Дзмітрый Краўчанка: «Магчымасцяў закінуць раней у «Металурга» было дастаткова, атрымалася ў канцы»

– Цяжка ўваходзілі ў гульню – напэўна, таму што з дарогі. Момантаў у пачатку матчу ў апанента было больш, чым на адзін гол, але падцягнуў брамнік. Паволі, па нарастаючай ішлі, трохі разняволіліся і забілі моманты, якія стварылі, у трэцім перыядзе. Магчымасцяў закінуць раней у нас было дастаткова, атрымалася ў канцы.

– Вы сказалі пра цяжкі пачатак, але першую палову стартавага перыяду фактычна правялі ў зоне «Магілёва».

– А пачалі са змены ў сваёй. Так, шайбу кантралявалі, але гэта не значыць, што абавязкова павінны былі закідваць. Кантраляваць можна па-рознаму. У гаспадароў шанцы былі па якасней: выхад у нуль, контратакі. Паўтаруся, наш брамнік дзейнічаў выдатна. Потым ужо хлопцы ўвайшлі ў гульню, спрацаваліся – і колькасць момантаў перарасла ў якасць, вылілася ў галы ў трэцім перыядзе.

– Чакалі, што атрымаецца закінуць ажно пяць галоў?

– Такое складана чакаць. Абедзве каманды хацелі выйграць. Зразумела, што заўзятары ацэньваюць па Галах: забілі – ура, малайцы. І гэта правільна, мы для іх гуляем. Трэнеры і хакеісты ж глядзяць больш на змест: па кантролі шайбы, накшталт, было нармальна, але ККД маленькі. У выніку ўсё, што не рэалізавалі ў першых двух перыядах, забілі ў трэцім.

– Ацэніце дзеянні дэбютанта Джыга.

– У дадзены момант ён даў нам добрую энергію, драйв, чаго камандзе не хапае. Упэўнены, што прыйдзе час, калі гэтую энергію, хуткасць, моц мы зловім. Выйдзем на яе і будзем паказваць свой хакей, – сказаў Краўчанка.