары – такія спаборніцтвы ў кросфіце таксама ёсць. У красавіку 2019-га Князюкі ў Маскве занялі 10-е месца з 24. Удзельнічалі яны і ў Banda Open Games у Кіеве, і ў мностве іншых вялікіх турнірах.

З часам колькасць стартаў расла. Гэта здымкі з «Бітвы гарадоў-2021» у Мінску.

Пазней Наталля дадала ў свае трэнінгі плаванне, бо на спаборніцтвах комплексы з вадой такасама сустракаюцца. Жанчына прызналася, што раней заўсёды баялася вады.

А два гады таму спартсменка пахвалілася, што яна 29-я у катэгорыі 35-39 гадоў у Еўропе і 145-я ў свеце. Менавіта з гэтага паста яна пачала весці сваю старонку на беларуская мове.

У сацсетках Наталлі ў асноўным фота трэнінгаў і сям'і. Сёння пара выхоўвае ўжо шасцігадовую дачку Аляксандру.

А яшчэ жанчына дзеліцца даволі адкрытымі фота.

У лістападзе 2024-га пара ездзіла на міжнародныя спаборніцтвы ў Стамбул. У катэгорыі Masters 35+ (тут маецца на ўвазе ўзрост) Наталля заняла першае месца і атрымала 1200 долараў прызавых, яе муж быў сёмым.

А вось так найлепшая беларуская спартсменка ў кросфіце рыхтавалася да міжнароднага старту ў Турцыі.

Crossfit Gаmes-2025, верагодна, стане для Наталлі Князюк галоўным выпрабаваннем у кар'еры. Адбудуцца спаборніцтвы ў амерыканскім горадзе Албані 1-3 жніўня.