Аляксандр Кажэўнікаў: «Аб'яднаны чэмпіянат Расіі і Украіны мог стаць мяккай сілай. Ёсць шанц, што аб'яднаў бы краіны»

Расійскі хакейны спецыяліст Аляксандр Кажэўнікаў успомніў пра ідэю правядзення аб'яднанага чэмпіянату Расіі і Украіны па футболе.

– Мне не падабаецца тая валтузня, якая пайшла вакол «Барыса» і хакейнага Казахстана. Так, каманда праводзіць слабы сезон у КХЛ. Але ў той жа час яна адмовілася ад паўночнаамерыканскіх легіянераў і натуралізацыі, такі сумленны курс можа спрацаваць у будучыні. І вы паглядзіце, як ужо сёння Казахстан граміць усіх на Азіяцкіх гульнях, ды і ў эліце чэмпіянату свету ўвогуле ўтрымліваецца. І мы, і Казахстан абавязаны гэта шанаваць!

Лічу, што ў такой сітуацыі нам трэба падтрымаць «Барыс», а не кляваць. Тут найлепшы прыклад – хакейная Украіна, якая 20-30 гадоў таму была на ўзроўні цяперашняй Беларусі, а потым прымудрылася абрынуцца ў ніжэйшыя дывізіёны і страціць свой хакей. Зрэшты, ва Украіне гэта тычыцца не толькі хакея.

Дарэчы, у свой час у спорце мы дзяўблі Украіну гэтак жа, як цяперашні «Барыс».

Успамінаю, як на мяжы стагоддзяў ледзь не стартаваў аб'яднаны чэмпіянат па футболе Расія – Украіна. Улічваючы дзіўную любоў нашых краін да футбола, такі праект мог стаць мяккай нават не сілай, а сілішчай.

Ён абышоўся б у мільёны разоў танней, чым усё тое, што адбылося затым. І ёсць шанц, што аб'яднаў бы нашы краіны.

На жаль, нашы самыя прасунутыя журналісты – наўмысна або па непісьменнасці – праект тарпедавалі. Тыя, хто па непісьменнасці, гляджу, да гэтага часу пішуць, тыя, хто наўмысна – ужо замежныя агенты.

Так ці інакш, атрымайце цяперашнюю сітуацыю ў краіне і свеце. А цяпер па той жа схеме гэтыя ж людзі ўзяліся за Казахстан, – сказаў Кажэўнікаў.

Нагадаем, з 24 лютага 2022 году Расія працягвае вайну ва Украіне з выкарыстаннем тэрыторыі Беларусі.