Шаранговіч пабіў рэкорд Грабоўскага не толькі па пунктах, але і па суме кантракта. Праўда, не да канца

У панядзелак «Калгары» заключыў з 26-гадовым Ягорам Шаранговічам новы кантракт. Пагадненне пачне дзейнічаць з сезона-2025/26. Яно разлічана на пяць гадоў і будзе прыносіць беларусу 5,75 мільёна долараў за кожны сезон да выліку падаткаў. Агульная сума кантракта складае 28,75 мільёнаў долараў. Для параўнання: паводле дзейнага пагаднення Шаранговіч атрымае ад «Калгары» за сезоне-2024/25 3,1 мільёна долараў.

Па сваёй суме 5-гадовая дамова нападніка зʼяўляецца рэкорднай для беларускага хакея. Ранейшае дасягненне належала Міхаілу Грабоўскаму. 6 сакавіка 2012-га мінчук падпісаўся на пяць гадоў з «Таронта» на агульную суму 26 мільёнаў долараў.

У 2024-м новы шматмільённы кантракт у НХЛ з беларусаў атрымаў не толькі Шаранговіч. У студзені да лета 2029-га з «Вашынгтонам» перападпісаўся Аляксей Протас. Агулам за пяць сезонаў 23-гадовы форвард атрымае 16,875 мільёнаў долараў.

Пры рэкордным для Беларусі агульным кантракце Шаранговіч усё роўна не рэкардсмен па гадавым акладзе. Найлепшае дасягненне належыць Грабоўскаму. Па згаданай 5-гадовай дамове з «Таронта» хакеіст у сезонах-2013/14 і 2014/15 мусіў атрымліваць па 6 мільёнаў долараў. Аднак да іх Грабоўскі не дацягнуў, улетку 2013-га перайшоўшы ў «Вашынгтон». Тым не менш нападнік атрымаў такую ​​суму. Па 4-гадовым кантракце з «Айлендэрс» (2014-2018) Грабоўскі ў апошнім сезоне меў аклад у 6 мільёнаў долараў.