Сяргей Стась: «Згуляць з Расiяй – тое самае, што і супернічаць са зборнымі Фінляндыі, Швецыі»

Галоўны трэнер маладзёжнай зборнай Беларусі Сяргей Стась падзяліўся меркаваннем аб удзеле ў Кубку Будучыні, які пройдзе ў Мінску.

Турнір пройдзе 9-11 лютага. У ім прымуць удзел маладзёжная (U20) зборная Беларусі, а таксама зборныя Расіі U18, Расіі U17 і Казахстана U20.

Нагадаем, што многія беларускія каманды і спартсмены былі адхіленыя ад міжнародных спаборніцтваў у адказ на вайну, якая з 24 лютага працягваецца Расіяй ва Украіне з выкарыстаннем тэрыторыі Беларусі.

– Раскажыце, як прайшла фінальная трэніроўка? У якім настроі хлопцы і наколькі яны гатовы?

– Калі хлопцы сустракаюцца, у іх заўсёды добры настрой. У нас было не так шмат часу – усяго дзве-тры трэніроўкі, але мы пастараліся асноўныя рэчы змясціць сюды і азнаёміць новых гульцоў з нашымі патрабаваннямі.

Хлопцам, якія ўжо выклікаліся ў зборную, асвяжылі ў памяці. Спадзяюся, што хлопцы паставіліся з разуменнем, сур'ёзна, і ўсё ж нешта вынеслі з гэтых трох трэніровак.

– Наколькі хлопцы паспелі згуляцца? Ці яны гэта будуць рабіць ужо па ходзе?

– Складана сказаць. Трэніроўкі – трэніроўкамі, але, напэўна, сыгрывацца будзем па ходзе матчаў.

– Ці ўсе хлопцы, якіх вы хацелі бачыць у складзе зборнай, прыехалі?

– Ну з большага, напэўна, усё. Але ёсць тыя, якія сёння з'едуць з мінскім «Дынама» гуляць, і яны не змогуць нам дапамагчы.

– Як ацэньваеце сапернікаў? Гатовы да сустрэчы з імі? Наколькі яны моцныя для нашай каманды?

– Са зборнай Казахстана мы гулялі ў Піцеры, але там была крыху іншая каманда. Цяпер мы будзем гуляць з камандай, якая ўдзельнічала ў маладзёжным чэмпіянаце свету.

Што да расійскіх зборных, то я заўсёды казаў, што іх U18 мне падабаецца нашмат больш, чым іх U20. Каманда вельмі хуткая.

Хацелася б узяць у іх рэванш за турніры ў Сочы і Піцеры. Будзе цікавы хакей.

– Наколькі хакеістам неабходны такія турніры ва ўмовах, калі міжнародных стартаў не так ужо і шмат?

– На мой погляд – гэта вельмі неабходныя турніры. Я ўжо казаў, што згуляць са зборнымі Расіі - гэта тое ж самае, што і сапернічаць са зборнымі Фінляндыі, Швецыі.

Цяпер мы можам часцей атрымліваць той досвед, які для нас раней не ўяўляўся магчымым. Паканкурыраваць, паглядзець слабыя бакі, убачыць, у чым мы лепшыя, у чым мы горшыя.

Усе вучацца кожны дзень, таму тым, хто жадае прагрэсаваць, гэта неабходна.

– Ці дастаткова гульнявой практыкі?

– Што тычыцца чэмпіянатаў, я думаю, гульняў у нас шмат – і ў Betera-Экстралізе і ў вышэйшай лізе. Але іншы момант – міжнародныя турніры.

З такімі сапернікамі, як Расія, можна гуляць не адзін турнір, – сказаў Стась.