Вы маглі не заўважыць, а Шаранговіч «ажыў» і ўсчаў гонку з Протасам – магчыма, ізноў выдасць магутны трук
Яшчэ нядаўна гаварылі пра крызіс, а тут такое.
У ноч на 26 студзеня нападнік «Калгары» Ягор Шаранговіч набраў чарговыя пункты ў НХЛ – двума асістамі дапамог перамагчы «Мінесоту» (5:4). Дзякуючы поспеху «Флэймз» крыху падмацаваліся на 8-м радку табліцы Заходняй канферэнцыі.
Для беларускага хакеіста гэта былі 16-ы і 17-ы пункты ў сезоне – цяпер на яго рахунку 9 галоў і 8 асістаў за 40 гульняў: усё яшчэ сціплыя лічбы ў параўнанні з сезонам-2023/24, калі Шаранговіч паставіў беларускі рэкорд па колькасці пунктаў (31+28).
Не так даўно мы разглядалі прычыны спаду ў нападніка «Калгары». Сярод іх былі траўма на пачатку сезона і адсутнасць пастаянных партнёраў – падчас цяперашняй рэгуляркі Шаранговіч быў цэнтрам трэцяй пяцёркі, правым нападнікам першай, левым у другой і трэцяй.
Стабільнае спалучэнне знайшлі для беларуса толькі пад сярэдзіну снежня – яго замацавалі на левым флангу арыентаванага на стрымліванне трэцяга звяна з Конарам Зары ў цэнтры і Джэйкабам Пелецье на правым баку. Але першапачаткова і гэта выглядала не самым удалым рашэннем – у тым месяцы распачалася рэкордная безгалявая серыя Шаранговіча, якая ў выніку дасягнула адзнакі ў 15 матчаў (цягам іх было толькі 3 асісты) і перарвался толькі 14 студзеня новага года. Праз такія сумныя дасягненні Алекс Русо з The Win Column прапанаваў перавесці беларуса ў запас, а аўтары The Atletic увогуле загаварылі пра неабходнасць абмену.
Але з пачаткам 2025-га, калі рэгулярка НХЛ пераадолела экватар, статыстычныя лічбы Шаранговіча пайшлі ўгору. За 11 матчаў новага года на рахунку гульца 3 гола і 5 асістаў – гэта 47% пунктаў (усяго 17) у сезоне.
Прычым 75% ад набраных за гэты месяц выніковых балаў прыйшліся на перыяд, калі Ягору змянілі пазіцыю – пасля траўмы партнёра па звяну Конара Зары ў матчы з «Анахаймам» 8 студзеня на яго ролю цэнтрфорварда перавялі Шаранговіча, і з таго моманту беларус вызначыўся 3 галамі і 3 асістамі ў 7 гульнях.
Ужо на другі матч у новай ролі беларус набраў 1+1 і стаў другой зоркай сустрэчы з «Чыкага» 14 студзеня (5:2) – голам Шаранговіч адзначыўся падчас контратакі ў меншасці.
Наступную шайбу закінуў праз тры дні, але тое не ўратавала «Калгары» ад паразы з «Сэнт-Луісам», канкурэнтам у барацьбе за плэй-оф (1:4). Але ж сам Шаранговіч атрымаў найлепшую адзнаку сярод сукаманднікаў – 7,2 паводле Flashscore.
Апошняя на сёння шайба беларуса атрымалася пацешнай – Шаранговіч не здолеў трапіць у пустую браму «Бафала» першым кідком, а пры другой спробе фактычна скраў гол у Джонатана Юберта. Мяркуючы па тым, як пасмяхаліся хакеісты, ніхто ў крыўдзе не застаўся.
На адрэзку ў сем матчаў пасля пераводу ў цэнтр трэцяга звяна Шаранговіч з'яўляецца адным з найлепшых бамбардзіраў «Калгары»: як і ў беларуса, па 6 пунктаў на рахунку маюць партнёр па звяну Джэйкаб Пелецье (3+3) і Блэйк Коўлман з другой пяцёркі (1+4).
У 2025-м Шаранговіч набраў амаль столькі ж пунктаў, колькі і Аляксей Протас – 8 балаў супраць 9 у нападніка «Вашынгтона», але ў таго на рахунку на адзін матч больш (11 і 12 адпаведна). Беларусы ў бягучым годзе трымаюць прыкладна аднолькавы тэмп набору пунктаў за гульню: 0,72 у сярэднім у Шаранговіча супраць 0,75 у Протаса.
Увогуле Шаранговіч не першы раз «раскрываецца» пад экватар сезона. У сезоне 2021/22 у нападніка было толькі 13 пунктаў да новага года, а пасля свята тады яшчэ нападнік «Нью-Джэрсі» давёў справу да 46 балаў (24+22) – і тое быў найлепшы сезон у складзе «Дэвілз».
Магчыма, цяпер такі ж фокус Шаранговіч прадэманструе з «Калгары»?
Іншыя пасты карыстальніка
