Беларус захрас у НХЛ: нiжэй не пускаюць праз калiзiю ў дакументах, у аснове ўжо не бачаць – хаця па адной якасцi параўналi з самiм Кросбi
Першым выходзiць на трэнiроўкi – пакуль не дапамагае.
Апошнiя гады, калi гаворка iдзе пра беларускiх хакеiстаў у НХЛ, то звычайна гэта Ягор Шаранговіч з «Калгары» і Аляксей Протас з «Вашынгтона», у якога цяпер асаблiва ўдалы час.
На iх фоне абаронца Уладзіслаў Калячонак не так заўважны – хаця цяперашнi сезон стаў чацвёртым запар, у якiм гэты беларускi гулец задзейнiчаны ў НХЛ. Мiнулай восенню ўвогуле здавалася, што Калячонак можа стаць яшчэ адным у шэрагу беларускiх гульцоў са сталай практыкай у лiзе – але ўсё склалася не так добра. Цяпер ён не гуляе нi ў НХЛ, нi ў лiзе нiжэй – праз юрыдычную калiзiю. Раскажам падрабязней, у якiм цяпер становiшчы абаронца i як да гэтага дайшло.
(фота)
З 2021-га па 2024-ы перспектыўны хакеіст ніяк не мог замацавацца ў бядовай «Арызоне» – за аўтсайдара НХЛ правёў толькi 39 матчаў за тры гады, у асноўным гуляючы за фарм-клуб з АХЛ «Тусон». Летам 2024-га «Арызона» пераехала i стала «Ютай» (па назве новага штату), а Калячонка, у якога скончыўся кантракт, чуткi адпраўлялi ў мінскае «Дынама». Але «Юта» ўсё ж прапанавала абаронцу новае двухгадовае пагадненне, i той застаўся.
Перад дэбютным для «Юты» сезонам НХЛ сайт лігі не бачыў Калячонка ў складзе клуба. Але хакеiст згуляў у гістарычным першым матчы каманды на перадсезонцы, за яе час зарэкамендаваў сябе i застаўся – распачаў рэгулярку ў трэцяй пары дэфаў, дзе гуляў з уладальнiкамi Кубка Стэнлi: Робертам Бартуцам (з «Сэнт-Луісам» у 2019-м) і Іанам Коўлам (з «Пітсбургам» у 2016-м i 2017-м).
Калячонак адгуляў 12 першых матчаў бягучага сезона НХЛ пры сярэднім айстайме ў 13 хвілін, набраў 4 (1+3) ачкi. Найлепшым у выкананні абаронцы стаў паядынак супраць «Сан-Хасэ» 29 кастрычніка, дзе набраў два асісты, але тое не дапамагло «Юце» – яна вяла 4:1, а ў вынiкау прайграла 4:5 у авертайме.
Ракавой стала гульня 3 лістапада з «Вегасам» (3:4 АТ), дзе абаронца дапусціў галявую памылку за брамай напрыканцы другога перыяду, пасля чаго не выходзiў на пляцоўку.
З наступных 16 матчаў НХЛ, да сярэдзіны снежня, Калячонак згуляў толькі ў адным. Увесь гэты час абаронца ўпарта трэнаваўся. Былі і незвычайныя заняткі – супрацоўнiца The Salt Lake Tribune Бэлла Фрэйзер паказала, як канадскі сукаманднік Ліам О“Браян вучыў Калячонка біцца на лёдзе.
– [Галоўны трэнер «Юты» Андрэ] Турыньі, падобна, задаволены тым, як наладзілася гульня абароны і пар дэфаў. Гульня аднаго з абаронцаў павінна прыкметна пагоршыцца, тады Калячонак стане заменай, – пісала Фрэйзер у сваім артыкуле.
Але дапамагло iншае – траўма Бартуцы. У яго адсутнасць Калячонак вярнуўся ў аснову – і ў першым жа матчы забросіў «Каларада» (4:1) пераможную шайбу.
