Брамнік мінскага «Дынама» Коласаў узначаліў рэйтынг маладых гульцоў КХЛ па выніках кастрычніка

КХЛ прадставіла рэйтынг найлепшых гульцоў да 23 гадоў па выніках кастрычніцкіх матчаў рэгулярнага чэмпіянату.

На чале спісу варатар мінскага «Дынама» Аляксей Коласаў, які набраў 4,3 бала. У кастрычніку ён правёў 10 матчаў, у якіх прапускаў 1,77 шайбы ў сярэднім за гульню і парыраваў 92,8 працэнта кідкоў. Больш за тое, у актыве галкіпера два шатаўты. У гэтых матчах «зубры» атрымалі 7 перамог.

Каментатар і эксперт афіцыйнага сайта КХЛ Антон Васяцін назваў Коласава вельмі значнай фігурай у сёлетнім мінскім «Дынама».

У топ-3 рэйтынгу маладых гульцоў таксама ўвайшлі абаронца «Спартака» Ягор Савікоў (3,79 бала) і форвард «Салавата Юлаева» Даніл Башкіраў (3,75).

7-е месца заняў беларускі нападаючы СКА Уладзімір Алістраў (3,27). У 12 кастрычніцкіх матчах неўскі армеец паклаў у скарбонку 10 (4+6) ачкоў па сістэме «гол+пас».