Протас патрапіў у топ-6 самых каштоўных гульцоў НХЛ па версіі Benchrates
Беларускі форвард «Вашынгтона» Аляксей Протас заняў 6-е месца ў спісе самых каштоўных гульцоў НХЛ у сезоне-2024/25 па версіі Benchrates.
Рэйтынг складзены на аснове статыстычных дадзеных і з улікам заробкаў хакеістаў, якія ўнеслі найбольшы ўклад у поспехі сваіх каманд.
Так, кэпхіт Протаса, які складае 3,375 мільёна долараў, амаль у тры разы меншы за суму грошай, якую ён мог бы зарабляць, зыходзячы са сваіх паказчыкаў у бягучым сезоне (9,716 мільёна долараў).
У сёлетнім чэмпіянаце ў Протаса 59 (29+30) ачкоў. Акрамя таго, ён лідзіруе ў НХЛ па паказчыку карыснасці (+41).
На першым месцы штотыднёвага рэйтынгу форвард «Эдмантана» і найлепшы снайпер рэгуляркі Леон Драйзайтль. У топ-5 таксама ўваходзяць варатар «Вініпега» Конар Хелебайк, яго аднаклубнік Кайл Конар, а таксама дуэт з «Каларада» – абаронца Кейл Макар і нападаючы Натан Макінана.