– Я не адчуў, каб ён «заіржавеў» ці нешта падобнае. Ён быў вельмі добры, шчыра кажучы. [Адзначу] не толькі гол – быў надзейны без шайбы, рабіў добрыя прарыўныя перадачы, – сказаў пасля гульні Турыньі.
Але ў наступных 9 сустрэчах Калячонак нiчым не адзначыўся. Апошнім разам выходзіў на лёд 9 студзеня на прайграны 1:4 матч супраць «Флорыды», а далей зноў выпаў са складу. Што i не дзiўна: у пачатку 2025-га «Юта» забрала абаронцу Ніка ДэСімоне, якога на драфт адмоў выставiў «Нью-Джэрсі», а 15 студзеня на лёд вярнуўся Джон Марын, якi да гэтага шмат месяцаў аднаўляўся ад траўмы.
Цяпер Калячонак прапусцiў ужо 11 гульняў НХЛ запар. Пакуль што статыстыка сезона спынілася на такіх лічбах: 23 матчы, 5 (2+3) ачкоў, паказчык карыснасці «-7».
Пры гэтым абаронца не атрымлiвае гульнявой практыкi i ў «Тусоне», які застаўся фарм-клубам «Юты» ў АХЛ. Прычына тут у калектыўнай дамове лiгi з гульцамi. Калячонак быў задрафтаваны ў НХЛ «Флорыдай» у 2019-м, калi яму было 18 гадоў. Паводле дамовы, такога гульца можна спускаць у фарм без дадатковых працэдур цi толькi першыя пяць гадоў, якiя ў выпадку беларускага хакеiста ўжо скончылiся, цi пасля 160 матчаў у НХЛ (а на рахунку Калячонка толькi 62).
Проста цяпер «Юта» можа толькi выставiць Калячонка на драфт адмоў – i калi яго адтуль нiхто не забярэ, тады абаронца паедзе ў фарм. А калi забярэ, то клуб застанецца без варыянта замены ў выпадку новых траўм – таму «Юта» на гэта i не iдзе. Вось Калячонак i застаецца ў запасе для НХЛ, не маючы гульнявога часу.
Але хакеiст зацята працуе, каб прабiцца ў аснову. Супрацоўнiк мясцовага выдання Deseret News Броган Хьюстан у канцы 2024-га напiсаў матэрыял, ўражаны тым, што Калячонак раз за разам, нават калi вяртаўся ў склад, выходзiў на трэнiроўкi першым.
«Не дзіва, але Калячонак выйшаў на лёд на паўгадзіны раней за пачатак заняткаў, проста каб папрацаваць з коўчамі тэхнікі»
«Секунда, як [лёдазалiвачныя камбайны] «Замбоні» скончылі, Калячонак на лёдзе. На 25 хвілін раней [за пачатак заняткаў]»
«Калядны перапынак быў задоўгім для Калячонка. Ён з“явіўся на лёдзе да таго, як «Замбонi» скончылі»
У сваiм артыкуле Хьюстан назваў Калячонка адным з самых працавітых і сціплых хакеістаў НХЛ. Па словах аўтара, калi ён паведамiў гульцу пра намер напiсаць хвалебны тэкст, Калячонак адразу сказаў, што не трэба. Таксама Хьюстан узяў каментарый у самага дасведчанага гульца «Юты», 35-гадовага абаронцы Іана Коўла. Той таксама вельмi пахвалiў стараннасць Калячонка i нават параўнаў яго па ступенi дысцыплiнаванасцi з зорным канадцам Сідні Кросбі, з якiм Коўл гуляў у «Пiтсбургу».
– Калячонак – рэальна выдатны хакеiст. Ён валодае ўсiмi iнструментамi. Ён можа катацца рэальна добра, рабiць розыгрышы, кiдаць, пасаваць, весці шайбу спакойна i з рыўком, – пералiчыў Коўл.
Але пакуль трэнер аддае перавагу iншым i бачыць Калячонка хiба што ў пятай пары абаронцаў, якой на лёдзе месца няма.
Іншыя пасты карыстальніка
