У беларускім хакеі зафіксавалі ўнікальны касяк: суддзя відэапаўтораў не ўмее карыстацца сістэмай для іх прагляду

Баранавіцкі «Авітатар», які ў гэтым сезоне дэбютаваў у хакейнай Экстралізе, ад самай перадсезонкі пакутуе на праблемы.

У пачатку жніўня з'явілася інфармацыя, што ў клубе не выплачваюцца у поўным памеры заробкі, што ў штаце няма доктара і масажыста, а гульцам не выдалі форму. Пры гэтым дырэктар клуба Аляксей Крывапуст адправіўся адпачываць у Турцыі і на тэлефонныя званкі не рэагаваў.

Форму ў выніку знайшлі, каманда згуляла ў Кубку Салея, дзе нават здолела атрымаць дзве перамогі, спыніўшыся за крок ад плэй-оф. Аднак фінансавыя праблемы нікуды не зніклі. На днях гульцам выплацілі другі заробак, які паводле інсайдара Сцяпана Варанкова склаў усяго 90 беларускіх рублёў. Калі будзе выплачана астатняе, ніхто не ведае. Нібыта разбірацца з клубнымі праблемамі збіраліся прадстаўнікі федэрацыі, але яны да Баранавічаў пакуль не дабраліся.

У такім становішчы каманда стартавала з чатырох паражэнняў у экстралізе – двойчы саступіла «Славуцічу» са Смаленка (так, расіяне выступаюць у беларускім турніры) і двойчы дзейнаму чэмпіёну «Металургу». Пры гэтым падапечныя Дзмітрыя Краўчанкі мелі праблемы ў матчы з аўтсайдарам. У першай гульні яны нават «гарэлі» 1:4, але здолелі здзейсніць камбэк і перавесці матч у авертайм, а там і даціснуць суперніка.

Не менш драматычнай атрымалася і другая сустрэча, дзе барацьба таксама была дастаткова роўнай, а другога авертайму не здарылася толькі дзякуючы голу капітана Жлобіна Сяргея Касціцына.

ВІДЭА

Да таго ж сустрэча не абышлася без кур'ёзнага эпізоду. На 13-й хвіліне другога перыяду пры ліку 1:1 Кірыл Нікулін, здавалася, здолеў рэалізаваць большасць і вывеў «Авіятар» наперад. Але адзін з арбітраў сустрэчы ўбачыў парушэнне і адправіўся глядзець відэапаўтор.

Прагляд эпізоду расцягнуўся больш, чым на сем хвілін. Шайбу не залічылі, бо яна была забітая высока паднятай клюшкай, а ў пратаколе зрабілі цікавую пазнаку пра тое, што суддзя відэапаўтораў не ўмее карыстацца сістэмай «Відэа + Гол». Фатаграфіяй дакумента ў сваім тэлеграм-канале падзяліўся каментатар Іван Грунтоў. Рэдка ўбачыш такую заўвагу!

Клуб таксама не здолеў арганізаваць правільна відэасістэму, парушыўшы пункты рэгламенту па колькасці відэакамер, іх размяшчэнні і наладцы

Прычым няўмека – суддзя відэапаўтораў – не адзіная праблема ў Баранавічах. Суддзя-інфарматар у парушэнне рэгламенту запрасіў каманды на лёд за 1 хвіліну 40 секунд да стартавага ўкідвання, а не 3 хвіліны 30 секунд, як належыць.

Не настроілі нармальна ў Баранавічах і аранжавы ліхтар, які працаваў з нізкай яркасцю, а яшчэ клуб не забяспечыў галоўнага суддзю з суддзём відэапаўтору тэлефонамі для сувязі.