Беларус, што гуляў за Расiю, у 2023-м атрымаў добры кантракт у Мiнску – цяпер ў трэцiм клубе за месяц губляе КХЛ
Пiке Уладзiслава Кадолы.
Апошнім часам беларускі хакеіст Уладзіслаў Кадола не можа знайсці сабе сталага месца ў КХЛ. 14 лістапада 28-гадовы форвард падпісаўся з ніжагародскім «Тарпеда», якое стала чацвёртым для яго клубам за паўгода i трэцiм – за апошнi месяц. Распавядаем, што адбываецца з кар’ерай форварда.
12 ліпеня 2023 года Кадола перайшоў у мінскае «Дынама». На той момант ён меў кваліфікацыйную прапанову маскоўскага «Дынама», таму «зубрам» давялося заплаціць 89 тысяч долараў расійскаму клубу. Да гэтага форвард больш за 10 гадоў у расiйскiх клубах ды нават адмаўляўся ад спартыўнага грамадзянства Беларусі, каб не страцiць «нелегiянерскае» месца ў КХЛ.
Сайт КХЛ уключаў форварда ў топ-3 падпісаннi каманды. У Мінску Кадола па кантракце павінен быў атрымаць каля 530 тысяч долараў за два гады. За першы належыла 285 тысяч – cамы высокi паказчык для беларускiх гульцоў таго «Дынама».
У перадсезонке Кадола стаў найлепшым бамбардзірам «Дынама». Але потым атрымаў траўму, з-за чаго прапусцiў амаль месяц на старце сезона. А пасля вяртання за 23 матчы набраў 8 (2+6) балаў, па дарозе меўшы серыю ў 10 гульняў без набраных ачкоў.
У канцы лістапада 2023-га Кадола ізноў траўмаваўся i вылецеў на месяц. Пасля да канца рэгуляркі адыграў 22 матчы, яшчэ сем разоў не трапiўшы ў заяўку. Атрымалася набраць яшчэ толькi 6 (1+5) ачкоў. Гэта быў найгоршы сезон Кадолы за пяць гадоў.
У плэй-оф, дзе «Дынама» традыцыйна вылецела ў першым раўндзе, форвард увогуле не гуляў – i не праз нейкае пашкоджанне. Галоўны трэнер «зуброў» Дзмітрый Квартальнаў толькi загадкава сказаў, што «не проста так прымалася рашэнне, былі прычыны», нiяк iх не канкрэтызаваўшы.
У красавіку 2024-га з’явілася інфармацыя пра магчымы сыход нападніка з клуба. А Квартальнаў «адчапіў» Кадолу і ад кэмпа зборнай, у складзе якой форвард у 2021-м праляцеў мiма АГ, а потым прыняў удзел у віншаваннi Аляксандра Лукашэнкi з днём народзінаў. Пайшлi чуткi, што Кадола трапіў у няміласць да коўча.
29 траўня Кадолу абмянілі ў казахстанскі «Барыс» на Крысціяна Хенкеля. Але ўжо пасля перадсезонкi паведамлялася, што ў Астане хочуць адмовіцца ад паслуг беларуса, таму што ўзровень гульні хакеiста не задавальняе трэнерскі штаб.
Кадола прапусціў першы матч КХЛ сезона-2024/25 і прабыў у лазарэце дзве наступныя гульні. Дэбют за «Барыс» адбыўся ў матчы супраць «Дынама» на «Мінск-Арэне». Форвард атрымаў найгоршую адзнаку сярод хакеістаў казахстанскага клуба. Праз некаторы час галоўны трэнер «Барыса» Дэвід Неміроўскі адкрыта раскрытыкаваў падапечнага: «Не дапамагае ў абароне, не дапамагае ў атацы. На ўкідванні дрэнна гуляе, і мы пачынаем змену без шайбы».
Незадаволены становішчам у клубе быў і сам хакеіст. 20 верасня ён казаў: «Шчыра, пакуль не вельмі добра сябе адчуваю ў «Барысе». Магчыма, я не апраўдаў нейкія чаканні, таму мне не давярае трэнерскі штаб. Адсюль і няма ўпэўненасці. Пакуль справы ідуць дрэнна. Трэба неяк мяняць сітуацыю, пераломваць яе».
25 верасня «Барыс» змянiў трэнерскi штаб, але i пад кiраўнiцтвам Вячаслава Буцаева становiшча Кадолы не палепшылася. За 12 матчаў форвард так i не набраў ачкоў. 17 кастрычніка клуб паведаміў пра скасаванне пагаднення з хакеiстам.
5 лістапада Кадола падпісаў пробны кантракт на месяц з расiйскiм «Нафтахімікам». Хакеiст паспеў згуляць за клуб адну сустрэчу ў КХЛ – без набраных балаў. Але пакінуў Нiжнякамск роўна праз тыдзень пасля заключэння дамовы.
14 лістапада форвард падпісаў чарговы кантракт – двухбаковае пагадненне з ніжагародскім «Тарпеда». Гэта каманда больш статусная за папярэднiя, пакуль iдзе шостай у Заходняй канферэнцыi. Але цi зможа Кадола там зайграць?
«У сістэме ніжагародцаў беларускі нападаючы можа перазагрузіць кар’еру, пачаўшы з ВХЛ. Ці не перазагрузіць. Усё залежыць ад яго. У выпадку ўдалай адаптацыі можна і ў КХЛ вярнуцца, дзе разумныя цэнтральныя форварды лішнімі не будуць», – лічыць расійскі журналіст Міхаіл Зісліс.
Пакуль Кадола сапраўды заяўлены за фарм – «Тарпеда-Горкi» з ВХЛ. Але ў лiзе яшчэ не дэбютаваў – наступны матч у клуба 18 лiстапада.
Іншыя пасты карыстальніка
