Трэнер «Дынама-Маладзечна» Палішчук: «Перамаглі страх трэцяга перыяду. Думаю, такая гульня з падсвядомасцю працуе»
Галоўны трэнер «Дынама-Маладзечна» Аляксандр Палішчук падзяліўся думкай пра матч з «Металургам» (4:3).
– Пачну з падзякі балельшчыкам. Чуем і адчуваем вашу падтрымку. Гэта каштоўна.
Задаволены гульнёй хлопцаў на 100%. Нягледзячы на тое, што гулялі фактычна ў тры звяны (пяцёра хлопцаў хварэюць і траўміраваны), аддача максімальная. Вынік матча адлюстроўвае вынік працы. Задаволены кожным.
– Другая перамога над Металургам у сезоне. І ў гэтым, і ў папярэднім пераможным матчы забіта шмат шайб. Значыць, знайшлі болевыя кропкі саперніка?
– Не, паўтаруся гэта – заканамерны вынік добрай працы і выканання ўстановак.
– Неаднаразова адзначалася, што каманда не выцягвае трэці перыяд. Сёння ўсё атрымалася. Нейкія новыя стратэгіі і ўстаноўкі?
– Гэта псіхалогія.
– Рахунак на табло?
– Перамаглі боязь гэтага трэцяга перыяду. Рабятам кажу: «Забудзьцеся няўдачы. Не было іх». Думаю, такая гульня з падсвядомасцю працуе, – сказаў Паляшчук.
