Галоўны трэнер «Металурга» Краўчанка пра 7:2 з «Магілёвам»: «Непрыемна чуць выкрыкі мясцовых заўзятараў у адрас сваёй каманды. Ніхто галы спецыяльна прапускаць не хоча»

Галоўны трэнер «Металурга» Дзмітры Краўчанка пракаментаваў разгромную перамогу каманды над «Магілёвам» (7:2)

– У першым перыядзе настолькі ўпэўнена згулялі, што потым узнікалі моманты, калі перавагу гублялі. Але гэта хакей. Праціўнік прачнуўся, адышоў, у перапынку, думаю, пагаварылі. З другога перыяду магіляўчане сталі больш нагнятаць, а мы доўга сядзелі на шайбе. Адсюль і ствараліся моманты ля нашай брамы. Падзякаваў хлопцам за добры матч. Едзем дадому.

– Адсутнічалі на гэтым выездзе Маструкоў і Багалейша. З чым звязана?

– Траўмы. Калі чакаць вяртання? Спадзяюся, да Новага года ўсе нашы траўміраваныя вернуцца ў склад.

–  Шмат заўзятараў сёння прыехала са Жлобіна.

– І дзякуй ім вялікі за гэта. Яны заўсёды і ўсюды з намі, гучна і класна перажываюць за каманду. Малайцы!

Я б хацеў сказаць пару слоў у падтрымку Аляксандра Мацярухіна і ўсёй магілёўскай каманды. Крыху непрыемна было чуць некаторыя выкрыкі мясцовых заўзятараў. Бываюць розныя перыяды ў гісторыі ўсіх клубаў. У цяжкія моманты і праяўляецца яднанне заўзятараў і каманды. Ніхто галы спецыяльна прапускаць не хоча. Мне б хацелася пажадаць заўзятараў усіх каманд падтрымліваць сваіх да канца. Правільней было б пагнаць хлопцаў наперад добрым словам.

Так, сёння магіляўчане першы перыяд прайгралі, але ж потым добра глядзеліся – другі і трэці нічыйныя. У сезоне каманды не так часта ў суме гуляюць дома, і ў такія моманты трэба ствараць больш пазітыву, нягледзячы на няўдалыя матчы. Ім і так цяжка, а заўзятары могуць зрабіць крыху лягчэй. Чаго ўсім і пажадаю – правільна было б менавіта так. І мець павагу, каб словы не абражалі і краналі, а падбадзёрвалі. Завесці каманду можна іншымі спосабамі – песняй, напрыклад, крычалкай, – сказаў Краўчанка.

⚽️ Чэмпіянат свету-2022 па-беларуску і без VPN! Пампуй дадатак Tribuna.com